دروپپينگ-سحەمالارعا قاتىسقانداردىڭ قىلمىستىق جاۋاپكەرشىلىگى كۇشەيتىلدى - باس پروكۋراتۋرا

استانا. KAZINFORM - قازاقستاندا دروپپينگ-سحەمالارعا قارسى ءىس-قيمىل جاڭا دەڭگەيگە شىقتى، ەندى قىلمىستىق جاۋاپكەرشىلىككە تەك ۇيىمداستىرۋشىلار عانا ەمەس، دروپپەرلەردىڭ وزدەرى دە تارتىلادى. بۇل تۋرالى Bizdin Orta پودكاستىنىڭ ەفيرىندە باس پروكۋراتۋرا باسقارماسىنىڭ اعا پروكۋرورى سۇلتان باتتالوۆ ءمالىم ەتتى.

ونىڭ ايتۋىنشا، بۇعان دەيىن دروپپەرلەردىڭ ارەكەتى قىلمىستىق كودەكستىڭ 28-بابى بويىنشا قىلمىسقا قاتىسۋدىڭ ءبىر ءتۇرى رەتىندە قاراستىرىلعان.

- ەندى زاڭناماعا دروپپينگ پروتسەسىن ۇيىمداستىرۋشىلار مەن دروپپەرلەردىڭ وزدەرىنە قاتىستى تىكەلەي قىلمىستىق جاۋاپكەرشىلىكتى كوزدەيتىن ناقتى نورمالار ەنگىزىلدى. بۇل ماڭىزدى قادام، سەبەبى زاڭسىز قىزمەت تۇرلەرى ۇنەمى وزگەرىپ، جەتىلدىرىلىپ كەلەدى، - دەپ اتاپ ءوتتى باتتالوۆ.

باس پروكۋراتۋرا وكىلدەرى اتاپ وتكەندەي، زاڭنامانى قاتايتۋ وڭ ناتيجەسىن بەرە باستاعان: جاڭا قۇقىقتىق تەتىكتەر قارجىلىق سحەمالاردى ءتيىمدى تۇردە توقتاتۋعا جانە قىلمىسقا قاتىسى بار بارلىق تۇلعالاردى جاۋاپقا تارتۋعا مۇمكىندىك بەرەدى.

دروپپينگ - ءۇشىنشى تۇلعالارعا زاڭسىز قارجىلىق وپەراتسيالاردى جۇرگىزۋ ءۇشىن ءوز دەرەكتەرىن نەمەسە بانك شوتتارىن بەرۋ. مۇنداي سحەمالار اقشانى زاڭسىز جولمەن «جىلىستاتۋ»، الاياقتىق جانە وزگە دە قىلمىستار ءۇشىن كەڭىنەن قولدانىلادى.

بۇعان دەيىن پودكاستتا اسحات نيازوۆتىڭ ارەكەتىنە قۇقىقتىق باعا بەرىلەتىنى جاريالانعان بولاتىن.