دەمالىس كۇندەرى اۋا رايى قانداي بولادى؟
استانا. KAZINFORM - قازگيدرومەت 28، 29، 30-ماۋسىمعا ارنالعان اۋا رايى بولجامىن جاريالادى.
ەل اۋماعىنىڭ باسىم بولىگىندەگى اۋا رايىنا تسيكلون جانە اتموسفەرالىق فرونتالدى بولىمدەر اسەر ەتەدى. سونىڭ اسەرىنەن جاڭبىر جاۋىپ، نايزاعاي وينايدى، ال ەلىمىزدىڭ باتىسىندا، سولتۇستىك-باتىسىندا، سولتۇستىگىندە، شىعىسىندا جانە ورتالىعىندا بۇرشاق جاۋىپ، كۇشتى جاڭبىر جاۋۋى مۇمكىن.
«رەسپۋبليكانىڭ وڭتۇستىگىندە جانە وڭتۇستىك-شىعىسىندا نەگىزىنەن جاۋىن-شاشىنسىز اۋا رايى ساقتالادى. سونىمەن قاتار، جەل كۇشەيەدى، ەلدىڭ وڭتۇستىك وڭىرلەرىندە شاڭدى داۋىل سوعۋى مۇمكىن»، - دەپ جازىلعان حابارلامادا.
اۋا تەمپەراتۋراسى ايتارلىقتاي وزگەرمەيدى: كۇندىز تەرمومەتر باعاندارى باتىس، سولتۇستىك- باتىس جانە سولتۇستىك ايماقتاردا 18-28 گرادۋس جىلىنى، ورتالىق جانە شىعىس وڭىرلەردە 20-33 گرادۋس جىلىنى، ال وڭتۇستىك جانە وڭتۇستىك-شىعىس بولىكتەردە 27-38 گرادۋس جىلىنى كورسەتەدى.
