دەپۋتات مينيسترگە: سەناتور كەزىڭىزدە ءوزىڭىز سىناعان بۇيرىقتى ءالى وزگەرتپەي وتىرسىز

استانا. KAZINFORM - ءماجىلىس دەپۋتاتى باقىتجان بازاربەك مىندەتتى مەديتسينالىق ساقتاندىرۋ قورىنىڭ قاراجاتىن جىمقىرۋعا جول اشاتىن ىشكى قۇجاتتاردى اتاپ، دەنساۋلىق ساقتاۋ ءمينيسترى اقمارال ءالنازاروۆانى وسى بۇيرىقتاردى وزگەرتپەي جۇرگەنى ءۇشىن سىنادى.

- مىندەتتى مەديتسينالىق ساقتاندىرۋ قورى تاپسىراتىن قارجى ەسەبى قالاي نەگە جالپى قارجى ەسەبىنەن تىس قالىپ وتىر؟ وسىلايشا اتالعان قور زاڭ بويىنشا قارجى ەسەبىن جۇرگىزبەي وتىرعان بولىپ شىعادى. قولدان قوسىپ جازۋ، قارجى اقاۋلارى سياقتى بۇركەمەلەنگەن قارجى جىمقىرۋ فاكتىلەرى وسى تۇستان تۋىنداپ جاتىر. بۇل - مەنىڭ كوزقاراسىم ەمەس، جوعارى اۋديتورلىق پالاتانىڭ قورىتىندىسى. اۋديتورلىق پالاتا دەنساۋلىق ساقتاۋ مينيستيرلىگىنىڭ 2017 -جىلدىڭ 16-تامىزىنداعى بۇيىرىعىنا سىلتەمە جاسايدى. بۇل بۇيرىق زاڭعا قايشى. ءسىز مينيستر بولىپ اقپان ايىندا (2024 -جىلى - رەد. ) كەلگەن ەدىڭىز. سودان بەرى نە وسى بۇيرىقتىڭ كۇشىن جويمادىڭىز، نە وزگەرتپەدىڭىز، - دەدى ول ءماجىلىستىڭ جالپى وتىرىسىندا.

ايتۋىنشا، ۆەدومستۆونىڭ 321-بۇيرىعى دا سالاداعى باسسىزدىقتاردىڭ كوزى بولىپ وتىر.

- الدىڭىزدا مىندەتتى مەديتسينالىق ساقتاندىرۋ قورىنداعى سىبايلاس جەمقورلىقتىڭ قاينار كوزى تۇر. بۇل - 2020 -جىلدىڭ 24-جەلتوقسانىنداعى 321-بۇيرىق. قۇجات سىبايلاس جەمقورلىق تاۋەكەلى مەن جىمقىرۋعا جول اشىپ تۇر. بۇل بۇيرىقتىڭ ءسىز قابىلداماعانىڭىزدى بىلەمىن. ءبىراق 6-اقپاندا (2024 ج. - رەد) مينيستر بولىپ كەلدىڭىز عوي. بۇيرىققا تۇزەتۋ نەمەسە وزگەرىس ەنگىزۋىڭىز كەرەك ەدى. ونى ىستەيتىن ءبىزدىڭ قۇزىرەتىمىز جوق. مينيستر رەتىندەگى قۇزىرەتىڭىز بۇل. ونىڭ ۇستىنە ءسىز سەناتور بولىپ جۇرگەندە ءدال وسى بۇيرىقتى ءجيى سىنايتىن ەدىڭىز، - دەگەن دەپۋتات ءمينيستردىڭ اۋزىنان شىققان كەيبىر مالىمەتتەردىڭ راستىعىنا كۇمان كەلتىردى.

ءوز كەزەگىندە ءماجىلىس دەپۋتاتى مينيستردەن بۇيرىقتىڭ كۇشى قاشان جويىلاتىنىن سۇرادى.

- مۇرات ابەنوۆتىڭ سۇراعىنا بەرگەن جاۋابىڭىزدا زاڭ بۇزعانداردى ليتسەنزياسىنان ايىرىپ، ماتەريالداردى ءتيىستى ورگاندارعا جولداپ جاتقاندارىڭىزدى ايتتىڭىز. مەنىڭ قولىمداعى اقپارات بويىنشا، جوعارى اۋديتورلىق پالاتا قورىتىندىسىندا زاڭ تالابىن ورەسكەل بۇزعان ونداعان ج ش س بار. سولاردىڭ ەشبىرى ليتسەنزياسىنان ايىرىلماعان. قاتاڭ شارا قولدانىلماعان. بۇل بۇيرىقتىڭ كۇشىن قاشان جويماقشىسىز، - دەپ سۇرادى باقىتجان بازاربەك.

مينيستر دەپۋتات ايتقان بۇيرىقتىڭ جويىلمايتىنىن قاداپ ايتتى.

- ءسىز كوتەرىپ وتىرعان پروبلەما - شىنىمەن دە جۇيەلىك پروبلەما. ءبىز دە جۇيەنىڭ اشىق بولعانىنا مۇددەلىمىز. قوردىڭ دا، مەديتسينالىق ۇيىمداردىڭ اشىق ەسەپ بەرىپ وتىرعانى بىزگە دە كەرەك. 321-بۇيىرىققا كەلسەك، ونىڭ كۇشىن جويمايمىز. 1-شىلدەگە دەيىن بۇيرىققا وزگەرىس ەنگىزەمىز. ءبىز ءسىز ايتىپ وتىرعان اقاۋلاردى كورىپ وتىرمىز. ول اقاۋلار تۋرالى ماتەريالداردى ءتيىستى ورگاندارعا جولدايمىز. قارجى ەسەبىنەن تىس قالعان قاراجاتقا كەلسەك، ءسىز ايتقان ەكىنشى بۇيرىقتىڭ ماسەلەسىن دە وسى زاڭ جوباسىنىڭ ەكىنشى وقىلىمىنا دەيىن ءبىر شەشىمگە كەلەمىز دەپ ويلايمىن، - دەدى مينيستر.

سونداي-اق ول جوعارى اۋديتورلىق پالاتانىڭ قورىتىندىسىندا كورسەتىلگەن كەمشىلىكتەر بويىنشا باس پروكۋراتۋرا، وبلىستىق پروكۋراتۋرالار سياقتى ءتيىستى ورگاندارعا ماتەريال جولداعانىن قايتالاپ ايتتى.

- ءبىزدىڭ تاراپتان كەرى بايلانىس ىلعي دا بەلسەندى بولماعان شىعار. ءبىراق بۇگىندە بۇل ماسەلەنى باقىلاۋعا الدىق، - دەدى اقمارال ءالنازاروۆا.

بۇعان دەيىن تاعى ءبىر ءماجىلىس دەپۋتاتى اسحات ايماعامبەتوۆ بىلتىر ەلدىڭ دەنساۋلىق ساقتاۋ جۇيەسى مەملەكەتتەن شامامەن 500 ميلليارد تەڭگە كەم العانىن ءمالىم ەتكەن ەدى.

اۆتور

ەسىمجان ناقتىباي