دۇنيەجۇزىلىك كوشپەندىلەر ويىندارى UNESCO قولداۋىمەن وتەدى

استانا. KAZINFORM - قىركۇيەك 8-13 ارالىعىندا استانادا وتەتىن 5-دۇنيەجۇزىلىك كوشپەندىلەر ويىندارى UNESCO پاتروناجىنا الىندى.

الدىن الا بولجام بويىنشا ەلورداعا 85 تەن استام ەلدەن كەمىندە 2000 قاتىسۋشى كەلەدى.

باعدارلاما 20 نەگىزگى جانە ات سپورتى، كۇرەس، ءداستۇرلى ساداق اتۋ جانە ينتەللەكتۋالدى ويىندار سەكىلدى 10 سپورت تۇرىنەن جارىستاردى قامتيدى.

ايتۋلى شاراعا سپورتشىلار عانا ەمەس، مادەنيەت پەن عىلىم وكىلدەرى دە قاتىسادى دەپ كۇتىلىپ وتىر.

كوشپەندىلەر ويىندارى - ءداستۇرلى ۇلتتىق سپورت پەن مادەنيەتتىڭ ساقتالۋى مەن دامۋىندا ماڭىزدى ءرول اتقارادى.

سونداي-اق، مەملەكەتتەر اراسىنداعى مادەني ارتۇرلىلىك پەن ديالوگتى ىلگەرىلەتۋگە ىقپال ەتەدى.

باعدارلاما اياسىندا ەتنومادەني مۇرانى ناسيحاتتاۋعا باعىتتالعان عىلىمي كونفەرەنسيالار مەن مادەني ءىس-شارالار جوسپارلانعان.

دۇنيەجۇزىلىك كوشپەندىلەر ويىندارىن وتكىزۋ UNESCO- نىڭ سپورت ارقىلى دەنساۋلىق پەن ءال-اۋقاتتى جاقسارتۋعا باعىتتالعان «Fit for Life» باستاماسىن ىسكە اسىرۋعا جاردەمدەسەدى.

سول سياقتى ماتەريالدىق ەمەس مادەني مۇرانى ساقتاۋ ماقساتتارىنا سايكەس كەلەدى.

ايتا كەتۋ كەرەك، اتالعان ويىندار قازىردىڭ وزىندە UNESCO- نىڭ ماتەريالدىق ەمەس مادەني مۇرا تىزىمىنە ەنگىزىلگەن.

ءىس-شارا اياسىندا UNESCO- نىڭ الماتىداعى وڭىرلىك كەڭسەسى سپورتتاعى ايەلدەردىڭ ءرولى تاقىرىبىندا جوعارى دەڭگەيدەگى حالىقارالىق عىلىمي-پراكتيكالىق كونفەرەنسيا ۇيىمداستىرادى.

بۇل ءىس-شارا سپورتتاعى گەندەرلىك تەڭدىك پەن ينكليۋزيانىڭ ماڭىزىن باسا كورسەتە وتىرىپ، جارىستاردىڭ مادەني جانە عىلىمي باعدارلاماسىنىڭ ماڭىزدى بولىگىنە اينالادى.

بۇعان دەيىن UNISEF بەسىنشى دۇنيەجۇزىلىك كوشپەندىلەر ويىندارىنىڭ رەسمي سەرىكتەسى اتانعانىن حابارلاعان ەدىك.

ەسكە سالا كەتەيىك، دۇنيەجۇزىلىك كوشپەندىلەر ويىندارىنىڭ قازاقستاندا وتەتىنى بىلتىر قازاندا بەلگىلى بولدى.

ال بيىل ناۋرىزدا العاشقى بيلەت ساتىلدى.