دۇنيەجۇزىلىك كوشپەندىلەر ويىندارى: سپورتشىلار اتىن ارنايى بورتپەن اكەلە مە

استانا. KAZINFORM - دۇنيەجۇزىلىك كوشپەندىلەر ويىندارىندا جانۋارلاردىڭ قاتىسۋىمەن وتەتىن سپورت تۇرلەرى بار ەكەنى بەلگىلى. اۋەجايدان دومبىرانىڭ ءوزىن وتكىزۋ مۇڭعا اينالعان كەزدە شەتەل سپورتشىلارى دوداعا قاتىساتىن جانۋارلارىن قالاي تاسىمالدايدى؟

بۇل ساۋالدى ۇيىمداستىرۋشىلارعا قويدىق. V دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكسيا باسشىسىنىڭ ورىنباسارى مۇراتبەك قىپشاقبايەۆتىڭ ايتۋىنشا، شەتەلدىك سپورتشىلاردى جارىس يەسى رەتىندە قازاقستان اتپەن قامتاماسىز ەتەدى.

«ديرەكسيا شەتەل سپورتشىلارىنا ات ۇلەستىرەدى. تەك كورشى رەسەي، وزبەكستان جانە قىرعىزستان سپورتشىلارى ءوز اتتارىمەن كەلەدى»، - دەدى ول.

ياعني، كورشى ەلدىڭ سپورتشىلارى اتتارىن ارنايى كولىككە سالىپ، ەل شەكاراسىن اتتاماق. شەتەلدىك سپورتشىلار ءوز اتتارىمەن كەلمەگەندىكتەن جۇلدە اۋىلىنان الىس قالادى دەۋگە كەلمەس. ولارعا ەلىمىزدەگى ۇزدىك اتتار ۇسىنىلماق. جالپى، باتىرعا وڭ-سولى ءبارىبىر دەمەكشى، اۋدارىسپاق سياقتى سپورت تۇرلەرىندە اتتان گورى سپورتشىنىڭ دايىندىعى ماڭىزدى ەكەنى انىق.

اۋە كومپانيالارىنا حابارلاسقانىمىزدا، بارلىعى جانۋارلاردى تاسىمالداۋعا ارنالعان ەرەجەنى ۇسىندى.
ماسەلەن، SCAT اۋە كومپانياسىنىڭ باسپا ءسوز قىزمەتى ۇسىنعان مالىمەتكە سۇيەنسەك، جانۋارلار مەن قۇستار تاسىمالداۋعا اۋە كومپانيانىڭ كەلىسىلگەن كەلىسىمى جانە حالىقارالىق رەيستەر ءۇشىن كەلۋ نەمەسە ترانزيت ارقىلى اكەلۋگە رۇقساتى بولعان جاعدايدا عانا قابىلدانادى.

«قۇستاردى تاسىمالداۋ كەزىندە تور جارىق وتكىزبەيتىن ماتەريالمەن جابىلۋى ءتيىس. تاسىمالدى برونداۋ كەزىندە جولاۋشى تاسىمالداناتىن جانۋاردىڭ نەمەسە قۇستىڭ ءتۇرىن، سانىن جانە سالماعىن حابارلاۋى كەرەك. جانۋارلار تىركەلگەن جۇك رەتىندە اۋە كەمەسىنىڭ وقشاۋلانعان جۇگىندە عانا تاسىمالدانادى. جانۋارلاردى جۇك بولىكتەرىندە تاسىمالداۋ كەزىندە جانۋارلاردىڭ سالماعى تەگىن جۇك الىپ ءجۇرۋ نورماسىنا ەنگىزىلمەيدى جانە كونتەينەردىڭ (توردىڭ) سالماعىن ەسكەرە وتىرىپ، ارنايى جۇك تاريفى بويىنشا تولەنەدى. جۇك رەتىندە ۇشاقتا جانۋارلاردى تاسىمالداۋ تولەمى جۇك تاريفتەرى بويىنشا جۇرگىزىلەدى»، - دەيدى SCAT اۋە كومپانياسىنىڭ باسپا ءسوز قىزمەتى.

جۇك رەتىندە ءىرى ءۇي مالى، جابايى، تۇياقتى جانۋارلار، ارالار جانە بالىق وتىرعىزۋ ماتەريالدارى تاسىمالداۋعا قابىلدانبايدى ەكەن. جانۋارلاردى تاسىمالداۋ قۇنى قازاقستان بويىنشا سالماعىنا قاراي 5000-25000 ارالىعىندا ەكەنىن اتاپ وتكەن ءجون.

اۆتور
ورالحان قوجانوۆ