دەپۋتات الماتىدا 40 قاباتتى كەشەن سالۋعا قارسى
الماتى. KAZINFORM - ءماجىلىس دەپۋتاتى سەرگەي پونومارەۆ الماتىدا سەيفۋللين داڭعىلى مەن تيميريازيەۆ كوشەسىنىڭ قيىلىسىندا سالىنىپ جاتقان 40 قاباتتى عيمارات قۇرىلىسىنا قارسى شىقتى.
دەپۋتات الەۋمەتتىك جەلىدەگى پاراقشاسىندا بۇل اۋماقتا ءزاۋلىم مۇنارادان بولەك تاعى بەس 10 قاباتتى ءۇي سالۋ جوسپارلانىپ وتىرعانىن جەتكىزدى.
- ءيا، تۇسىنەمىز: بۇل شارشى مەترلەر، سالىقتار، جۇمىس ورىندارى اشىلادى. ءبىراق ءدال وسى جەردە وسىنداي ۇلكەن كەشەن تۇرعىزۋدىڭ قاجەتى قانشا؟ قۇرىلىس قالا ينفراقۇرىلىمىنا وراسان زور اۋىرتپالىق تۇسىرەدى. سەبەبى بۇل اۋدان ونسىز دا كولىك كەپتەلىسىنە ءجيى ۇشىرايدى. بۇل ايماقتا ونسىز دا مەكتەپ، اۋرۋحانا جەتپەي جاتىر، - دەپ اتاپ ءوتتى دەپۋتات.
ونىڭ ايتۋىنشا، حالىققا دەمالىس ورنى، ساياباقتار، الەۋمەتتىك نىساندار كەرەك. سونداي-اق، دەپۋتات وسىعان دەيىن قۇرىلىس كومپانياسىنىڭ باسقا جوباسىندا الەۋمەتتىك نىساندار - مەكتەپ پەن اۋرۋحانا تۇرعىزۋعا ۋادە بەرگەنىن ەسكە سالدى. ءبىراق ۋادە ەتىلگەن نىساندار ءالى كۇنگە دەيىن سالىنباعان.
- بىزگە كىشى الماتى وزەنىنىڭ بويىنداعى جاندوسوۆا كوشەسىنەن وتەپوۆ كوشەسىنە دەيىنگى 7,5 گەكتار اۋماقتاعى 2,5 شاقىرىم ساياباقتى اباتتاندىرۋعا، كوگالداندىرۋعا جانە دامىتۋعا ۋادە بەردى. ال ءبىز نە كورىپ تۇرمىز؟ جەكە سەكتور بۇزىلعان جوق، ەشتەڭە ىستەلمەگەن: قالاعا ۋادە ەتىلگەن مەكتەپ تە، اۋرۋحانا دا، ترانسفورماتورلىق قوسالقى ستانتسيا دا جوق. وكىنىشكە قاراي، وسى جەردە دە وسىنداي جاعداي بولا ما دەپ قورقامىز، - دەدى دەپۋتات.
قازىر بۇل جاڭا جوباسى مەملەكەتتىك ساراپتامادان ءوتىپ جاتىر. دەپۋتات سەرگەي پونومارەۆ جوبانى قايتا قاراۋ كەرەكتىگىن ايتىپ، قالالىق بيلىك وكىلدەرىنىڭ الدىنا ناقتى سۇراقتار قوياتىنىن جەتكىزدى.
وسىعان دەيىن دەپۋتات الماتىدا بيۋدجەتتەن 1,5 ميلليارد تەڭگە جۇمساپ سالىنعان كرەماتوري دەنساۋلىق ساقتاۋ مينيسترلىگىنە كەرەك بولماي قالعانى تۋرالى ايتقان بولاتىن.
