دەكلاراتسيا: 2025 -جىلى قانداي وزگەرىستەر بولماق؟
استانا. قازاقپارات - 8 ميلليون قازاقستاندىق جالپىعا بىردەي دەكلاراتسيا تاپسىرۋدان بوساتىلماق. بۇل شەشىم ۇكىمەتتە قابىلداندى.
Massaget.kz ءتىلشىسى وسى ماسەلە توڭىرەگىندە شولۋ جاسادى.
2025-جىلى كىمدەر دەكلاراتسيا تاپسىرادى، كىمدەر تاپسىرمايدى؟
قازاقستان رەسپۋبليكاسىنىڭ شەتەلدە مۇلكى بار ازاماتتارى مەن رەزيدەنتتەرى؛
سايلانبالى جانە مەملەكەتتىك لاۋازىمدارعا كانديداتتار؛
بانكتىڭ، باعالى قاعازدار نارىعىنىڭ نەمەسە ساقتاندىرۋ ۇيىمدارىنىڭ ءىرى قاتىسۋشىسى مارتەبەسىنە ۇمىتكەر تۇلعالار؛
ءوز ەركىمەن دەكلاراتسيا تاپسىرعىسى كەلەتىن ازاماتتار.
قارجى ءمينيسترى ءمادي تاكيەۆتىڭ ايتۋىنشا، دەكلاراتسيانى 4,8 ميلليون ادام، سونىڭ ىشىندە مەملەكەتتىك قىزمەتشىلەر، كۆازيمەملەكەتتىك سەكتور وكىلدەرى، كاسىپكەرلەر جانە ولاردىڭ جۇبايلارى تاپسىرادى. سونداي-اق دەكلاراتسيانى قۇنى 20 مىڭ ا ە ك- تەن اساتىن مۇلىك ساتىپ العاندار (2024-جىلى 73,8 ميلليون تەڭگە)، شەتەلدە مۇلكى نەمەسە شەتەلدەگى بانكتەردە قاراجاتى بارلار تاپسىرادى.
مەملەكەتتىك كىرىستەر كوميتەتى جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ باسشىسى دينا قۇسايىنوۆانىڭ سوزىنشە، شەتەلدە جىلجىمايتىن مۇلكى مەن كولىگى جوق، شەتەلدىك بانكتەردەگى شوتتارىندا 1000 ا ە ك- تەن (2024-جىلى 3692000 تەڭگە) اساتىن قاراجاتى جوق ازاماتتار اكتيۆتەر مەن مىندەتتەمەلەر تۋرالى دەكلاراتسيا تاپسىرۋدان بوساتىلادى. الايدا شەتەلدەگى اكتيۆتەردىڭ جالپى سوماسى 3,7 ميلليون تەڭگەدەن اسقان جاعدايدا قازاقستاندىقتار دەكلاراتسيا تاپسىرۋعا مىندەتتى.
دەكلاراتسيا تاپسىرۋدان بوساتىلعاندار قاتارىنا جەكە قۇرىلىمداردىڭ قىزمەتكەرلەرى، زەينەتكەرلەر، ءۇي شارۋاسىنداعى ايەلدەر، ستۋدەنتتەر جانە باسقا دا ازاماتتار بار. دەگەنمەن ءاربىر قازاقستاندىق ءوز قالاۋىمەن دەكلاراتسيا تاپسىرۋعا قۇقىلى.
باي-باعلاندار مۇلىكتەرىن تۋىستارىنا اۋدارا المايدى
قارجى ءمينيسترىنىڭ ايتۋىنشا، باي-باعلاندار دەكلاراتسيا تاپسىرمايتىن تۋىستارىنىڭ اتىنا دۇنيە- مۇلكىن جازا المايدى. زەينەتكەر نەمەسە ەكى ءجۇز مىڭ تەڭگە كولەمىندە ورتاشا تابىس تاباتىن ادام قۇنى ايلىعىنا ساي كەلمەيتىن زاتتار السا، سالىق قىزمەتكەرلەرى دەرەۋ تەكسەرىس جۇرگىزەدى.
«كەلەسى جىلدان باستاپ ءوز مۇلىگىڭدى بىرەۋدىڭ اتىنا جازا المايسىڭ. جازساڭىز، ول كىسى قايدان العانىن كورسەتۋى كەرەك. قاراپايىم كىسى بولىپ جۇرسە، 100-200 ميلليوندى قايدان الدى دەگەن سۇراق تۋىندايدى. زەينەتكەر دە مۇلىك ساتىپ السا، قايدان ساتىپ العانىن كورسەتۋى كەرەك. ءبىز ونى كورەمىز. زەينەتاقىسى مىناداي، قاي جەردەن الدى دەگەن سۇراق تۋىندايدى»، - دەدى مينيستر.
74 ميلليون تەڭگەدەن اساتىن يپوتەكا العاندا دەكلاراتسيا تاپسىرۋ قاجەت پە؟
يپوتەكا سوماسى 20 000 ا ە ك- تەن اسىپ كەتكەن جاعدايدا تولىق سومانى كورسەتۋ كەرەك. مىسالى، 40 ميلليون تەڭگە - ءوز قاراجاتىڭىز. 40 ميلليون تەڭگە - بانكتەن الىنعان قارىز. ەكى كوزدى دە دەكلاراتسيادا كورسەتۋ مىندەتتەلەدى.
مۇعالىمدەر، پوليتسەيلەر دەكلاراتسيا تاپسىرا ما؟
مۇعالىمدەر مەن پوليتسيا قىزمەتكەرلەرى مەملەكەتتىك قىزمەتكەر ساناتىنا جاتپايتىندىقتان، بۇل تالاپتان بوساتىلادى.
قانداي ستۋدەنتتەر مەن زەينەتكەرلەر دەكلاراتسيا تاپسىرادى؟
مەملەكەتتىك كىرىستەر كوميتەتى جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ باسشىسى دينا قۇسايىنوۆا بۇعان دەيىن «زەينەتكەرلەر مىندەتتى دەكلاراتسيانى تاپسىرۋى كەرەك پە؟» دەگەن سۇراققا جاۋاپ بەردى.
«بىزدە شەتەلدە مۇلكى بار زەينەتكەرلەر بار. سوندىقتان زەينەتكەردىڭ قازاقستان رەسپۋبليكاسىنان تىس جەردە مۇلكى بولماسا جانە دەكلاراتسيا تاپسىراتىن نيەتى دە بولماسا، وندا ول دەكلاراتسيا تاپسىرماۋىنا بولادى»، - دەپ ءتۇسىندىردى قۇسايىنوۆا.
مەملەكەتتىك كىرىستەر دەپارتامەنتى وكىلى وسىنداي ەرەجە ستۋدەنتتەرگە دە قولدانىلاتىنىن ايتتى.
«كەيبىر ستۋدەنتتەر بىزدەن كوپ اقشا تابادى، شەتەلدە ەسەپشوتتارى بار. ەگەر ونىڭ شەتەلدىك شوتى بولسا، وندا ول دەكلاراتسيا تاپسىرۋعا مىندەتتى»، - دەدى ول.
تاعى كىمدەر نىساناعا ىلىگۋى مۇمكىن؟
بۇعان دەيىن قارجى ءمينيسترى ءمادي تاكيەۆ قىمبات جىلجىمايتىن مۇلىك پەن كولىك ساتىپ الاتىن قازاقستاندىقتار نىساناعا ىلىگۋى مۇمكىن ەكەنىن ايتتى. ياعني جەكە تۇلعا زاڭ بويىنشا تابىسى تۋرالى دەكلاراتسيا تاپسىرۋعا مىندەتتى بولماسا، ءبىراق ءبىراز ۋاقىتتان كەيىن قىمبات مۇلىك ساتىپ السا، مەملەكەت وعان نازار اۋدارادى.
مەملەكەتتىك قىزمەتشىلەردىڭ دەكلاراتسيالارى جاريالانا ما؟
قارجى ءمينيسترى بۇعان دەيىن قازاقستاندىقتار مەملەكەتتىك قىزمەتشىلەردىڭ قانداي مۇلىككە يە ەكەنىن كورە الاتىنىنا ۋادە بەردى.
«بۇل نورما قالادى. بۇل نورمانى العاشىندا سىبايلاس جەمقورلىققا قارسى قىزمەت اگەنتتىگى ۇسىنعان، بۇل نورما ۋادە ەتكەندەي بۇگىنگى كۇنگە دەيىن ساقتالادى. ۇمىتقان جوقپىن»، - دەپ جاۋاپ بەردى بۇعان دەيىن ءمادي تاكيەۆ ءماجىلىس دالىزىندە.
قانداي اكتيۆتەر دەكلاراتسيالانۋى قاجەت؟
جىلجىمايتىن مۇلىك، كولىك؛
شەتەلدىك كومپانيالارداعى نەمەسە تۇرعىن ءۇي قۇرىلىسىنداعى ۇلەستەر؛
شەتەلدىك بانكتەردەگى سوماسى 1000 ا ە ك- تەن اساتىن اقشا؛
باعالى قاعازدار،
بروكەرلىك شوتتارداعى قاراجات؛
زياتكەرلىك مەنشىك، اۆتورلىق قۇقىق نىساندارى؛
سيفرلىق اكتيۆتەر؛
دەبيتورلىق/كرەديتورلىق بەرەشەك؛
ينۆەستيتسيالىق جانە باعالى مەتالدار؛
قۇنى 1000 ا ە ك- تەن اساتىن مۇلىك (مىسالى، انتيكۆاريات، ءساندى زاتتار).
دەكلاراتسيانى e-Salyq Azamat موبيلدى قوسىمشاسى، ەلەكترون ۇكىمەت پورتالى (egov.kz) سالىق تولەۋشىنىڭ كابينەتى (cabinet.salyk.kz) ارقىلى تاپسىرۋعا بولادى.
«ەرىكتى» دەكلاراتسيانى قايتا تاپسىرۋ مىندەتتەلە مە؟
قازاقستاندىقتار تابىسى تۋرالى دەكلاراتسيانى ءوز ەركىمەن تاپسىرۋدى ۇيعارسا، ونى كەلەسى جىلى قايتا تاپسىرۋدىڭ قاجەتى جوق. ءبىراق بۇعان تىيىم سالىنبايدى. مينيستر بۇل ادام ءبىراز ۋاقىتتان كەيىن قىمبات مۇلىك ساتىپ السا، ول دەكلاراتسيا تاپسىرۋ مىندەتتى ادامدار تىزىمىنە ەنەتىنىن ەسكە سالدى.
ايتا كەتەيىك، دەكلاراتسيانى ۋاقىتىلى ۇسىنباعانى ءۇشىن اكىمشىلىك جاۋاپكەرشىلىك قاراستىرىلعان.
دەكلاراتسيالاۋ قاشان باستالدى؟
قازاقستاندا جالپىعا بىردەي دەكلاراتسيالاۋ يدەياسى العاش رەت 2007-جىلى كوتەرىلدى. بۇل باستاما ازاماتتاردىڭ تابىسى مەن شىعىنىن اشىق كورسەتۋ ارقىلى كولەڭكەلى ەكونوميكانى ازايتىپ، سالىق بويىنشا ادىلدىكتى قامتاماسىز ەتۋدى ماقسات ەتتى.
2021-جىلدان باستاپ دەكلاراتسيالاۋ كەزەڭ-كەزەڭمەن ەنگىزىلدى. العاشقى كەزەڭدە مەملەكەتتىك قىزمەتكەرلەر، ولاردىڭ جۇبايلارى، ۇلتتىق كومپانيالار مەن كۆازيمەملەكەتتىك سەكتور باسشىلارى ەسەپ تاپسىرا باستادى. كەيىن بۇل تالاپ جەكە كاسىپكەرلەر مەن زاڭدى تۇلعالاردىڭ قۇرىلتايشىلارىنا تارادى.
دەكلاراتسيالاۋدىڭ باستى ماقساتى - ەل ىشىندەگى تابىس پەن مۇلىكتىڭ زاڭدىلىعىن قاداعالاۋ، سالىق تۇسىمدەرىن ارتتىرۋ جانە ەكونوميكالىق تۇراقتىلىقتى قامتاماسىز ەتۋ. الايدا تاجىريبە بارىسىندا بارلىق ازاماتتى مىندەتتى دەكلاراتسيالاۋدىڭ قاجەتى جوق ەكەنى انىقتالعان.
