دجوردجا مەلوني: قازاقستان - ورتالىق ازياداعى ماڭىزدى ارىپتەس

استانا. KAZINFORM - مەملەكەت باسشىسى مەن يتاليا پرەمەر-ءمينيسترى ەلوردا اۋەجايىندا از-كەم اڭگىمەلەستى، دەپ حابارلايدى اقوردانىڭ باسپا ءسوز قىزمەتى.

قاسىم-جومارت توقايەۆ يتاليا-قازاقستاننىڭ ەۋروپاداعى جەتەكشى ساۋدا سەرىكتەستەرىنىڭ ءبىرى ەكەنىن ايتتى.

- ءسىزدى قازاقستاندا قارسى الۋ - ءبىز ءۇشىن ۇلكەن مارتەبە. الداعى كەلىسسوزدەر ەكىجاقتى قارىم-قاتىناستارىمىزعا تىڭ سەرپىن بەرۋدە ماڭىزدى، ءتىپتى، شەشۋشى ءرول اتقاراتىنىنا سەنىمدىمىن. يتاليا - قازاقستاننىڭ ەۋروپاداعى جەتەكشى ساۋدا سەرىكتەستەرىنىڭ ءبىرى. كەشەلى - بۇگىن استانادا يتاليا بيزنەسىنىڭ كوپتەگەن وكىلىنىڭ قاتىسۋىمەن بيزنەس-فورۋم ءوتتى. ەكى ەل اراسىنداعى ىسكەرلىك بايلانىستاردى دامىتۋعا قوسقان ۇلەسىڭىزدى جوعارى باعالايمىز، - دەدى توقايەۆ.

ءوز كەزەگىندە دجوردجا مەلوني بۇل باسقوسۋ ايماقپەن قارىم-قاتىناستاعى تاريحي ءسات بولاتىنىن اتاپ ءوتتى.

- ءسىزدىڭ ەلىڭىزگە العاش رەت كەلىپ وتىرمىن. وتە قۋانىشتىمىن. ءوزىڭىز ايتقانداي، ەكى ەلدىڭ قارىم-قاتىناسى وتە جاقسى. الايدا بۇدان دا جوعارى ناتيجەگە قول جەتكىزۋگە ءاردايىم مۇمكىندىك بار. ءبىز قازاقستاندى يتاليانىڭ، سونداي-اق ەۋروپانىڭ ماڭىزدى سەرىكتەسى رەتىندە قاراستىرامىز. سونىمەن قاتار قازىرگى كەزدە ورتالىق ازيا ءوڭىرى ستراتەگيالىق مانگە يە بولدى. مەملەكەتتەر باسشىلارى دەڭگەيىندە ءبىرىنشى «يتاليا - ورتالىق ازيا» سامميتىن ۇيىمداستىرعانىڭىز ءۇشىن سىزگە ريزاشىلىعىمدى بىلدىرەمىن. بۇل باسقوسۋ ايماقپەن قارىم-قاتىناسىمىزداعى تاريحي ءسات بولادى دەپ ويلايمىن. قازىرگى سىندارلى كەزەڭدە ءبىز ءۇشىن بارلىق دەڭگەيدە ىنتىماقتاستىق ورناتۋ وتە وزەكتى، - دەدى يتاليا پرەمەر-ءمينيسترى.

بۇعان دەيىن مەملەكەت باسشىسى قازاقستانعا رەسمي ساپارمەن كەلگەن يتاليا پرەمەر-ءمينيسترى دجوردجا مەلونيدى ەلوردا اۋەجايىنان قارسى العانىن جازدىق.