دەپۋتات جاستار قاتىگەزدىگىنە نە اسەر ەتىپ وتىرعانىن ايتتى
استانا. KAZINFORM - بۇگىن سەناتتىڭ جالپى وتىرىسىندا سەناتور دارحان قىدىرالى ەلىمىزدەگى جاستار اراسىنداعى زورلىق-زومبىلىق پەن قىلمىستىڭ ءوسىپ كەلە جاتقانى تۋرالى دەپۋتاتتىق ساۋال جولدادى.
سەناتوردىڭ ايتۋىنشا، بيىلعى توعىز ايدىڭ كورسەتكىشى بويىنشا كامەلەتكە تولماعاندار اراسىنداعى قىلمىس سولتۇستىك قازاقستان، پاۆلودار، ۇلىتاۋ، اقتوبە، اتىراۋ، ماڭعىستاۋ وبلىستارى مەن استانا، الماتى، شىمكەنت قالالارىندا ارتا تۇسكەن.
دەپۋتات جاستار اراسىنداعى پروبلەمالار بىزدە عانا ەمەس، جالپى الەم جۇرتشىلىعىنىڭ الاڭداتىپ وتىرعانىن ايتتى. سوندىقتان دامىعان ەلدەردە جاستار، جاڭا ۇرپاق تۋرالى اۋقىمدى زەرتتەۋلەر جۇرگىزىلەدى. ەلىمىزدە بۇل تاقىرىپ عالىمدار نازارىنان تىس قالىپ جاتىر.
«ماسس-مەدياداعى باسىم كۇش كۋلتى، تانىمال سەريالدار مەن باسقا دا فورمالار ارقىلى اگرەسسيانىڭ ناسيحاتتالۋى قاتىگەزدىكتى ورشىتە تۇسەتىنى ايان. الەۋمەتتىك جەلىلەر ارقىلى كەڭ تارالعان ويىندار جاستاردىڭ تانىمى مەن تالعامىن قالىپتاستىرادى. سونىمەن قاتار اتا-انانىڭ مەيرىمىن سەزىنبەۋ، وتباسىداعى ءتۇرلى كيكىلجىڭ مەن تراۆما، ءبىلىم وشاقتارى مەن تاربيە ورىندارىندا جاستارعا سوتسياليزاتسيا مودەلىن ۇسىنا الماۋ سياقتى سەبەپتەردى دە جوققا شىعارا المايمىز. تالىمگەردىڭ ايلىعى تومەن، سىنىپ جەتەكشىلىگىنە تولەنەتىن اقى از. ورتاشا 10 مەكتەپكە 1 يسپەكتوردان عانا كەلەدى»، - دەدى د. قىدىرالى ۇكىمەت باسشىسى ولجاس بەكتەنوۆتىڭ اتىنا جولداعان ساۋالىندا.
سەناتور جاستاردىڭ پروبلەماسى ءارتۇرلى مينيسترلىكتەر قۇزىرەتىنە ءبولىنىپ كەتكەنىن، ءبىراق سالاعا جاۋاپتى جاستار كوميتەتىنىڭ وڭىرلەردە تىكەلەي قۇرىلىمى جوق ەكەنىن اتاپ ءوتتى. كەيبىر سالالاردا بىرنەشە ادام عانا جاستار ساياساتىمەن اينالىسادى، بۇل تۋىنداعان ماسەلەنى وڭ شەشۋگە مۇمكىندىك بەرمەيدى. جالاقى تومەن بولعاندىقتان، جاستار رەسۋرستىق ورتالىقتارىندا بىلىكتى كادرلار تۇراقتامايدى.
«زاڭدار مەن باعدارلامالار قابىلدانىپ جاتىر. اتقارىلىپ جاتقان ىستەر دە از ەمەس. دەسەك تە بۇل ۇلت بولىپ ويلاناتىن وزەكتى تاقىرىپ. جاستار ساياساتى بويىنشا باسقارمالاردى بارلىق وڭىرلەردە قايتا قۇرۋ ماڭىزدى. جاستاردىڭ رەسۋرستىق ورتالىقتارىن جاقسارتۋ كەرەك جانە ايماقتاردا كوميۋنيتي ورتالىقتارىن اشۋ كەرەك. ورتالىق جانە ايماقتىق اتقارۋشى ورگانداردىڭ جۇمىسىن جۇيەلەۋ ءۇشىن وتباسى جانە جاستار ءىسى جونىندەگى كوميتەتتىڭ قۇزىرەتىن كۇشەيتۋ قاجەت»، - دەدى دارحان قىدىرالى.
