دەپۋتات ستاتيستيكا سالاسىنداعى كەمشىلىكتى اتادى

استانا. KAZINFORM - رەسمي جانە ۆەدومستۆولىق ستاتيستيكا ءبىر-بىرىنە قايشى كەلەتىن جاعدايلار ءجيى كەزدەسەدى. بۇل تۋرالى ءماجىلىس دەپۋتاتى تاتيانا ساۆەليەۆا ءمالىم ەتتى.

- جالپى سيپاتتاعى ترانسفەرتتەردى ەسەپتەۋدىڭ جاڭا ادىستەمەسىن ەنگىزۋدەگى نەگىزگى ماسەلەنىڭ ءبىرى - بارلىق ەسەپتەۋلەر نەگىز بولاتىن سەنىمدى ستاتيستيكالىق بازانىڭ جوقتىعى. رەسمي جانە ۆەدومستۆولىق ستاتيستيكا بىرىكتىرىلمەگەن جانە ءبىر-بىرىنە ءجيى قايشى كەلىپ جاتادى. نەگىزگى كورسەتكىشتەر - جۇمىسسىزدىق دەڭگەيى، تۇتىنۋ باعالارىنىڭ يندەكسى، ءومىر ساپاسىنىڭ يندەكسى قىسقارتىلعان جانە ءادىسنامالىق تۇرعىدان بۇرمالانعان. سوندىقتان باستى باعدار بەرەتىن قىزمەتىن ءتيىستى دەڭگەيدە اتقارماي وتىر، - دەدى ت. ساۆەليەۆا پارلامەنت ماجىلىسىندە جالپى سيپاتتاعى ترانسفەرت تاقىرىبىنا ارنالعان ۇكىمەت ساعاتىندا.

وسى ورايدا ول ەلىمىزدەگى مال سانىنىڭ ستاتيستيكاسىنا قاتىستى كەمشىلىكتەردى ەسكە سالدى.

- ناقتى مىسال رەتىندە اۋىل شارۋاشىلىعىنىڭ ستاتيستيكاسىن كەلتىرۋگە بولادى. 5 ميلليونعا جۋىق مال باسى تۋرالى دەرەكتىڭ بۇرمالانعانىن ارنايى كوميسسيا مەملەكەت باسشىسى كوتەرگەن ماسەلەدەن كەيىن اشكەرەلەدى. بۇل جاعداي مەملەكەتتىك ساياساتتى جوسپارلاۋ جانە باعالاۋ كەزىندە پايدالانىلاتىن دەرەكتەردى قالىپتاستىرۋ تاسىلدەرىن قايتا قاراۋ قاجەت ەكەنىن بايقاتىپ وتىر، - دەدى دەپۋتات.

ونىڭ پايىمىنشا، شىنايى ەمەس ستاتيستيكا ناقتى ترانسفەرتتەردىڭ قالىپتاسۋىنا تىكەلەي كەدەرگى كەلتىرەدى. بۇل تۇرعىدا ءومىر ءسۇرۋ دەڭگەيىنىڭ تومەندەتىلگەن كورسەتكىشى جەتكىلىكسىز قارجىلاندىرۋعا اكەلەدى.

- ۇكىمەت ساعاتىنا دايىندىق بارىسىندا بۇل ماسەلە جوعارى اۋديتورلىق پالاتامەن (ج ا پ) بولەك تالقىلاندى. ءماجىلىستىڭ قارجى جانە بيۋدجەت كوميتەتى ستاتيستيكالىق دەرەكتەر بازاسىن قالىپتاستىرۋ ادىستەمەلەرىن قايتا قاراۋ، سونداي-اق قاراپايىم ەسەپ بەرۋ ستاتيستيكاسىنان تسيفرلىق قۇرالدار مەن دەرەكتەردى باسقارۋدىڭ زاماناۋي تاسىلدەرىنە نەگىزدەلگەن اناليتيكاعا كوشۋ قاجەتتىگى تۋرالى جاپ ۇسىنىسىن تولىعىمەن قولدايدى، - دەدى تاتيانا ساۆەليەۆا.

ەسكە سالساق، بىلتىر كۇزدە قازاقستاندا مال سانى عانا ەمەس، قۇس سانى دا قولدان كوبەيتىلىپ كەلگەنىن جازعان ەدىك.

بۇدان بۇرىن حابارلانعانداي، پارلامەنت ماجىلىسىندە «جالپى سيپاتتاعى ترانسفەرتتەردى ايقىنداۋ جونىندەگى جاڭا تاسىلدەر» تاقىرىبىندا ۇكىمەت ساعاتى ءوتىپ جاتىر.

اۆتور

رۋسلان عابباسوۆ