دەپۋتات تالعارداعى جاس ءوسپىرىمنىڭ ءولىمى جايىندا: ورگاندار قۇقىقتىق باعاسىن تەز ارادا بەرۋى قاجەت

استانا. KAZINFORM - ءماجىلىس دەپۋتاتى نارتاي سارسەنعاليەۆ تالعار اۋدانىندا 16 جاستاعى ازاماتتى ولتىرگەن قىلمىسكەرلەردى زاڭعا سايكەس جازالاۋدى تالاپ ەتتى.

وسى ورايدا ول باس پروكۋرور بەرىك اسىلوۆتىڭ، ىشكى ىستەر ءمينيسترى ەرجان سادەنوۆتىڭ، وقۋ-اعارتۋ ءمينيسترى عاني بەيسەمبايەۆتىڭ اتىنا دەپۋتاتتىق ساۋال جولدادى.

«جۇرتتىڭ جاعاسىن ۇستاتقان جاعداي الماتى وبلىسى تالعار اۋدانىندا بولدى. قوعامدى قامىقتىراتىنى سول، سوڭعى ۋاقىتتا جاسوسپىرىمدەردىڭ ءبىر-ءبىرىن اياۋسىز سوققىعا جىعۋى، قورلاۋى، ەڭ سوراقىسى ارتى ولىمگە اپاراتىن قايعىلى جايتتار جيىلەپ كەتتى. كەشە عانا تالعارداعى دۇكەندە بولعان جاعداي ەسىمىزدى ەكەۋ، ءتۇسىمىزدى تورتەۋ قىلدى. تالعارداعى تەكسىزدەردىڭ تەنتەكتىگىنەن 16 جاسار بالا، ءبىر اۋلەتتىڭ ايماڭداي ازاماتى - شەرزات كوز جۇمدى. اكەسى مەن باۋىرى سوققىعا جىعىلدى. بالانىڭ اجالىنا نە سەبەپ دەگەن سۇراق تۋادى. سونداعىسى - ءبىر بوتەلكە الكوگول. وسىندايدا «ءبىزدىڭ قوعام قاۋىپسىز بە ءوزى، زاڭ كىمنىڭ جاعىندا؟» دەگەن سۇراق تۋادى. سەبەبى، شەرزاتتىڭ اكەسى تەرگەۋدىڭ تۇرالاپ تۇرعانىن، اۋدانداعى قۇزىرلى ورىن وكىلدەرىنىڭ ءىستى سوزباققا سالىپ جاتقانىن، قىلمىسكەردى قويىپ بالاسىنان ايرىلعان وتباسىن تۇندە تەرگەۋگە شاقىرىپ الىپ، وكتەم سويلەگەنىن ايتىپ بەينەۇندەۋ جاسادى. ەل ورە تۇرەگەلدى، ارتىنشا «ءىستى ىشكى ىستەر ءمينيسترى ءوز باقىلاۋىنا الدى» دەگەن اقپارات تارادى. قوعامدى قورقىتاتىنى وسى، قىلمىسكەردى جازالاۋ ءۇشىن، ادىلدىككە جەتۋ ءۇشىن بەينەۇندەۋ جاساپ، ءار ءىستى ءبىر ءمينيستردىڭ باقىلاۋعا العانىن كۇتىپ وتىرۋ كەرەك پە؟! نەگە جەرگىلىكتى جەردەگى قۇقىق قورعاۋ ورىندارى دەرەۋ ءىستىڭ اق-قاراسىن انىقتاپ، ءادىل تەرگەۋ وتكىزبەيدى؟»، - دەدى ن. سارسەنعاليەۆ.

بۇل تۇرعىدا دەپۋتات ءوزىنىڭ بىرنەشە ۇسىنىسىن جاريالادى.

بىرىنشىدەن، الماتى وبلىسى تالعار اۋدانىندا 16 جاسار ازاماتتى ولتىرگەن، جاقىندارىن اياۋسىز ساباعان قىلمىسكەرلەر قاماۋعا الىنىپ، ولارعا زاڭعا سايكەس ءادىل جازا بەرىلۋى ءتيىس.

«ەكىنشىدەن، اتالعان ءىس بويىنشا بارلىق قۇقىق قورعاۋ ورگاندارى تىزە قوسىپ، وقيعانىڭ زاڭدى قۇقىقتىق باعاسىن تەز ارادا بەرۋى قاجەت. ۇشىنشىدەن، ءبىلىم بەرۋ ۇيىمدارىندا «قۇقىق نەگىزدەرى» اتتى ءپان بار. ءبىراق ونىڭ ساپاسىنا قاتىستى سىن كوپ. اتالعان ءپاننىڭ باعدارلاماسىن قايتا جاساپ، بالالار ومىردە بەتپە-بەت كەلەتىن جايتتار مەن ومىردەن الىنعان ناقتى كەيستەرگە سۇيەنىپ وقىتۋ كەرەك. تورتىنشىدەن، مەملەكەت باسشىسى ۇسىنعان زاڭ مەن ءتارتىپ قاعيداتىنا سۇيەنە وتىرىپ، ەلدەگى قۇقىق قورعاۋ جۇيەسىنە، پوليتسياعا دەگەن حالىق سەنىمىن كۇشەيتۋ، قوعام كوزقاراسىن وزگەرتۋ بويىنشا جالپى مەملەكەتتىك دەڭگەيدە كەشەندى شارالار قابىلداۋ قاجەت»، - دەدى ول.

ەسكە سالايىق، بۇعان دەيىن 4-قازان كۇنى تالعار قالاسىنداعى توبەلەستەن جاس ءوسپىرىم قايتىس بولعانىن جازعانبىز.

الماتى وبلىسىنىڭ پوليتسيا دەپارتامەنتى تالعار قالاسىندا 16 جاستاعى جاس وسپىرىمنىڭ ولىمىنە قاتىسى بار كۇدىكتىلەردىڭ قونايەۆ قالاسىنا جەتكىزىلگەنىن حابارلادى.

اۆتور

رۋسلان عابباسوۆ