دەنيس تەن، قايىم مۇحامەدحانوۆ: الماتىدا 156 كوشەگە جاڭا اتاۋ بەرىلەدى
الماتى. KAZINFORM - الماتى ءماسليحاتىنىڭ قوعامدىق دامۋ، مادەنيەت، سپورت، ءدىن جانە جاستار جونىندەگى كوميسسيانىڭ وتىرىسىندا قالا كوشەلەرىنە اتاۋ بەرۋ ماسەلەسى قارالدى.
وتىرىسقا الماتى قالاسى ءماسليحاتىنىڭ ءتوراعاسى مەيىرجان وتىنشيەۆ جانە وزگە ءماسليحات دەپۋتاتتارى، سونداي-اق الماتى قالاسى اكىمى اپپاراتىنىڭ تىلدەردى دامىتۋ جانە ونوماستيكا ءبولىمىنىڭ باسشىسى باقىت قالىمبەت قاتىسقان.
جاريالانعان وتىرىس حاتتاماسىنا سايكەس، الماتىدا 156 كوشەگە جاڭادان اتاۋ بەرۋ جوسپارلانعان.
اتاپ ايتقاندا، الاتاۋ اۋدانى بويىنشا 10 كوشەگە، اۋەزوۆ اۋدانى بويىنشا 4 كوشەگە، بوستاندىق اۋدانى بويىنشا 45 كوشەگە، جەتىسۋ اۋدانى بويىنشا 4 كوشەگە، مەدەۋ اۋدانى بويىنشا 7 كوشەگە، ناۋرىزباي اۋدانى بويىنشا 86 كوشەگە جاڭا اتاۋ بەرۋ قاراستىرىلعان.
بوستاندىق اۋدانىنىڭ «ارحات» شاعىن اۋدانىنداعى 7-كوشەسىنە وليمپيادانىڭ قولا جۇلدەگەرى دەنيس تەننىڭ، الاتاۋ اۋدانىندا عالىم، ابايتانۋشى قايىم مۇحامەدحانوۆ جانە ۆەتنامدىق قوعام قايراتكەرى حو شي مين ەسىمدەرىن، جەتىسۋ اۋدانىندا ۇلى وتان سوعىسىنىڭ ارداگەرى شاڭگەرەي جانىبەكوۆتىڭ جانە وزگە دە تاريحي تۇلعالاردىڭ اتىن بەرۋ جوسپارلانعان.
Kazinform ساۋالىنا جاۋاپ بەرگەن الماتى قالاسى اكىمى اپپاراتىنىڭ تىلدەردى دامىتۋ جانە ونوماستيكا ءبولىمىنىڭ مالىمەتىنشە، كوشە اتاۋلارىن وزگەرتۋ ماسەلەسى الداعى ۋاقىتتا رەسپۋبليكالىق ونوماستيكا كوميسسياسىنا قارالادى.
ەسكە سالايىق، بىلتىر الماتىدا گاگارين داڭعىلىنىڭ ءبىر بولىگىنە ەرمەك سەركەبايەۆتىڭ، تۇركسىب اۋداندارىنداعى اتاۋسىز كوشەلەرگە ەسكەندىر حاسانعاليەۆ پەن يۋري پومەرانسەۆتىڭ جانە اۋەزوۆ اۋدانىنداعى يۋبيلەينايا كوشەسىنە ۆلاديمير تولوكوننيكوۆتىڭ ەسىمى بەرىلدى.
اۆتور
دوسبول اتاجان
