دەپۋتات اجىراسقانداردىڭ تابىس سالىعىن ارتتىرۋدى ۇسىندى
استانا. KAZINFORM - ءماجىلىس دەپۋتاتى ارداق نازاروۆ پرەمەر- مينيستر ولجاس بەكتەنوۆكە جولداعان ساۋالىندا اجىراسقان قازاقستاندىقتارعا تابىس سالىعىن جوعارى مولشەرمەن سالۋدى ۇسىندى.
- ۇلتتىق ستاتيستيكا بيۋروسىنىڭ رەسمي دەرەكتەرىنە سۇيەنسەك، 2023 -جىلى ەلىمىزدە 120,8 مىڭ نەكە تىركەلسە، سونىڭ 40,2 مىڭى اجىراسۋمەن اياقتالعان. سالدارىنان بۇگىندە 400 مىڭ ايەل مەن 60 مىڭ ەركەك جالعىز باستى ادام كەبىن قۇشىپ وتىر، - دەپ باستاعان دەپۋتات زاڭ تالاپتارىن قاتاڭداتۋدى ۇسىندى.
رەسمي تۇردە اجىراسقان تۇلعالارعا سالاناتىن سالىق وسە بەرمەك.
- اجىراسۋعا ءوتىنىش بىلدىرگەن ەرلى-زايىپتىلاردىڭ ءبىرجاقتى شەشىمى نەگىزىندە سوتقا ارىز قابىلدانباس بۇرىن ارنايى مەملەكەتتىك باج نەمەسە جارنا تولەۋ ءتارتىبىن ەنگىزۋ قاجەت. بۇل تولەمنىڭ كولەمى ەداۋىر جوعارى بولۋى ءتيىس. سونىمەن قاتار، رەسمي تۇردە اجىراسقان تۇلعالار ءۇشىن تابىس سالىعىنىڭ مولشەرلەمەسىن كەزەڭ- كەزەڭىمەن ارتتىرۋ قاراستىرىلسىن، - دەدى ول.
سونداي-اق، وتباسى ماسەلەسىندە اۋلەتتىڭ ۇلكەندەرىن تىڭداۋ، داۋ-دامايدى بىتىممەن شەشۋ تاجىريبەسىن زاماناۋي فورماتتا قولدانۋ ءۇشىن ارداگەرلەر القاسى، يمامدار، ايەلدەر كەڭەسى سىندى كونسۋلتاتيۆتىك- كەڭەسشى ورگانداردىڭ الەۋەتىن پايدالانۋ ۇسىندى.
- اجىراسۋعا ءوتىنىش بەرگەن ەرلى-زايىپتىلاردىڭ ءىسى سوتقا جەتپەي تۇرىپ، الدىن الا وسى كەڭەستەردىڭ قاراۋىنا ۇسىنىلىپ، بىتىمگەرشىلىك جانە تاتۋلاسۋ باعىتىندا جۇمىس جۇرگىزىلسە، كوپتەگەن وتباسىلاردىڭ ساقتالىپ قالۋىنا مۇمكىندىك تۋار ەدى، - دەيدى ارداق نازاروۆ.
ءماجىلىس دەپۋتاتى «جاس وتباسى» ۇلتتىق باعدارلاماسىن ازىرلەۋ تۋالى دا ۇسىنىس ايتتى.
- ۇيلەنۋ تويلارىن وتكىزۋ ءۇشىن عانا نەسيە راسىمدەۋگە جول بەرمەۋ جونىندە كەڭ كولەمدى اقپاراتتىق- يدەولوگيالىق ناۋقان جۇرگىزۋ كەرەك. قازىرگى قوعامدا ەكى جاستىڭ ۇيلەنۋ تويىنا بايلانىستى قارىزعا باتۋ، بانكتەن نەسيە الۋ جيىلەپ كەتتى. ءبىر ساتتىك سالتانات ءۇشىن بىرنەشە جىل نەسيە تولەۋ جاس وتباسىنىڭ بەرەكەسىن كەتىرىپ، ەكونوميكالىق تاۋەلسىزدىگىنە كەرى اسەر ەتەدى. وسىعان بايلانىستى، ۇكىمەتكە جاستار اراسىندا قارجىلىق ساۋاتتىلىقتى ارتتىرۋ، نەسيەگە توي جاساماۋ جونىندە جالپىحالىقتىق اقپاراتتىق- يدەولوگيالىق قوزعالىس باستاۋدى ۇسىنامىن، - دەدى ول.
سونداي-اق، بۇگىن ءماجىلىس سالىق كودەكسىن قابىلدادى.
اۆتور
ەسىمجان ناقتىباي
