دەپۋتات اسكەري كافەدرالارداعى كەمشىلىكتى اتادى

استانا. KAZINFORM - قازاقستانداعى اسكەري ءبىلىم بەرۋ جۇيەسىنە اۋقىمدى رەفورمالار قاجەت. سەناتور دارحان قىدىرالى ءوزىنىڭ بۇگىنگى دەپۋتاتتىق ساۋالىندا وسى ماسەلەنى كوتەردى.

دەپۋتاتتىڭ سوزىنە قاراعاندا، وقۋ ورىندارىن الەمدىك ستاندارتتارعا سايكەستەندىرۋ تۋرالى پرەزيدەنتتىڭ تاپسىرماسىنا قاراماستان، ماتەريالدىق-تەحنيكالىق بازا ءالى دە ەسكىرگەن قالپىندا قالىپ وتىر، ال پراكتيكالىق دايىندىق دەڭگەيى تومەن.

قورعانىس مينيسترلىگىنىڭ مالىمەتىنشە، جوعارى وقۋ ورىندارىندا 41 اسكەري كافەدرا جۇمىس ىستەيدى. وسى كافەدرالاردى قازىرگە دەيىن 120 مىڭ تۇلەك ءبىتىرىپ شىققان.

- جىل سايىن 7 مىڭ تۇلەك ءتامامدايتىنىن ەسكەرسەك، الداعى 10 جىلدا ولاردىڭ سانى تاعى 70 مىڭعا ارتادى. اسكەرگە ادام جەتىسپەيدى دەيمىز. سوندا، زاپاستاعى وفيتسەرلەر مەن سەرجانتتاردىڭ سانى قاتارداعى ساربازدان دا كوپ بولىپ كەتپەي مە؟! كافەدرا مەڭگەرۋشىلەرىن قورعانىس مينيسترلىگىمەن كەلىسەدى، الايدا ادىستەمەلىك نۇسقاۋلىقتار مەن وقۋلىقتاردا بىرىزدىلىك جوق. پراكتيكامەن ۇشتاستىرۋ جاعى دا كەمشىن. وقيتىن ستۋدەنتتەردىڭ جارتىسىنا جۋىعى اقىلى نەگىزدە ءبىلىم الاتىن ەسكەرسەك، جەكەمەنشىك ۋنيۆەرسيتەتتەر ءۇشىن كافەدرالار تالاپكەر تارتۋدىڭ كوزىنە اينالىپ كەتكەن جوق پا؟ - دەدى دارحان قىدىرالى.

سونىمەن قاتار ءبىرىڭعاي ادىستەمەلىك بازا جوق، زاماناۋي وقۋلىقتار جەتىسپەيدى، ال وقۋ باعدارلامالارىندا ءالى كۇنگە دەيىن كونەرگەن كەزەڭدەگى تاكتيكا پايدالانىلادى.

- بۇگىندە الەمدىك قورعانىس جۇيەسىندە اۋقىمدى وزگەرىستەر بولىپ جاتىر. سوندىقتان اسكەري ج و و مەن قورعانىس سالاسىنا ۇشقىشسىز باسقارىلاتىن ۇشۋ اپپاراتتارى مەن زاماناۋي تەحنولوگيانى جەتىك مەڭگەرگەن ۇلتتىق رۋحتاعى كاسىبي مامانداردى كوپتەپ تارتۋ ماڭىزدى دەپ ويلايمىز، - دەدى سەناتور.

بىلتىر دەپۋتات اندرەي لۋكين اسكەري كافەدرالار تۋرالى پىكىر ايتىپ، اسكەريلەردى دايىنداۋدا جاڭا ءتاسىل قاجەت ەكەنىن اتاپ ءوتتى.