دەمالىس كۇندەرى ۇزاق ۇيىقتاۋدىڭ پايداسى ايتىلدى

استانا. قازاقپارات - دەمالىس كۇندەرى ۇيقىنى قاندىرۋ جۇرەك پەن پسيحيكاعا پايدالى ەكەن. بۇل تۋرالى كارديولوگ ءارى تەراپيەۆت اندرەي كوندراحين ايتتى.

دارىگەر ۇنەمى ۇيقى قانباۋى كورتيزول دەڭگەيىن جوعارىلاتاتىنىن، ال بۇل ءوز كەزەگىندە ادرەنالين مەن نورادرەنالين سەكىلدى كۇيزەلىس گورموندارىنىڭ ءوندىرىسىن ىنتالاندىراتىنىن جەتكىزدى.

ونىڭ سوزىنشە، مۇنداي جاعدايعا اعزا ۇنەمى شارشايدى، ۋاقىت وتە كەلە بۇل جۇرەك-قان تامىرلارى مەن پسيحيكالىق جاي-كۇيگە زيانىن تيگىزەدى.

«سوندىقتان دەمالىس كۇندەرى كوبىرەك ۇيىقتاۋعا مۇمكىندىك بولعان كەزدە بۇل جاعداي تەڭەسەدى»، - دەگەن دارىگەردىڭ ءسوزىن lenta.ru باسىلىمى كەلتىردى.

كوندراحين قازىر ادامدار دەمالۋدان گورى كوپ جۇمىس ىستەيتىنىن جانە دەمالىس كۇندەرى ۇزاق ۇيىقتاۋ قالپىنا كەلۋگە كومەكتەسەتىنىن ايتتى. ساراپشىنىڭ پىكىرىنشە، ۇيقىنى قاندىرۋ دەگەن جارتى كۇندى توسەكتە وتكىزۋدى بىلدىرمەيدى، جۇمىس كۇندەرىنە قاراعاندا ءبىر-ەكى ساعاتقا ارتىق ۇيىقتاسا جەتكىلىكتى.

ەسكە سالايىق، بۇعان دەيىن دەنساۋلىق ساقتاۋ مينيسترلىگى ەرەسەكتەر مەن بالالار قانشا ساعات ۇيىقتاعانى ءجون ەكەنىن ايتتى.

مەديتسينالىق كومەكتى ۇيىمداستىرۋ دەپارتامەنتى بۇل ساۋال ادامنىڭ جاسىنا بايلانىستى ەكەنىن مالىمدەدى:

جاڭا تۋعان نارەستەلەر (0-3-اي): 14-17 ساعات؛
سابيلەر (4-12-اي): 12-16 ساعات؛
1-2 جاستاعى بالالار: 11-14 ساعات؛
3-5 جاستاعى بالالار: 10-13 ساعات؛
6-12 جاستاعى بالالار: 9-12 ساعات؛
13-18 جاس ارالىعىنداعى جاسوسپىرىمدەر: 8-10 ساعات؛
ەرەسەكتەر، ياعني 18-64 جاستاعىلار: 7-9 ساعات؛
65 جاستان اسقان قارتتار: 7-8 ساعات.