دۇنيەجۇزىن قاقتىعىستار مەن سوعىس ءورتى جايلاپ بارادى - پرەزيدەنت

استانا. KAZINFORM - دۇنيەجۇزىن قاقتىعىستار مەن سوعىس ءورتى جايلاپ بارادى. بۇل تۋرالى استانا حالىقارالىق فورۋمىندا مەملەكەت باسشىسى قاسىم-جومارت توقايەۆ ايتتى.

- بۇگىنگى جيىن الەمدە بەلگىسىزدىك بەلەڭ العان كەزەڭدە ءوتىپ وتىر. مۇنى جولايرىق، حالىقارالىق قاتىناستارداعى سىن ساعاتى دەپ سيپاتتاساق تا بولادى. الايدا بۇل تۇجىرىمدى تاريحشىلاردىڭ ەنشىسىنە قالدىرعان ءجون. قازىر وسى جاعدايعا قالاي جاۋاپ بەرەتىنىمىز ماڭىزدى. الدىمىزدا تاڭداۋ تۇر: قانداي شەشىم قابىلدايمىز، قانداي قۇندىلىقتاردى قورعايمىز؟!، - دەدى قاسىم-جومارت توقايەۆ.

مەملەكەت باسشىسى دۇنيەجۇزىن قاقتىعىستار مەن سوعىس ءورتى جايلاپ بارا جاتقانىنا الاڭداۋشىلىق تانىتتى.

- بىلتىرعى مالىمەتكە سايكەس، 52 مەملەكەت قارۋلى قاقتىعىس جاعدايىندا تۇرعان. ال وسىنداي قاتىگەز ارەكەتتەردەن كەلگەن ەكونوميكالىق شىعىن 19 تريلليون دوللارعا جەتتى. بۇل، شامامەن، الەمدىك ءى ج ءو- ءنىڭ 13,5 پايىزى. دەگەنمەن وسى سانداردىڭ ارعى جاعىنداعى احۋال ودان دا قورقىنىشتى: قازىرگى قاقتىعىستار اناعۇرلىم ۇزاق ءارى كۇردەلى سيپاتقا يە. وعان كوپتەگەن «ويىنشى»، ءتىپتى، ەشقانداي مەملەكەتكە قاتىسى جوق توپتار ارالاسادى. بۇدان بولەك، مۇنداي قاقتىعىستاردىڭ تامىرىندا ءتۇرلى قايشىلىقتار جاتىر. اتالعان فاكتورلار بەيبىتشىلىكتىڭ بەرىك ورناۋىنا كەدەرگى كەلتىرۋدە، - دەدى پرەزيدەنت.

ايتا كەتەيىك، ەلوردادا مەملەكەت باسشىسى قاسىم-جومارت توقايەۆتىڭ قاتىسۋىمەن استانا حالىقارالىق فورۋمى ءوتىپ جاتىر.

پلەنارلىق وتىرىستى Jibek joly تەلەارناسىنان تىكەلەي ەفيردە كورۋگە بولادى.