ديەۆالۆاتسيا كۇتىپ وتىرعان جوقپىز - ولجاس بەكتەنوۆ

استانا. KAZINFORM - پرەمەر- مينيستر ولجاس بەكتەنوۆ ۇكىمەت وتىرىسىنان كەيىن ءوتىپ جاتقان باسپا ءسوز ءماسليحاتىندا قازاقستان ەكونوميكاسىن دامىتۋدىڭ بازالىق سەناريى شىندىققا جاقىنىراق دەگەن پايىم ايتتى.

- ءبىزدىڭ باعالاۋىمىز بويىنشا، سالماقتى ساراپشىلاردىڭ كوبىنىڭ باعالاۋى بويىنشا تەڭگە باعامىنىڭ كۇرت السىرەۋىنە اكەلەتىن العىشارتتار جوق. بيۋدجەتكە قانداي پارامەترلەر ەنگىزىلگەن دەگەنگە كەلسەك، قازىر ءبىز بازالىق سەناريدى ۇستانىپ وتىرمىز. دوللار باعامى 540 تەڭگە، ءبىر باررەل مۇنايدىڭ باعاسى 60 دوللار دەپ بەلگىلەنگەن. پەسسيميستىك سەناري دە بار. ەگەر كەنەتتەن مۇناي باعاسى باررەلىنە 50 دوللارعا دەيىن تۇسسە، باسقا تەتىكتەر ىسكە قوسىلادى. ءبىراق بازالىق سەناريدىڭ ورىندالۋى شىندىققا جاقىنىراق دەپ ەسەپتەيمىز، - دەدى ول ب ا ق وكىلىنىڭ سۇراعىنا بەرگەن جاۋابىندا.

پرەمەر- مينيستر جۋرناليستەرگە كەنەت ديەۆالۆاتسيا بولمايتىنىن سەنىمدى تۇردە ايتتى.

- ءبىز ديەۆالۆاتسيا كۇتىپ وتىرعان جوقپىز. تەڭگە باعامىنىڭ كەنەت ءتۇسۋى بولمايدى، - دەدى ۇكىمەت باسشىسى.

ايتا كەتسەك، بۇگىنگى ۇكىمەت وتىرىسىندا پرەمەر- ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ۇكىمەت وتىرىسىندا جىلدىڭ 6 ايىندا ەل ەكونوميكاسى 6,2 پايىز ءوسىم كورسەتكەنىن ءمالىم ەتكەن ەدى.