دونالد ترامپ 8-مامىردى جەڭىس كۇنى دەپ جاريالادى
استانا. قازاقپارات - ا ق ش- تا بۇگىن ەكىنشى دۇنيەجۇزىلىك سوعىستىڭ اياقتالعانىنا 80 جىل تولۋىنا وراي جەڭىس كۇنى اتاپ وتىلەدى.
دونالد ترامپ ارنايى جارلىق شىعارىپ، 2025 -جىلدىڭ 8 -مامىرىن ەكىنشى دۇنيەجۇزىلىك سوعىستاعى جەڭىس كۇنى دەپ بەلگىلەدى. وسى ۋاقىتقا دەيىن بۇل كۇن ا ق ش- تا ەۋروپاداعى جەڭىس كۇنى دەپ قاراستىرىلىپ كەلگەن ەدى.
سوندىقتان ترامپ Truth Social جەلىسىندە بۇعان دەيىن وداقتاس ەلدەردەگى سياقتى ءتيىستى دەڭگەيدە اتاپ وتىلمەگەنىنە قىنجىلىس ءبىلدىردى. ا ق ش- تىڭ فاشيزممگە قارسى كۇرەستەگى شەشۋشى ءرولىن اتاپ ءوتىپ، ەركىندىك جولىندا جانىن قيعان جاۋىنگەرلەرگە تاعزىم ەتتى.
دونالد ترامپ، ا ق ش پرەزيدەنتى:
- بۇگىن ءبىز ەكىنشى دۇنيەجۇزىلىك سوعىستاعى جەڭىس كۇنى مەن وداقتاستاردىڭ فاشيزمدى جەڭگەن تاريحي ءساتىن ەسكە الامىز. ەگەر امەريكالىق جاۋىنگەرلەردىڭ جانقيار ەرلىگى بولماعاندا بۇگىنگى الەم مۇلدە باسقا بولار ەدى. مەنىڭ پرەزيدەنت رەتىندەگى ارتىمدا قالدىرار ەڭ ۇلكەن مۇرام بىتىمگەرشىلىك جولىنداعى تاباندىلىعىم بولۋى قاجەت. ءبىز تەك جەڭىسكە جەتكەن شايقاستارمەن ەمەس، اياقتالعان سوعىستارمەن دە ماقتانۋىمىز كەرەك.
24.kz
