دەپۋتات س ق- فارماتسيانى سىنعا الدى: بۇل ۇيىمدى نە ءۇشىن قۇردىق

استانا. KAZINFORM – س ق- فارماتسيانىڭ ءوز لوگيستيكالىق ينفراقۇرىلىمى جوق. بۇل تۋرالى پارلامەنت ءماجىلىسىنىڭ جالپى وتىرىسىندا دەپۋتات اسحات ايماعامبەتوۆ ايتتى.

- س ق- فارماتسياعا توقتالساق، ءبىرىڭعاي ديستريبيۋتوردىڭ ءوز لوگيستيكالىق ينفراقۇرىلىمى جوق. لوگيستيكانىڭ 90 پايىزى ءۇش كومپانيانىڭ قولىندا. وسىنداي مونوپوليزاتسيا لوگيستيكالىق شىعىنداردىڭ 1,5 ەسە وسۋىنە ىقپال ەتتى. س ق- فارماتسيانىڭ ۇستەمە باعاسى، كوميسسياسى دەپ تە ايتۋعا بولادى – باقانداي %7. بۇل قوسىمشا سالىق سياقتى، ءبىر بولىگىن ءوز شىعىندارىنا پايدالانسا، ءبىر بولىگى پايدا رەتىندە، ءبىر بولىگى ديۆيدەند رەتىندە بيۋدجەتكە قايتارىلادى. پارادوكس، - دەدى ا. ايماعامبەتوۆ پالاتا وتىرىسىندا ءدارى-دارمەكپەن قامتاماسىز ەتۋ جۇيەسىنە جۇرگىزىلگەن مەملەكەتتىك اۋديت ناتيجەسىن تالقىلاۋ كەزىندە.

ونىڭ ايتۋىنشا، ءبىرىڭعاي ديستريبيۋتور 491 ميلليارد تەڭگەگە ساتىپ الۋ جۇرگىزدى. ءبىراق ونىڭ باسىم بولىگى تىكەلەي زاۋىتتان ەمەس، جەرگىلىكتى ديستريبيۋتورلار ارقىلى ساتىپ الىنادى.

- سوندا ءبىز بۇل ۇيىمدى نە ءۇشىن قۇردىق؟ نەلىكتەن ول زاۋىتتاردان تىكەلەي ساتىپ المايدى؟ سۇراق كوپ. ءبىر پرەپاراتتار قويمالاردا ءشىرىپ، ەسەپتەن شىعارىلىپ جاتقاندا، كەيبىر ومىرلىك ماڭىزى بار دارىلەر بولماعان. 45 مىڭ پاتسيەنت ءدارىسىز قالعان. انىقتاعان شىعىندار مەن ىسىراپتار 3,7 ميلليارد تەڭگەدەن استام. ال ىقتيمال شىعىندار 21 ميلليارد تەڭگەدەن استام، - دەدى دەپۋتات.

بۇدان بۇرىن حابارلانعانداي، ق ر جوعارى اۋديتورلىق پالاتاسىنىڭ ءتوراعاسى ءاليحان سمايىلوۆ قازاقستاندا ازاماتتاردى ءدارى-دارمەكپەن قامتاماسىز ەتۋ جۇيەسىنە جۇرگىزىلگەن مەملەكەتتىك اۋديت ناتيجەسىن جاريالادى.

سونىمەن قاتار ءماجىلىسىنىڭ جالپى وتىرىسىندا دەپۋتات اسحات ايماعامبەتوۆ قازاقستاندا ءدارىنى تىركەۋ ءۇشىن وتە كۇردەلى بيۋروكراتيالىق راسىمدەردەن ءوتۋ كەرەك ەكەنىن ايتىپ، وسى سالانى سىنعا الدى.

اۆتور

رۋسلان عابباسوۆ