دەپۋتات جاساندى ينتەللەكت تۋرالى: رۋحاني جاعىنان قاۋىپ-قاتەر بار

استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات اناس باققوجايەۆ جاساندى ينتەللەكتىنى مەكتەپتە جانە جوعارى ءبىلىم سالاسىندا پايدالانۋ كەزىندە باقىلاۋدى كۇشەيتۋدى سۇرادى.

- مەن جاساندى ينتەللەكتىگە قارسى ەمەسپىن. دەگەنمەن، بۇعان دەيىن ادامزاتقا رۋحاني جاعىنان كەلۋى مۇمكىن قاۋىپ-قاتەر تۋرالى ايتقان ەدىم. مىسالى، مۇعالىم ءۇي تاپسىرماسىن جاساۋ ءۇشىن جاساندى ينتەللەكتىنى پادالانىپ، سۇراقتارىن دايىنداپ قويدى دەلىك. ۇيىنە كەلگەن وقۋشىلار دا ول تاپسىرماعا جاساندى ينتەللەكتى ارقىلى جاۋابىن شىعارىپ الادى. ماگيستراتۋراعا تۇسكەن جاستار دا ءدال سولاي ارەكەت ەتەدى. سوندا ءبىز كىم بولدىق؟! قازىر بالالار مەن جاستاردىڭ سوزدىك قورى ناشارلاعان. رۋحاني جاعىن، ءبىلىم مەن عىلىمدى قالاي قورعايمىز؟ اتالعان زاڭ جوباسىندا ونداي نورمالاردى كورمەدىم. مەكتەپتەر مەن جوعارى ءبىلىم سالاسىندا وسى باعىتتاعى باقىلاۋدى نەگە كۇشەيتپەيمىز؟! جاساندى ينتەللەكتىنى قوسىمشا قۇرال رەتىندە قولدانۋعا بولادى، ءبىراق ونى پايدالانۋ مادەنيەتىن قالىپتاستىرۋ كەرەك، - دەدى ا. باققاوجايەۆ پارلامەنت ماجىلىسىندە جاساندى ينتەللەكت تۋرالى زاڭ جوباسىن تالقىلاۋ كەزىندە.

ايتا كەتەيىك، بۇگىن ماجىلىستە جاساندى ينتەللەكت تۋرالى زاڭ ءبىرىنشى وقىلىمدا تالقىلانىپ جاتىر.

ەسكە سالساق، جاقىندا ءماجىلىس دەپۋتاتى داۋلەت مۇقايەۆ مەكتەپ وقۋشىلارىنا جاساندى ينتەللەكتىنى پايدالانۋعا شەكتەۋ ەنگىزۋدى ۇسىندى.