دۇركىرەتىپ توي جاساعاندارعا سالىق سالىنا ما - كوميتەت جاۋابى

استانا. KAZINFORM - كەشەلى بەرى ب ا ق بەتتەرىندە دۇركىرەتىپ توي وتكىزگەن جاندار سالىق تولەيدى دەگەن اقپارات تاراپ جاتىر. جاڭاشىلدىقتىڭ ءمان-جايىن مەملەكەتتىك كىرىستەر كوميتەتىنەن سۇراعان ەدىك.

- اڭگىمە جەكە كاسىپكەر رەتىندە تىركەلمەي كاسىپكەرلىك قىزمەتپەن اينالىساتىندارعا قاتىستى بولىپ وتىر. كوميتەت قىزمەت تۇرىنە قاراماستان، جەكە تۇلعالاردىڭ سالىق تولەۋ مىندەتىن اكىمشىلەندىرۋ ارقىلى قاداعالايدى. اتالعان قىزمەت تۇرلەرىمەن اينالىساتىن ادامدار، ياعني ءىس-شارا جۇرگىزۋشىلەرى، تامادالار، انشىلەر سالىق مىندەتتەمەلەرىن باسقا ازاماتتار مەن كاسىپكەرلەر سياقتى جالپى نەگىزدە ورىندايدى، بۇل سالىق سالۋدىڭ ادىلدىك قاعيداتىنا سايكەس، - دەگەن جاۋاپ الدىق كوميتەتتەن.

وسى ورايدا كىرىستەر كوميتەتى كامەرالدىق باقىلاۋ تابىس تاپقان بارلىق تۇلعاعا تەڭدەي جۇرگىزىلەتىنىن ەسكە سالادى.

ايتا كەتسەك، اقپاننان باستاپ مەملەكەتتىك كىرىستەر كوميتەتى تابىسىن تومەن كورسەتكەن 594 بلوگەرگە قاتىستى 53,3 ميلليارد تەڭگەنىڭ حابارلاماسىن جىبەرە باستادى. تەكسەرۋ، سالىستىرۋ قورىتىندىسى بويىنشا 594 تۇلعانىڭ تابىسىندا 53,3 ميلليارد تەڭگەگە سايكەسسىزدىك انىقتالعان.

كەيىن تابىس سالىعىن تولەۋگە جاتاتىن بلوگەرلەر ميللياردتاعان كىرىسىن كورسەتە باستادى.