دجەي لونىڭ استاناداعى كونسەرتى قالاي ءوتتى
استانا. KAZINFORM - امەريكالىق پوپ-جۇلدىز دجەننيفەر لوپەس «استانا ارەنا» ستاديونىندا جەكە كونسەرت بەردى.
الەمدىك جۇلدىز ەلوردا حالقى مەن قوناقتارىن 2 ساعاتقا جۋىق ونەرىمەن ءتانتى ەتتى.
كورەرمەندەردىڭ كوزىنەن ەنەرگيا مەن ۇمىتىلماس اسەر بايقالدى. جينالعان جۇرت كونتسەرتتىڭ سوڭىنا دەيىن انشىمەن قوسىلا ءان ايتىپ، بي بيلەدى.
كونسەرت بارىسىندا بايقالعان ەرەكشە ءسات، دجەننيفەر لوپەس ءالسىن-ءالسىن العىس ءبىلدىرىپ، تىڭدارماندارىن جاقسى كورەتىنىن ءجيى ايتتى.
تاعى ءبىر ايتا كەتەتىن جايت، ستاديون كورەرمەنگە لىق تولدى.
سونداي-اق الەمدىك ونەرپاز شوۋ بارىسىندا بىرنەشە رەت ساحنالىق وبراز اۋىستىردى.
كەش سوڭىندا جۇلدىز جانكۇيەرلەردىڭ قاسىنا بارىپ ەستەلىك فوتوعا ءتۇسىپ، جىلى لەبىزىن ءبىلدىردى.
ەلوردا اكىمدىگىنىڭ مالىمەتىنشە، دجەننيفەر لوپەستىڭ شوۋىنان كەيىن كورەرمەن قاۋىم ەكولوگيالىق باستاما كوتەردى. كونسەرت اياقتالعان سوڭ جۇرت تريبۋنادان كەتىپ قالماي، ستاديونداعى قوقىستى جيناپ، مادەنيەت پەن جاۋاپكەرشىلىك دەڭگەيىن كورسەتتى. اكسياعا ەلوردا تۇرعىندارىنىڭ سۇيىكتى كەيىپكەرىنە اينالعان تازابەك تە قوسىلدى.
ايتا كەتەيىك، «استانا كونسەرت» كومپانياسىنىڭ پروديۋسەرى مالىك حاسەنوۆ امەريكالىق اكتريسا جانە ءانشى دجەننيفەر لوپەستىڭ استانادا وتەتىن كونسەرتىنەن قانشا ەكونوميكالىق پايدا تۇسەتىنىن ايتىپ بەردى.
ەسكە سالايىق، استانادا Jennifer Lopez كونسەرتى كەزىندە شاتتل-مارشرۋتتار ىسكە قوسىلدى.
سونداي-اق الماتىعا دجەننيفەر لوپەستىڭ كونسەرتىن تاماشالاۋعا 29 ەلدەن كورەرمەن كەلەدى دەپ كۇتىلەدى.
