دەپۋتات ءابيبا ءابۋجاقىنوۆاعا كولىك سىيلادى
استانا. KAZINFORM - پاريج وليمپياداسىندا دزيۋدودان ايەلدەر اراسىندا 48 كەلى سالماقتا ەل نامىسىن قورعاعان ءابيبا ءابۋجاقىنوۆاعا دەپۋتات ايداربەك حودجانازاروۆ كولىك سىيلادى. بۇل تۋرالى ءابيبا ءوزىنىڭ الەۋمەتتىك جەلىدەگى پاراقشاسىنا جازدى.
سپورتشىعا تەمىر تۇلپار تابىستالعان ءساتتى ءماجىلىس دەپۋتاتى ايداربەك حودجانازاروۆ تا الەۋمەتتىك جەلىدەگى پاراقشاسىندا جاريالادى.
«كوپ ءسوزدىڭ قاجەتى جوق دەپ ويلايمىن»، - دەپ جازدى ءابيبا ءابۋجاقىنوۆا الەۋمەتتىك جەلىگە.
ەسكە سالا كەتەيىك، بۇعان دەيىن ايداربەك حودجانازاروۆ وليمپيادادا جەڭىلىپ قالعان ءابيبا ءابۋجاقىنوۆاعا سىياقى بەرەتىنىن ايتقان بولاتىن.
«تۇنىمەن دوڭبەكشىپ ۇيىقتاي المادىم. وعان سەبەپ - ءابيبا قارىنداسىمنىڭ كوز جاسى. بۇل نامىستىڭ كوز جاسى. بۇل - تەكتىلىكتىڭ بەلگىسى. بۇل - ۇلكەن تاربيەنىڭ ۇلگىسى! قىسقاسى، ءابيبا قىزىمىزعا ءوز اتىمنان ارنايى سىياقى بەرەمىن. پاريجدە قازاقستاننىڭ ابىرويىن قورعايمىن دەپ بارىن سالدى. جاراقات السا دا قايتقان جوق. وسىنداي ەڭبەكتى باعالاۋ كەرەك. وسىنداي پاتريوتتىقتى ناسيحاتتاۋ كەرەك»،- دەپ جازعان ەدى حودجانازاروۆ.
ايتا كەتەيىك، 2024 -جىلعى جازعى وليمپيادا ويىندارىنىڭ جابىلۋ سالتاناتى تامىزدىڭ 11-ىنەن 12-سىنە قاراعان ءتۇنى، استانا ۋاقىتىمەن ساعات 00.00-دە باستالادى. ال Jibek Joly ارناسى ازىرلەگەن تىكەلەي ەفير ساعات 22.30-دا باستالادى.
تەلەارنا ستۋدياسىنا سيدنەي وليمپياداسىنىڭ كۇمىس جۇلدەگەرى يسلام بايرامۋكوۆ، پاريج وليمپياداسىنىڭ قاتىسۋشىسى، دزيۋدوشى ءابيبا ءابۋجاقىنوۆا، اتلانت وليمپياداسىنىڭ چەمپيونى، گرەك- ريم كۇرەسىنەن ۇلتتىق قۇرامانىڭ باس باپكەرى يۋريي مەلنيچەنكو شاقىرىلىپ وتىر.
اۆتور
باقىتگۇل اباي قىزى
