دەپۋتات مۇگەدەكتىگى بار ازاماتتارعا زەينەتاقى مەن جاردەماقىنى قوسىپ تولەۋدى ۇسىندى
استانا. KAZINFORM - ءماجىلىس دەپۋتاتى تاڭساۋلە سەرىكوۆ ۆيتسە-پرەمەر تامارا دۇيسەنوۆاعا جولداعان دەپۋتاتتىق ساۋالىندا مۇگەدەكتىگى بار ازاماتتارعا زەينەتاقى مەن جاردەماقىنى قوسا تولەۋدى ۇسىندى.
«قازىر مۇگەدەكتىگى بار جاندار زەينەت جاسىنا كەلگەندە نە زەينەتاقىنى، نە جاردەماقىنى تاڭداۋعا ءماجبۇر. ەڭبەك ءوتىلى 1998 -جىلدان باستالاتىن مۇگەدەك ازاماتتارعا زەينەتكە شىققاندا تەك زەينەتاقى قورىندا جينالعان قاراجات قانا ءبولىنىپ بەرىلەدى. بۇل - قورعا قاراجات اۋدارمايتىن مۇگەدەك جان ەشتەڭەسىز قالادى دەگەن ءسوز. ايىنا 95 مىڭ تەڭگە جاردەماقى الاتىن مۇگەدەك نەسىن اۋدارادى؟» - دەيدى دەپۋتات.
ونىڭ مالىمەتى بويىنشا. قازىر ءبىرىنشى توپتاعى مۇگەدەكتىگى بار ازاماتتار 95496 تەڭگە، ەكىنشى توپ 79435 تەڭگە، ءۇشىنشى توپتاعى مۇگەدەكتەر 69886 تەڭگە جاردەماقى الادى.
«سول سەبەپتى، جاردەماقى مەن زەينەتاقىنى قوسا بەرۋ كەرەك. ونداي بولماعان جاعدايدا ەڭبەككە قابىلەتتى مۇگەدەكتەردى جۇمىسپەن قامتۋ قاجەت. ەگەر بۇل ماسەلەنىڭ وڭ شەشىمى تابىلماسا، ءبىر ميلليونعا جۋىق ازامات اۆتوماتتى تۇردە كەدەيشىلىك شەگىنە ەنەتىن بولادى. وسى ايتىلعانداردى ەسكەرە كەلە مۇگەدەكتىگى بار تۇلعالار زەينەت جاسىنا جەتكەندە دە جاردەماقىسىن توقتاتپاي قوسا بەرۋدىڭ جۇيەسىن قالىپتاستىرۋ كەرەك. ول ءۇشىن الەۋمەتتىك كودەكسكە وزگەرتۋلەر مەن تولىقتىرۋلار ەنگىزۋ قاجەت. مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە تۇرمىس ساپاسىن جاقسارتۋ جونىندەگى ۇلتتىق جوسپارى 2025 -جىلدان كەيىن دە جالعاسىن تابۋ كەرەك»، - دەيدى تاڭساۋلە سەرىكوۆ.
وسىعان دەيىن 2024 -جىلى مۇگەدەكتىگى بار ادامدار پورتال ارقىلى 777 مىڭنان استام قىزمەت تۇرىنە جۇگىنگەنى تۋرالى جازدىق.
اۆتور
ەسىمجان ناقتىباي
