ديدار قالياحمەت: پىشاقتى كوردىم، ءبىراق ءوزىمدى عانا قورعاۋعا تىرىستىم
تالدىقورعان. KAZINFORM - جەتىسۋ وبلىسىنىڭ مامانداندىرىلعان اۋدانارالىق سوتىندا شەرزات پولاتتىڭ ولىمىنە قاتىستى قىلمىستىق ءىس قارالىپ جاتىر. بۇگىنگى سوت وتىرىسىندا ايىپتالۋشى ديدار قالياحمەت جاۋاپ بەرىپ، قىلمىس جاسالعان ساتتەگى جاعدايدى بايانداپ بەردى.
- 2024-جىلدىڭ 4-قازان كۇنى ساعات 00:30 شاماسىندا اعام سانات ءابدىقادىر جانە ءىنىم داۋلەت مۇراتوۆ ۇشەۋىمىز مونشادان شىققان سوڭ شوتا رۋستاۆەلي كوشەسىمەن ءجۇرىپ، «قاماجاي» دۇكەنىنىڭ الدىنا توقتادىق. سول جەردە ءبىر توپ جىگىتپەن جولىقتىق، ولار امانداستى. سول ساتتە عايىپبايەۆ اعام ساناتتى توقتاتىپ، «توبەلەسكە كەلدىڭدەر مە؟» دەپ سۇرادى. اعام: «مەن شالمىن عوي» دەپ جاۋاپ قاتتى. وعان نۇرقانات: «شالعا ۇقسامايسىڭ» دەدى»، - دەدى قالياحمەت.
وقيعا بارىسىن ودان ءارى تارقاتقان ايىپتالۋشى بىلاي دەيدى:
- سول كەزدە مەن دە نۇرقانات پەن ساناتتىڭ جانىنا باردىم. ارتىنشا ءبىز دۇكەنگە كىردىك، ىشىندە ەشكىم بولمادى. ەكى بوتەلكە سىرا الىپ، كاسساعا جاقىندادىم، ءبىراق ساتۋشى تابىلمادى. سودان كەيىن دۇكەنگە ەكى قىز كىردى، ارتىنان ازامات كەلدى. قارجاۋباي دا كەلىپ، وعان سانات سىرانىڭ اقشاسىن تولەدى. سول ساتتە دالادا شۋ ەستىلدى. قارجاۋباي ءبىزدى دۇكەننەن شىعارىپ جىبەردى. سىرتقا شىققاندا ارتىما قاراسام، قارجاۋبايدىڭ قولىنان پىشاقتىڭ ءجۇزى جىلتىراپ كورىندى. ءوزىمدى قورعاۋ ءۇشىن قارجاۋبايدىڭ قولىنان ۇستاپ، «قوي، قوي» دەپ توقتاتۋعا تىرىستىم. قاسىمداعى بالالار دا قارجاۋباي اعايعا سابىر ساقتاۋدى ءوتىنىپ جاتتى. سول ساتتە بىرەۋ مەنى كيىمىمنەن تارتىپ قالدى. كەيىن بەينەجازبادان ونىڭ شىڭعىس ەكەنىن كوردىم، - دەپ ءتۇسىندىردى سوتتالۋشى.
ديدار قالياحمەتتىڭ ايتۋىنشا، كەيىن سىرتقا شىعىپ نۇرقياسپەن امانداسىپ، كولىككە وتىرعان. سول ساتتە مىلتىق داۋىسىن ەستىگەن.
- كولىكتى توقتاتىپ، سانات پەن داۋلەتكە «وتىرا تۇرىڭدار، مەن بارىپ نە بولعانىن كورىپ كەلەيىن» دەدىم. شوتا رۋستاۆەلي كوشەسىنە قايتا بارعانىمدا جىگىتتەر توبەلەسىپ جاتقانىن كوردىم. جاقىنداي بەرگەنىمدە «مەنىڭ بالا-شاعام بار» دەپ، ارتقا شەگىنىپ، كولىككە ءمىنىپ كەتتىم. ساناتتىڭ ۇيىنە بارىپ، سول جەردەن جۇبايىم كەلىپ الىپ كەتتى، - دەدى ول.
سونىمەن قاتار ديدار قالياحمەت سوت بارىسىندا سوتتالۋشىلاردىڭ كەيبىرىمەن بۇرىننان تانىس ەكەنىن ايتتى. ونىڭ ايتۋىنشا، شىناسىل ابزالدى مەكتەپ كەزىنەن تانيدى، نۇرقياستى بالا كەزدەن بىلەدى، ال راۆيلدى تەك ءبىر رەت - وتكەن جىلى تويدا كورگەن. دەگەنمەن ول سوتتالۋشىلاردىڭ ەشقايسىسىمەن تىعىز بايلانىسى جوق ەكەنىن مالىمدەدى.
ايتا كەتەيىك، ابزال شىناسىل كىمدى پىشاقتاعانىن ايتتى.
شەرزات ىسىندەگى باستى ايىپتالۋشى وسىعان دەيىنگى سوزىنەن باس تارتقانى جايلى جازعان بولاتىنبىز.
ەسكە سالا كەتەيىك، شەرزات پولاتتىڭ ولىمىنە قاتىستى سوتتا تاعى ءبىر سوتتالۋشى ايىپتاۋ اكتىسىمەن كەلىسپەيتىنىن ايتقان.
تاعى ءبىر سوتتالۋشى نۇرقياس ءىلياسوۆ مىلتىقپەن ۇرۋ سەبەبىن تۇسىندىرسە، ازامات توقتاۋبايەۆ وتىرىك ايعاق بەرگەنىن راستادى.
كامەلەتكە تولماعان تاعى ءبىر ايىپتالۋشى دۋمان ىسقاق وزىنە تاعىلعان ايىپتى مويىندامادى.
ايتا كەتەيىك، شەرزات پولاتتىڭ ءولىمى بويىنشا العاشقى سوت وتىرىسىندا پروكۋرور وقيعانىڭ تولىق حرونولوگياسىن باياندادى.
بىلتىر 4-قازان كۇنى توبەلەستەن 16 جاستاعى جاس ءوسپىرىم قازا بولعانىن جازعان ەدىك.
