دۇنيەجۇزىلىك كوشپەندىلەر ويىندارى: بيلەتتى كىمدەر جەڭىلدىكپەن الادى
استانا. قازاقپارات – 6-تامىز كۇنى 8-13-قىركۇيەك ارالىعىندا استانادا وتەتىن 5- دۇنيەجۇزىلىك كوشپەندىلەر ويىندارىنىڭ اشىلۋ سالتاناتى مەن بارلىق جارىسىنا بيلەتتەر ساتىلىمى باستالعان بولاتىن.
ويىننىڭ اشىلۋ سالتاناتى 8-قىركۇيەك كۇنى «استانا- ارەنا» ستاديونىندا وتەدى. بيلەتتەر 15000-50000 تەڭگە ارالىعىندا ساتىلىپ جاتىر.
سپورت باعدارلاماسىنا 21 سپورت ءتۇرى كىرەدى. بۇل رەتتە، جارىستاردىڭ ورتاشا بيلەت قۇنى - 3600 تەڭگە. ماسەلەن، قازاق كۇرەسى، الىش جانە كوراش سپورتىنا بيلەتتەر 2500 تەڭگەدەن 7500 تەڭگە ارالىعىندا ەكەن. جارىستار جاقسىلىق ۇشكەمپىروۆ اتىنداعى جەكپە-جەك سارايىندا وتەدى.
«الاۋ» مۇزايدىنىندا اسىق اتۋ، وردو، ماس- رەستلينگ، كۇراش، ارقان تارتۋ جانە اشىرتمالى ابا گۇرەشى بويىنشا كىل مىقتىلار جۇلدەگە تالاسادى. بيلەت قۇنى 1000-3000 تەڭگە ارالىعىندا.
كوكپار، كوك ءبورى جانە بايگە بويىنشا تارتىستى جارىستار «قازانات» يپپودرومىندا وتەدى. كوكپار مەن كوك ءبورى بويىنشا ىرىكتەۋ كەزەڭدەرىنە بيلەتتەر قۇنى 2000-15000 تەڭگە ارالىعىندا بولسا، فينالدىق كەزەڭىنىڭ بيلەتتەرى 2000 تەڭگەدەن باستالىپ، 15000 تەڭگەگە دەيىن جەتپەك. بايگە جارىستارىنا بيلەت قۇنى 3000-15000 تەڭگە بولماق. ەتنواۋىلدا جامبى اتۋ، تەڭگە ءىلۋ، اۋدارىسپاق، قۇسبەگىلىك، سونداي-اق الىپتار سايىسى «Powerful Nomad» جارىستارىن كورۋگە بولادى. اتالعان سپورت تۇرلەرى بويىنشا بيلەتتەر 1000 تەڭگەدەن باستالىپ، 2000 تەڭگەگە دەيىن ساتىلادى.
كورەرمەن كوزايىمىنا اينالعان ءداستۇرلى ساداق اتۋ سپورتى بويىنشا باسەكەلەر «ارعىماق» ات- سپورتتىق ساۋىقتىرۋ كەشەنىندە وتەدى. بيلەتتەر قۇنى 600 تەڭگەدەن باستالىپ، 3000 تەڭگەگە دەيىن ۇسىنىلادى. ءداستۇرلى زياتكەرلىك ويىندار سانالعان توعىزقۇمالاق، مانگالا جانە وۆاري جارىستارى كورەرمەندەرسىز وتەدى.
ايتپاقشى، ازاماتتاردىڭ جەكەلەگەن ساناتتارى ءۇشىن ءارتۇرلى جەڭىلدىكتەر قاراستىرىلعان. %50 جەڭىلدىك مەكتەپ وقۋشىلارى (6 جاستان 18 جاسقا دەيىن) مەن زەينەتكەرلەر ءۇشىن قولجەتىمدى. 5 جاسقا دەيىنگى بالالار (ورىنسىز) مەن I جانە II توپتاعى مۇگەدەكتەر بيلەتتەردى تەگىن الا الادى. جەڭىلدىك بيلەتتەرىن راستايتىن قۇجاتتى كورسەتكەننەن كەيىن وففلاين كاسسالاردان ساتىپ الۋعا بولادى.
بارلىق جارىسقا بيلەتتەردى رەسمي بيلەت وپەراتورىنىڭ www.zakazbiletov.kz سايتىنان ساتىپ الۋعا بولاتىنىن ەسكە سالامىز.
