دەپوزيتتە قارجى جيناۋ ءتيىمدى مە؟
استانا. قپازاقپارات - بىلتىر جەكە تۇلعالاردىڭ دەپوزيتتەرىندەگى قارجى 20,4 تريلليون تەڭگەگە جەتتى. بۇل مەملەكەت تاريحىندا بولماعان قۇبىلىس.
ال زاڭدى تۇلعالاردىڭ قارجىسىن قوسا ەسەپتەگەندە ەكىنشى دەڭگەيلى بانكتەردەگى دەپوزيتتەر قورى 35 تريلليون تەڭگەدەن استى. تيىنىن تەڭگە ەتكىسى كەلەتىن ەلدىڭ دەنى دەپوزيتتە اقشا جيناعاندى ءجون كورەدى. بىلتىر جەكە تۇلعالاردىڭ جيناق قورى 20 تريلليون تەڭگەدەن اسقان. بۇل بۇرىن-سوڭدى بولماعان رەكوردتىق كورسەتكىش. ءبىر جىلدا بانك قىزمەتىن قولدانۋشىلاردىڭ قاتارى ارتىپ، قارجى كولەمى 20 پايىزعا ارتقان.
ساراپشىلار، بۇل جاقسى ءۇردىس دەيدى. قارجى قولدانىسى قىسقارىپ، قورلاردا جينالاتىن بولسا سالىمشىلارمەن قاتار مەملەكەتكە دە پايدالى ەكەن.
ايبار ولجايەۆ، ەكونوميست:
- دەپوزيتتەردىڭ كوپ بولعانى ەكونوميكالىق سيستەماعا جاقسى. بۇل جەردە جيناقتاۋشى جۇيەدە بولادى جانە ول قارجىلىق تۇراقتىلىققا جاقسى اسەر بەرەدى. دەپوزيت حالىقتىڭ قارجىلىق جاناعى پودۋشكا دەيدى عوي، قارجىلىق ءبىر قورى. رەزەرۆتىڭ جوعارى بولعانى بانكتەرگە دە ءوتىمدى بولعانى جاقسى جانە بىزدەگى باسى ارتىق اقشانى نارىقتاعى ينفلياتسيانى قوزدىرماۋ ءۇشىن ستيليزاتسيا جاسايدى.
ءدۇيىم جۇرتتىڭ قارجىسىن دەپوزيتتە جيناۋى تەڭگەنىڭ قۇنسىزدانۋىنا تەرىس اسەر ەتەدى. الايدا، ەكونوميكادا ينفلياتسيا تۇرالاسا، بانكتەردەگى بازالىق مولشەرلەمە تومەندەيدى دەگەن تۇسىنىك بار. بيىل دا سولاي بولدى، جىلدىق ءوسىم 1 پايىزعا قىسقاردى. ۇلتتىق بانك باسشىلىعى 15,75-تەن 14,75 پايىزعا دەيىن تومەندەتۋ تۋرالى شەشىم شىعاردى.
تيمۋر سۇلەيمەنوۆ، قر ۇلتتىق بانكىنىڭ ءتوراعاسى:
- شەشىم ناقتى دەرەكتەر مەن جاڭارتىلعان بولجامداردى ەسكەرە وتىرىپ قابىلداندى. ماكروەكونوميكالىق كورسەتكىشتەردىڭ بولجامدارىن جاڭارتۋمەن قاتار، ينفلياتسيا تاۋەكەلدەرىن باعالاۋى تۇزەتىلدى. جىلدىق ينفلياتسيا باياۋلاۋدا. دەگەنمەن، ونىڭ قارقىنى تومەندەدى. بۇل ءبىزدىڭ بولجامىمىزعا سايكەس.
قارجى ۇيىمىن تاڭداۋدان بۇرىن، قانداي جولمەن جيناق اشۋعا باس اۋىرتىپ جۇرگەندەر دە بار. ەلدىڭ ءبىر بولىگى ارتىق اقشاسىن قۇندى قاعاز نەمەسە قارجى، ال ەندى ءبىر تاراپ التىن كۇيىندە ساقتاعاندى ءجون كورەدى. ساناسى سانعا، ويى ونعا بولىنگەن اعايىننىڭ «قاي جول ءتيىمدى ءارى قاۋىپسىز؟» دەگەن ساۋالىن سالا مامانىنا جولدادىق.
ايبار ولجايەۆ، ەكونوميست:
- بازالىق ستاۆكا 14-تەن جوعارى بولىپ تۇرعان ءۇشىن تەڭگەدە دەپوزيت ۇستاۋ حالىق ءۇشىن ەڭ ءتيىمدى ۆاريانت دەپ ويلايمىن. ول ينفلياتسيادان جوعارى. التىن ينفلياتسياعا كوررەكسيا جاسالمايدى. ينفلياتسيا بولىپ كەتسە، التىن الەمدەگى نارىقتاعى سۇرانىسقا قاتىستى. ول قازاقستاندىق ينفلياتسياعا قارامايدى.
سونداي- اق، بەلگىلى ساراپشى، «جىلداپ جيناعانىم ءبىر كۇندە جوق بولادى دەپ الاڭداماڭىزدار»، - دەيدى. مەملەكەت سالىمشىلاردىڭ 20 ميلليون تەڭگەسىنە دەيىن كەپىلدىك بەرەدى. ال شەتەلدىك ۆاليۋتالارعا - 5 ميلليون تەڭگە كولەمىندە ساقتاندىرادى. بۇل ءۇمىت ەتكەن بانكىڭىز بانكروت بولسا دا، سالىمىڭىز قايتارىلادى دەگەن ءسوز.
اۆتورى: شەرنياز جالعاسبەك ۇلى
www.24.kz
