دەپۋتات قازاقستاندىق جۋرناليسكە جاسالعان قاستاندىققا كىمنىڭ قاتىسى بولۋى مۇمكىن ەكەنىن ايتتى
استانا. KAZINFORM - ءماجىلىس دەپۋتاتى ايدوس سارىم پارلامەنت پالاتالارىنىڭ بىرلەسكەن وتىرىسىنان كەيىن ب ا ق وكىلدەرىنىڭ سۇراعىنا بەرگەن جاۋابىندا ۋكرايناداعى قازاقستاندىق جۋرناليست ايدوس سادىقوۆقا جاسالعان قاستاندىقتىڭ ارتىندا كىمدەر تۇرۋى مۇمكىن ەكەنىن ايتتى.
«بۇل جەردە ەكى نارسەگە نازار اۋدارۋ كەرەك سياقتى. بىرىنشىدەن، قازاقستان تارابى ۋكراينانىڭ كۇشتىك قۇرىلىمدارىمەن جانە قاجەت بولسا ينتەرپول سياقتى بەلسەندى، بەدەلدى قوعامدىق تەرگەۋ ورگاندارىمەن جۇمىس ىستەۋگە ءازىر ەكەنىن پرەزيدەنت تە ايتتى. مەنىڭ ويىمشا، ەموتسيونالدىق اڭگىمەلەر ارتىقتاۋ. ەشقانداي دالەلسىز ءبىر ادامعا نەمەسە ءبىر ينستيتۋتقا نەمەسە مەملەكەتكە جالا جابۋ - ۇلكەن اقىلدىڭ شارۋاسى ەمەس»، - دەدى دەپۋتات.
سونداي-اق ول جىلدار بويى «باسە» ارناسىن كورىپ كەلە جاتقانىن ايتتى.
«ەكىنشىدەن، ءوز باسىم دا بۇل ءىس تەز اشىلاتىن قىلمىس شىعار، كەم دەگەندە اتقان ادامداردى تابادى دەپ ويلاعانمىن. بۇل زاماندا، بەينەكامەرا بار، ينتەرنەت بار، تەلەفون بار دەگەندەي، تەز تابۋعا بولادى عوي. ەندىگى ماسەلە كىم ەكەنىن تابۋدا. مەن تالاي جىلدار بويى وسى كانالدى كورىپ كەلگەن ادام رەتىندە ايتسام، تالاي ادامداردىڭ بەدەلىنە دە قاتىستى، مەكەمەلەرگە دە قاتىستى قۇجاتتار شىعىپ جاتىر. ولاردىڭ دا قاتىسى بولۋى مۇمكىن. بۇگىنگى قازاقستاننىڭ ۇپايىن جىققىسى كەلەتىندە كۇشتەر جوق ەمەس. سوندىقتان تەرگەۋدىڭ ناتيجەسىن كۇتەيىك»، - دەدى ايدوس سارىم.
پرەزيدەنت كەڭەسشىسى - باسپا ءسوز حاتشىسى بەرىك ءۋالي مەملەكەت باسشىسىنىڭ اتالعان وقيعانى تەرگەۋ امالدارىن ءجىتى باقىلاپ وتىرعانىن ايتقان ەدى.
