دۋلات يسابەكوۆ: كەمەل توقايەۆ كەمەرىنەن اسپايتىن
كەمەل توقايەۆ قىزمەت پەن جازۋشىلىقتىڭ كەمەلىنە جەتىپ جۇرسە دە كەمەرىنەن ءبىر اسپايتىن. بۇل تۋرالى ق ر مەملەكەتتىك سىيلىعىنىڭ لاۋرەاتى، قازاقستاننىڭ ەڭبەك ەرى دۋلات يسابەكوۆ ايتتى، دەپ حابارلايدى قازاقپارات ءتىلشىسى.
«كەمەل توقايەۆپەن ەتەنە جاقىن بولدىم دەپ ايتا المايمىن. جازۋشىلار وداعىنداعى جيىنداردا كەزدەسىپ قالىپ، كەيدە قول الىسىپ امانداسىپ، كەيدە باس يزەسىپ قانا وتە شىعاتىنبىز. مەن كەمەكەڭمەن ونىڭ جوعارعى كەڭەستىڭ ۆەدومستۆوسىنىڭ رەداكتورى بوپ قىزمەت ىستەپ جۇرگەن كەزىنەن باستاپ تانىس-ءبىلىس بولا باستادىم. جوعارعى كەڭەستىڭ عيماراتى جازۋشىلار وداعىنىڭ ىرگەسىندە بولعاندىقتان، ول كىسى ادەبيەتشىلەر ۇيىندەگى جيىندارعا ۇزبەي قاتىسىپ جۇرەتىن. جوعارعى كەڭەستىڭ قىزمەتكەرى بولعاندىقتان، ول كىسىنى كورگەن بەتتە ەنتەلەپ بارىپ، امانداسا كەتۋدى ەرسى سانايتىنبىز. ىڭعايسىزدانامىز. قانشا دەگەنمەن جوعارعى كەڭەستىڭ قىزمەتكەرى عوي»، - دەيدى دۋلات يسابەكوۆ.
جازۋشىنىڭ كەمەل توقايەۆپەن «سىرتتاي» تانىستىعى بىرتە-بىرتە سىيلاستىققا اينالادى. ايتۋىنشا، وعان اۋىق-اۋىق باسپادان شىعىپ جاتقان جاڭا كىتاپتارى، قازاقستاننان، ماسكەۋدەن الىپ جاتقان سىيلىقتارى مەن ءار ءتۇرلى دارەجەدەگى ماراپاتتارى سەبەپ بولعان.
«قۇتتى بولسىن» دەپ قولىن العانىمىزدا باياعى سابىرلى قالپىنان تايماي «راقمەت» دەپ كۇبىرلەيتىن دە قوياتىن. ول كىسى جازۋشىلار وداعىنا كەلىپ-كەتىپ جۇرگەندە نەمەسە وداقتىڭ كەڭسەىشىلىك قىزمەتىن اتقارۋ بارىسىندا وزگەلەرمەن اقتارىلا سىرلاسىپ، اڭگىمەلەسىپ جۇرسە جۇرگەن شىعار، وداق قابىرعاسىندا مەنىڭ كەمەل اعامەن جاقىن تانىسۋىمنىڭ رەتى كەلمەپتى. مەنىڭ ول كىسىمەن جاقىنىراق ارالاسۋىم 70-جىلداردىڭ اياعى، 80-جىلداردىڭ باس كەزىندە، جازۋشىلاردىڭ شىعارماشىلىق ۇيىندە باستالدى. بۇل كەز - كەمەل اعانىڭ بارلىق قىزمەتتى اتقارىپ بولىپ، دەمالىسقا شىققان كەزى ەدى. كەمەل اعامەن جاقىنىراق تانىسىپ، اشىعىراق سويلەسۋدىڭ بارىسىندا ول كىسىنىڭ مەيلىنشە قاراپايىم، مەيلىنشە سىپايى، قىزمەت پەن جازۋشىلىقتىڭ كەمەلىنە جەتىپ جۇرسە دە كەمەرىنەن ءبىر اسپايتىن، ەسىل وزەنىندەي جايباراقات اعىسىنان ءبىر تانبايتىن مىنەزگە باي ادام ەكەنىنە كوزىم جەتتى»، - دەيدى دۋلات يسابەكوۆ.
ءبىراق، كەمەل توقايەۆ جاڭا كىتابى شىققاندا جۇرت سياقتى دابىرا قىلمايدى ەكەن.
«مەنىڭ جاڭا كىتابىم جارىققا شىقتى» دەپ جاريالاماي، ءۇنسىز عانا قابىلداي سالاتىن دا قوياتىن. وسىنداي كەزدىڭ بىرىندە:
- كەمەل اعا، جاڭا كىتابىڭىزدى مەملەكەتتىك سىيلىققا ۇسىنىپ كورمەيسىز بە؟ - دەگەنىمدە:
- ءاي، قويشى! ءسۇرىنىپ قالسام اتىما كىر كەلە مە دەپ قورقامىن.
- ءسىزدى كىم سۇرىندىرەدى؟ جۇرتتىڭ بارىمەن دوسسىز عوي.
- لەنين ايتقان عوي، «بەرەگي مەنيا وت درۋزەي، ا س ۆراگامي سام سپراۆليۋس» دەپ. دوس بوپ جۇرگەن ادامدار وزگەنىڭ اتىنىڭ ءوزىنىڭ اتىنان وزعانىن قالامايدى ەمەس پە؟ شىعارمامنىڭ بىرەۋىن ۇلكەن سىيلىققا ۇسىنامىن دەپ، دوستارىمنىڭ قاتارىن سيرەتىپ العىم كەلمەيدى. ماعان سىيلىقتان گورى دوستارىمنىڭ كوپ بولعانى جاقسى.
تەرەڭنەن قوزعاپ ايتىلعان مىناداي عيبراتى مول تىڭ ويعا تاڭدانىپ، ءۇنسىز قالعان ەدىم»، - دەپ ەسكە الدى.
ەسكە الۋ مەن ەستەلىكتەر دەگەندە دۋلات يسابەكوۆتى قاپى قالدىراتىن ەكى وي بار.
«ءبىر وكىنەرىم، جازۋشىلاردىڭ شىعارماشىلىق ۇيىندە اپتالاپ جاتقاندا سۋرەتكە ءتۇسۋ دەگەن ويىمىزعا كەلمەپتى-اۋ! كەمەل اعامەن بىرگە ع. مۇسىرەپوۆ، م. قاراتايەۆ، تاعى باسقا ۇلى ادامدار دا وسى ۇيدە دەمالىپ، جازۋ جازىپ جاتتى ەمەس پە؟ سولارمەن سۋرەتكە ءتۇسۋ نەگە ويىمىزعا كەلمەدى؟ بۇگىنگى كۇننىڭ ەرتەڭ تاريحقا اينالاتىنىنا ءمان بەرىپ ۇيرەنبەگەن ەسكى سالعىرتتىقتان قانشا وقىساق تا ارىلا الماپپىز-اۋ. ەكىنشى وكىنەرىم - كەمەل اعا ارامىزدان ەرتە كەتتى. پايعامبار جاسىندا. ءوزى تاربيەلەپ وسىرگەن ۇلىنىڭ بۇگىنگى تاڭدا ەل پرەزيدەنتى بولعانىن، جاي عانا پرەزيدەنت ەمەس، مادەنيەتتىلىگىمەن، قاراپايىمدىلىعىمەن، الەمنىڭ بەس تىلىندە ەركىن سويلەپ، سول تىلدە بايانداما جاساي الاتىندىعىمەن، وزگە پرەزيدەنتتەر سەكىلدى الىپ-ۇشپا پىكىردەن ءوزىن اۋلاق ۇستاي بىلەتىن تەكتىلىگىمەن ەرەكشە قۇرمەتكە بولەنىپ وتىرعانىن ەمەس، تىم بولماسا مينيستر بولعانىن دا كورە الماي، جەتتىم دەگەندە «جىعىلىپ» قالعانى وكىنىشتى-اق. امال قانشا؟! قازىر ويلايمىن، ەگەر كەمەل اعا بالاسىنىڭ پرەزيدەنت بوپ، الەمگە تانىلعان تۇلعاعا اينالعانىن كورە قالعان كۇننىڭ وزىندە باياعى مىنەزىنەن ءبىر دە ءبىر اينىماي، كەمەرىنەن اسىپ-توگىلمەي قاراپايىم ءومىرىن جالعاستىرا بەرەتىن سياقتى»، - دەيدى دۋلات يسابەكوۆ.
