دەپۋتات وفشورداعى 45 ميللياردتى ەلگە قايتارۋدى تالاپ ەتتى

بۇگىن ءماجىلىستىڭ جالپى وتىرىسىندا دەپۋتات باقىتجان بازاربەك وفشورداعى قاراجاتتى قايتارۋ ماسەلەسىن كوتەردى، دەپ حابارلايدى Kazinform.

«كاپيتالدى قايتارۋ ماسەلەسىنە توقتالعىم كەلىپ وتىر. زاڭنىڭ سولقىلداعىن پايدالانىپ كەيبىر شەنەۋنىكتەر مەن وليگارحتار وتىز جىل بويى كاپيتالدى وفشورلارعا شىعارىپ تۇردى. مەندەگى اقپارات بويىنشا قازىر وفشورلىق ايماقتاردا 45 ميللياردقا (ا ق ش دوللارى) جۋىق ەلدىڭ اقشاسى جاتىر. Tax Justice ۇيىمنىڭ اقپاراتىنا قاراعاندا، جىل سايىن قازاقستاننان 200 ميلليون دوللار كاپيتال شىعارىلادى. بۇل رەتتە، ۇكىمەت وسى 45 ميللياردقا جۋىق وفشورلارداعى اقشانى قايتارۋدا قانداي شارا قولدانىپ جاتىر؟ كەيبىر الەمدە وفشورلىق ايماقتار بار، ياعني كايمان نەمەسە سەيشەل ارالدارىن اتاپ وتۋگە بولادى. مەن بازا بويىنشا قارادىم، ولارمەن كەلىسىمشارت جاسالماعان. سولارمەن كەلىسىمشارت قاشان دايىندالادى؟» - دەدى ب. بازاربەك.

ءوز كەزەگىندە پرەمەر-ءمينيسترىنىڭ ورىنباسارى - قارجى ءمينيسترى ەرۇلان جاماۋبايەۆ بۇل كەشەندى جۇمىس اياسىندا زاڭسىز شەتكە شىعارىلعان، زاڭسىز يەمدەنگەن قاراجاتتى قايتارۋ باعىتىندا كوميسسيا ءتيىستى جۇمىستى اتقارىپ جاتقانىن ايتتى.

«بۇل تۇرعىدا بىرنەشە ادام وسى رەەسترگە ەنگىزىلدى. باس پروكۋراتۋرانىڭ ارنايى كوميتەتى وسى ادامدارعا قاتىستى ءتيىستى جۇمىستاردى اتقارىپ جاتىر. ەكىنشىدەن، مينيسترلىك جۇمىسىنا توقتالساق، بىزدە ارنايى وفشورلىق ايماقتاردىڭ ءتىزىمى بەكىتىلگەن. ونداي ايماقتارمەن جۇرگىزىلگەن وپەراتسيالار كۇماندى سانالادى دا، ول جەردە تەكسەرۋ بارىسىندا ترانسفەرلىك باعا بەلگىلەۋ كۇشەيتىلەدى. سونىمەن قاتار، بەلگىلى ءبىر كونۆەنتسيالار بار. جالپى، ەلىمىزدەگى ۆاليۋتالىق رەتتەۋ مەن باقىلاۋ ۇلتتىق بانكتىڭ قۇزىرەتىندە. بىلتىر وزدەرىڭىزدىڭ قولداۋلارىڭىزبەن زاڭعا ءتيىستى وزگەرىستەر ەنگىزىپ، قازىر قارجى مينيسترلىگى وسى ۆاليۋتالىق باقىلاۋعا قوسىمشا ورگان رەتىندە قاتىسىپ وتىر. سەبەبى ۇلتتىق بانكتە تەك قانا مونيتورينگ جۇرگىزىلگەن. نەگىزگى تاۋەكەلدى ايتىپ بەرەيىن. ماسەلەن، قانداي دا ءبىر ەكسپورتتىق-يمپورتتىق وپەراتسيا بويىنشا مامىلە جاسالاتىنى بەلگىلى. ياعني قانداي دا ءبىر مەملەكەتتەن 100 ميلليون دوللارعا ءتيىستى قوندىرعىنى قازاقستان كەلىپ قويۋ كەرەك بولسا، اقشا جىبەرىلگەنىمەن، قوندىرعى جەتكىزىلمەي جاتادى. بۇل تۇرعىدا سونداي جۇزدەگەن شارت جىلدار بويى جاتقان، قاراجات كەتسە دە، ءبىراق قوندىرعى قازاقستاندا قويىلماعان. وسى ماسەلەگە قاتىستى ۇلتتىق بانكتىڭ قۇزىرەتى بولماعان. قازىر قارجى مينيسترلىگى جاعىنان شەتكە شىعارىلعان قاراجات بويىنشا ساراپتاما جاساپ جاتىرمىز»، - دەدى ە. جاماۋبايەۆ.

بۇل رەتتە ول قازىردىڭ وزىندە قارجى مينيسترلىگى 500 ميلليارد تەڭگەگە جۋىق سوماداعى كەلىسىمشارتتار بويىنشا اقپاراتتى قارجىلىق مونيتورينگ اگەنتتىگىنە تاپسىرعانىن ايتتى.

«وسى باعىتتا قانشالىقتى قىلمىس دەركتەرىنىڭ بار ەكەنىن انىقتاۋ كەرەك. قازىر ولار سول فاكتىلەرمەن اينالىسىپ جاتىر. اتاپ ايتقاندا، وسىنداي بارلىق دەرەكتى ساراپتايمىز. بۇعان دەيىن زاڭعا وزگەرىس ەنگىزىلگەن بولاتىن، كەز كەلگەن 50 مىڭ ا ق ش دوللارىنان اساتىن ەكۆيۆالەنتتەگى وپەراتسيالار بويىنشا ۇلتتىق بانك قارجى مينيسترلىگىنە ءتيىستى اقپارات بەرىپ وتىرادى»، - دەدى مينيستر.

بۇدان بۇرىن حابارلانعانداي، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ترانسفەرتتىك باعا بەلگىلەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.

بۇل قۇجات اياسىندا كاپيتالدىڭ شەتەلگە شىعۋىنا توسقاۋىل قويۋدىڭ قوسىمشا قادامدارى ەسكەرىلگەن.

اۆتور

رۋسلان عابباسوۆ