«دوستىق - مويىنتى» ەكىنشى تەمىرجول جەلىسى جوسپاردان ەكى جىل بۇرىن اياقتالدى - رۋسلان جەلدىباي

استانا. KAZINFORM - قازاقستان رەسپۋبليكاسى پرەزيدەنتىنىڭ كومەكشىسى - پرەزيدەنتتىڭ باسپا ءسوز حاتشىسى رۋسلان جەلدىباي «دوستىق - مويىنتى» تەمىرجول ماگيسترالى قازاقستاننىڭ قىتاي مەن ەۋروپا اراسىندا تەمىرجولمەن جۇك تاسىمالداۋداعى جەتەكشى ءرولىن كۇشەيتەتىنىن ايتتى.

- بۇگىن مەملەكەت باسشىسى «دوستىق - مويىنتى» تەمىرجول ماگيسترالىنىڭ ەكىنشىسى جەلىسىن ىسكە قوستى. پرەزيدەنت قاسىم-جومارت توقايەۆ سالتاناتتى ءىس-شارادا سويلەگەن سوزىندە اتالعان باعىت بويىنشا كولىك قاتىناسىنىڭ باستالۋىن تاريحي وقيعا دەپ باعالادى.

شىن مانىندە، ستراتەگيالىق جوبانىڭ ءساتتى جۇزەگە اسۋى ەل ەكونوميكاسىنا زور سەرپىن بەرەدى. قازاقستان ەۋرازياداعى ماڭىزدى كولىك-ترانزيت حابى رەتىندەگى پوزيتسياسىن نىعايتا تۇسەدى، - دەدى ول.

جاڭا جول قازاقستاننىڭ قىتاي مەن ەۋروپا اراسىندا تەمىرجولمەن جۇك تاسىمالداۋداعى جەتەكشى ءرولىن كۇشەيتەدى.

- ەكسپورتتىق تاۋار جەتكىزۋ مەرزىمى ايتارلىقتاي قىسقارادى. «دوستىق - الاشاڭقاي» شەكارا وتكەلى ارقىلى جۇك تاسىمالىنىڭ كولەمى بەس ەسە وسەدى. اتالعان باعىت ءبىر تاۋلىكتە وتكىزە الاتىن پويىزدار سانى 12 دەن 60 جۇپقا دەيىن ۇلعايادى. كونتەينەرمەن جۇك تاسىمالىنىڭ جىلدامدىعى تاۋلىگىنە 1500 شاقىرىمعا دەيىن ارتادى.

جوبا ترانسقازاقستان تەمىرجول ءدالىزىن قالىپتاستىرۋدىڭ باستاپقى بولىگى رەتىندە ەلىمىزدىڭ ترانزيتتىك الەۋەتىن ەلەۋلى تۇردە نىعايتادى.

ايتا كەتۋ كەرەك، جوبا ەل ەكونوميكاسىنا قوسىمشا مۋلتيپليكاتيۆتى تۇرعىدان اسەر ەتەدى. قۇرىلىس بارىسىندا وتاندىق زاۋىتتاردان 113 مىڭ توننادان استام رەلس پەن 1,6 ميلليون تەمىر- بەتون شپال ساتىپ الىندى. قىزمەتتەر مەن تاۋارلاردىڭ قازاقستاندىق ۇلەسى 85 پايىزعا جەتتى. اۋقىمدى جوباعا 1500 دەن اسا ارناۋلى قۇرىلىس تەحنيكاسى، 3 مىڭ جۇمىسشى جۇمىلدىرىلىپ، شاعىن جانە ورتا بيزنەستىڭ 7 مىڭ وكىلى اتسالىستى، - دەدى رۋسلان جەلدىباي.

ساۋاتتى جوسپارلاۋ مەن قۇرىلىسشىلاردىڭ تاباندى ەڭبەگىنىڭ ارقاسىندا تەمىرجول جەلىسى بەلگىلەنگەن مەرزىمىنەن ەكى جىل بۇرىن اياقتالدى.

- مەملەكەت باسشىسىنىڭ ترانزيتتىك الەۋەتىمىزدى كەڭەيتۋ جونىندەگى تاپسىرماسىن جۇزەگە اسىرۋ جالعاسادى. بۇگىندە بىرنەشە ماگيسترالدىڭ قۇرىلىسى مەن جاڭعىرتۋ جۇمىستارى جۇرگىزىلىپ جاتىر. اتاپ ايتقاندا، باقتى - اياگوز، مويىنتى - قىزىلجار، التىنكول - جەتىگەن جوبالارى جۇزەگە اسىرىلۋدا. سونداي-اق ەل اۋماعىندا ءۇش مىڭ شاقىرىمعا جۋىق تەمىرجول جوندەلىپ جاتىر، - دەدى ول.

ايتا كەتەلىك مەملەكەت باسشىسى «دوستىق - مويىنتى» تەمىرجولىنىڭ ەكىنشى جەلىسىن ىسكە قوسقان ەدى.