دوللاردىڭ قىمباتتاۋى: دەپوزيتتەگى قارجىنى قالاي ساقتاعان دۇرىس
استانا. KAZINFORM - ەلىمىزدە سوڭعى كۇندەرى دوللار باعامى 500 تەڭگە مەجەسىنە تاياپ جىعىلىپ تۇر. تەڭگە قۇنىنىڭ تومەندەۋى جاعدايىندا دەپوزيتتە اقشاسى بار ادامدار قالاي ارەكەت ەتكەنى ءجون. وسى جايدى ەكونوميست ماقسات حالىقتان سۇراپ كورگەن ەدىك.
«قازىر كوپتەگەن ساراپشىلار دەپوزيتتەگى اقشانى تەڭگەدەن اۋىستىرماعان ءجون دەپ سانايدى. ويتكەنى تەڭگەنىڭ كىرىستىلىگى جوعارى. جوق دەگەندە 14 پايىز، جوعارى دەگەندە 17 پايىزعا دەيىن دەپوزيتتىك كىرىستىلىك بار. ال دوللاردىكى - 1-اق پايىزدىق كىرىستىلىك. كورىپ وتىرعانىڭىزداي، اقشانى دوللارمەن ۇستاۋ ءتيىمسىز. سوندىقتان دا كوپتەگەن ساراپشىلار اقشانى تەڭگەمەن ۇستاۋعا كەڭەس بەرەدى. ال مەن ءوز باسىم التىن ارىپتەرمەن جازىلعان قارجىگەردىڭ زاڭىنا جۇگىنەم. ول «بۇكىل قاراجاتتى ءبىر جەردە ۇستاماڭىز، قاراجاتتى ءارقاشان ءبولىپ، بىرنەشە ۇياشىقتا، بىرنەشە ۆاليۋتادا ۇستاڭىز» دەيدى. ياعني، ءبارىن تەڭگەمەن نەمەسە ءبارىن دوللارمەن ۇستاۋ دۇرىس ەمەس. نەگىزى، دوللاردى بۇعان دەيىن، باعاسى 440 تەڭگە بولىپ تۇرعان كەزدە ساتىپ الىپ قويعان بولسا، بۇگىن ونداي ادامدار ەركىن وتىراتىن ەدى. دەيتۇرعانمەن قازىردىڭ وزىندە بارلىق قاراجات تەڭگەمەن تۇرسا، ءبىراز بولىگىن دوللار قىلىپ قويۋعا بولادى. ونىڭ ناقتى پايىزدىق كورسەتكىشى دەپوزيتتىڭ تابىستىق كورسەتكىشىنە بايلانىستى انىقتالادى. ماسەلەن، ءۇش ۆاليۋتاعا - %40 ىن دوللارمەن، %30 ىن تەڭگەمەن، %30 ىن ەۋرومەن دەگەن سياقتى رەتتىلىكپەن ءبولىپ ساقتاۋعا بولادى. بۇل قاتىپ قالعان قاعيدا ەمەس. قايسىسىنا كوبىرەك تابىس ءتۇسىپ تۇرادى، سوعان كوبىرەك باسىمدىق بەرسە، ول ادام ۇتىلمايدى. دوللار مەن تەڭگەنىڭ ءبىرىنىڭ باعامى اۋىتقىپ جاتسا دا، ول ادام وزگە ۆاليۋتادا قارجىسى بولعاندىقتان قاتتى الاڭدامايدى. سوندىقتان وسىنداي ءادىس-تاسىلدەردى قولدانۋ كەرەك»، - دەيدى ەكونوميست Kazinform تىلشىسىنە بەرگەن جاۋابىندا.
سونداي-اق، ساراپشى قارجىنى تەك ۆاليۋتادا ۇستاۋ دا تەرىس ەكەنىن ەسكەرتتى.
«قارجىنى تەك ۆاليۋتادا ۇستاۋ دا، تەك دەپوزيتتە ۇستاۋ دا دۇرىس ەمەس. قور نارىعىنداعى اكسيا، وبليگاتسيالاردى الىپ قويۋ كەرەك. ارتىق اقشاسى بولسا، التىن دا العان ءجون. وسىنداي اقشا-قاراجاتتاردى ۇلعايتۋدىڭ بالامالى كوزدەرىن دە پايدالانعان دۇرىس»، - دەدى ول.
ودان بولەك، ماقسات حالىق وسىنداي قارجى نارىعىنداعى قۇبىلمالى كەزەڭدە حالىق قانداي ۇستانىمدا بولسا، ۇتىلمايتىنىن ايتتى.
«نەگىزىندە، ۆاليۋتانىڭ قۇنسىزدانۋى سەكىلدى ۇردىستەر ادەتتە قىسقامەرزىمدى بولادى. سونداي ۋاقىتتى الىپساتارلار جاقسى پايدالانادى. الىپساتارلار دەگەن سونداي ءبىر قورقىنىشتى ادامدار ەمەس. ول دا نارىقتىڭ ءبىر بولشەگى. دەيتۇرعانمەن، ولاردىڭ اسىرا سىلتەپ، تىم اگرەسسيۆتى ارەكەت ەتۋىنىڭ حالىققا زاردابى بولۋى مۇمكىن. ويتكەنى كوپتەگەن ادامدار قىمباتتاۋ ۇدەرىسى ەڭ شارىقتاۋ شەگىنە جەتكەن ساتىندە دوللار ساتىپ الادى. ونداي كەزدە ول ازاماتتار كەرىسىنشە ۇتىلىپ قالۋى ىقتيمال. وسىنداي كەزدە قارجىگەرلەردىڭ «ءبارى ساتىپ جاتقان كەزدە ساتپاڭىز، ءبارى ساتىپ الىپ جاتقان كەزدە ساتىپ الماڭىز» دەگەن اينىماس زاڭىنا جۇگىنگەن ءجون. سەبەبى بۇل ەكى جاعدايدا دا ادام ۇتىلىپ قالادى. ءالىپتىڭ ارتىن باعىپ، اقىل-پاراساتقا نەگىزدەلگەن سالقىنقاندى شەشىم قابىلداۋ كەرەك. اقشا قاراجاتتارى ەموتسيالىق شەشىمدى مۇلدەم ۇناتپايدى»، - دەيدى ەكونوميست.
بۇگىن KASE قور نارىعىنداعى كۇندىزگى ساۋدا قورىتىندىسى بويىنشا دوللار قايتا قىمباتتاپ، 498,34 تەڭگەگە جەتتى.
بۇعان دەيىن ۇلتتىق بانك ۆاليۋتا باعامىنىڭ كۇرت وزگەرۋىنە جول بەرمەۋ ءۇشىن ينتەرۆەنتسيا جۇرگىزۋگە دايىن ەكەنىن مالىمدەدى.
ودان بولەك، ۆاليۋتا نارىعىنداعى تەڭگەرىمدىلىكتى ارتتىرۋ ماقساتىندا كۆازيمەملەكەتتىك سەكتور سۋبەكتىلەرىنىڭ ۆاليۋتالىق تۇسىمدەرىنىڭ %50 ىن مىندەتتى تۇردە ساتۋ تالابى قايتا ەنگىزىلەتىن بولدى. ق ر ۇكىمەتىنىڭ ءتيىستى قاۋلىسى مەن ۇلتتىق بانكتىڭ بۇيرىعى جاقىن كۇندەرى قابىلدانادى.
