دەپۋتات تۋريزم سالاسىندا ادال باسەكەلەستىك تەتىكتەرىن ەنگىزۋدى سۇرادى

استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات رۋسلان قوجاسبايەۆ تۋريزم سالاسىنداعى ماسەلەنى كوتەردى.

- سيفرلىق تەحنولوگيالار مەن پلاتفورمالىق ەكونوميكانىڭ تەز دامىپ جاتقان كەزەڭىندە ءبىز ءۇشىن ماڭىزدى مىندەت تۇر. ول - يننوۆاتسيا مەن الەۋمەتتىك ادىلەتتىلىكتىڭ، تەحنولوگيا مەن شاعىن بيزنەستىڭ مۇددەلەرى اراسىندا تەپە-تەڭدىكتى ساقتاۋ. بۇگىن مىڭداعان قازاقستاندىق كاسىپكەردى الاڭداتىپ وتىرعان ماسەلەنى كوتەرگىم كەلەدى. بۇل - تۋريزم سالاسى. بۇل جاي عانا بيزنەس ەمەس، بۇل - ادامنىڭ سەزىمى، سەنىمى، ارمانى مەن جوسپارى. ءبىراق ءدال وسى سالادا ءبىز نارىقتى شايقالتىپ جاتقان ءقاۋىپتى وزگەرىستەردى كورىپ وتىرمىز. مەن تۋريستىك اگەنتتىك قاۋىمداستىعىنىڭ وكىلدەرىمەن ءبىرقاتار كەزدەسۋ وتكىزدىم. كاسىپكەرلەر وزدەرىنىڭ بيزنەسىنە قاۋىپ ءتوندىرىپ تۇرعان جاعدايدى ايتتى. بۇل رەتتە بانكتەرمەن ۇلەستەس ءىرى تسيفرلىق پلاتفورمالار نارىققا تەز ەنىپ جاتىر. ولار «پايىزسىز» قارىز دەگەن جەلەۋمەن تۇتىنۋشىلىق نەسيە رەتىندە بەرىلگەن تۋريستىك پاكەتتەردى ءبولىپ-ءبولىپ تولەۋدى ۇسىنادى، - دەدى ر. قوجاسبايەۆ ۇكىمەت باسشىسىنىڭ اتىنا جولداعان ساۋالىندا.

ونىڭ ايتۋىنشا، مۇنداي ۇسىنىستار تارتىمدى جانە تۇتىنۋشىلار سۇرانىسىن ىنتالاندىرادى. جالپى، سيفرلىق تۋرپاكەتتەردىڭ نارىقتىق ۇلەسى جىلدام ءوسىپ كەلەدى جانە «قامقور» قورىنىڭ مالىمەتى بويىنشا ءبىر عانا وپەراتوردىڭ نارىقتاعى ۇلەسى قازىردىڭ وزىندە %50 دان اسىپ جىعىلادى. بۇل ءوز كەزەگىندە كومپانيانىڭ باسىم پوزيتسياسى دەپ تانىلۋى مۇمكىن جانە مۇنداي نارىقتى رەتتەۋ قاجەت.

- سيفرلىق پلاتفورما كليەنتتەرىنىڭ بۇكىل لەگىن ساناۋلى كومپانيا عانا وڭدەيدى. ال قازاقستانداعى شاعىن تۋراگەنتتەر قىزمەت كورسەتۋدىڭ جاڭا جۇيەسىنەن تىس قالىپ وتىر، ياعني ولار تابىسىنان ايىرىلادى… ماسەلەن، شەتەلدە ءتۇرلى جاعداي بولادى. سونىڭ ىشىندە رەيستەردى توقتاتۋ، ۆيزا ەرەجەلەرىن وزگەرتۋ، جەدەل مەديتسينالىق كومەك كورسەتۋ سياقتى وقيعالاردا ەل ازاماتتارى ءوز پروبلەماسىمەن جالعىز قالۋى مۇمكىن. تۋردى ساتقان سيفرلىق پلاتفورما كليەنتتى قولداۋعا قاتىستى جاۋاپكەرشىلىك كوتەرمەيدى، - دەدى دەپۋتات.

ونىڭ سوزىنە قاراعاندا، ادامداردىڭ شەتەلگە ساپارىن قامتىعان تۋريزم نارىعى مونوپوليالىق سيپاتقا يە بولدى. سيفرلىق پلاتفورمالار قارجىلىق رەسۋرستارعا، ماركەتينگكە جانە كليەنتتىك بازاعا قول جەتكىزە الادى. ال ءداستۇرلى اگەنتتىكتەردە جاۋاپكەرشىلىك، سالىق جانە جۇمىسپەن قامتۋ بار. بۇل جاعدايدا باسەكەلەستىك جوعالىپ بارادى.

- ءبىرقاتار تسيفرلىق پلاتفورمار Astana Hub-تا تىركەلگەن جانە سالىقتان بوساتىلعان. ولاردىڭ ءداستۇرلى تۋريستىك كومپانيالارمەن سالىستىرعاندا، ايتارلىقتاي باسەكەلەستىك ارتىقشىلىقتارى بار. بۇل تۇرعىدا ماسەلە تەحنولوگيامەن كۇرەسۋ جونىندە ەمەس. اتاپ ايتقاندا، باسەكەلەستىكتى، اشىقتىقتى جانە نارىقتى قورعاۋ تۋرالى ماسەلەنى كوتەرىپ وتىرمىن. ءبىز بيزنەسكە بىردەي جاعداي جاساۋعا مىندەتتىمىز، - دەدى رۋسلان قوجاسبايەۆ.

وسى ورايدا ول تۋريستىك قىزمەتتەردى نەسيەگە ساتاتىن جانە بانكتەرمەن ۇلەستەس تسيفرلىق پلاتفورمالاردىڭ باسەكەلەستىك، تۇتىنۋشىلاردىڭ قۇقىقتارىن قورعاۋ جانە كاسىپكەرلىك تۋرالى زاڭناماعا سايكەستىگىنە ۆەدومستۆوارالىق تالداۋ جۇرگىزۋدى سۇرادى. سونىمەن قاتار، نارىق سۋبەكتىلەرى ءۇشىن ادال باسەكەلەستىك جاساۋ ماقساتىندا تۋريزم نارىعىن رەتتەۋ شارالارىن قابىلداۋ كەرەك ەكەنىن ايتتى.

بۇدان بۇرىن حابارلانعانداي، ەلىمىزدە اگرارلىق تۋريزم قىزمەتىنىڭ ەرەجەلەرى ازىرلەنىپ جاتىر.