دجو بايدەن باس بوستاندىعىنان ايىرىلۋى مۇمكىن

ا ق ش- تىڭ رەسپۋبليكالىق ساياسي پارتياسى باقىلايتىن وكىلدەر پالاتاسى پرەزيدەنت دجو بايدەنگە يمپيچمەنت جاريالاۋعا داۋىس بەردى. بۇعان ونىڭ ۇلى حانتەر بايدەننىڭ بيزنەسى تۇرتكى بولدى.

ساياسي ۇيىم وكىلدەرى بالاسى اكەسىنىڭ بەدەلىن پايدالانىپ، جالعان كاسىپپەن اينالىستى دەپ ايىپ تاعىپ وتىر.
رەسپۋبليكالىق پارتيا وكىلدەرى دەموكرات دجو بايدەنگە سەنىمسىزدىك تانىتۋعا بۇرىننان اسىق. وكىلدەر پالاتاسى جىلدىڭ باسىندا كوميتەت دەڭگەيىندە پرەزيدەنت پەن ونىڭ ۇلىنا قاتىستى تەرگەۋدى باستاپ كەتكەن ەدى.
دجو بايدەندى 2009-2017-جىلدارى ا ق ش پرەزيدەنتى باراك وبامانىڭ ورىنباسارى بولعان كەزدە بيلىگىن پايدالانىپ، ۇلى حانتەرگە شەتەلدە بيزنەس جۇرگىزۋگە كومەكتەستى، ءارى سودان زاڭسىز اقشا تاپتى دەپ ايىپتاپ وتىر. ال بۇگىنگى قارار ءىستى كونگرەسس دەڭگەيىندە جۇرگىزۋگە مۇمكىندىك بەرەدى. حانتەر بايدەن جابىق تىڭداۋدا ونىڭ بيزنەسىنە قاتىستى كۋالىك بەرۋ تالابىن ەلەمەدى. رەسپۋبليكاشىلار ونى كونگرەستى قۇرمەتتەمەگەنى ءۇشىن جاۋاپقا تارتۋ ءۇشىن شارالار قابىلدايتىندارىن، ءتىپتى باس بوستاندىعىنان ايىرىلۋى مۇمكىن ەكەنىن ايتتى.
دجەيمس كومەر، وكىلدەر پالاتاسىنىڭ دەپۋتاتى:
- ءبىز دالەلدەردى جيناۋ ءۇشىن بىرنەشە اي تەرگەۋ جۇرگىزدىك. بايدەن وتباسىنىڭ ارەكەتتەرى شىنىمەن الاڭداتارلىق. ولار ءبىزدىڭ جاۋلارىمىزدان ميلليونداعان دوللار العان. بۇل جايلى قاراپايىم امەريكالىقتار بىلۋگە قۇقىلى. بۇگىن ءبىز اق ۇيگە ناقتى ءارى انىق حابار جىبەردىك. ەندى سۇراعان قۇجاتتارىمىزدى بەرىپ، تەرگەۋگە شاقىرعاندا كەلەدى دەپ ويلايمىز.
كونگرەسس تەرگەۋشىلەرى قىرىق مىڭداي بانك جازبالارىن جانە نەگىزگى كۋاگەرلەردەن ون مىڭ ساعاتتاي كۋالىك جازىپ العان. الايدا دەموكراتتار پرەزيدەنت بالاسىنىڭ بيزنەسىنە بولىسقانىن دالەلدەيتىن ايعاق جوق دەيدى. بايدەننىڭ ۇلى حانتەر دە بۇگىن كونگرەستىڭ جانىندا وتكىزگەن باسپا ءسوز ءماسليحاتىندا رەسپۋبليكاشىلار ونى سىناۋ ارقىلى اكەسىنىڭ ساياسي بەدەلىنە نۇقسان كەلتىرمەك دەپ مالىمدەدى.
حانتەر بايدەن، پرەزيدەنت دجو بايدەننىڭ ۇلى:
- التى جىل بويى مەن ترامپتىڭ شابۋىل ماشيناسىنىڭ نىسانى بولدىم. ولار مەنى قارالۋ ءۇشىن بانك جازبالارىن، مەن جىبەرگەن ماتىندەردى، دوستارىم مەن بۇرىنعى ىسكەر سەرىكتەستەرىمنىڭ ايعاقتارىن ءوز ىڭعايىنا قاراي وزگەرتىپ، فاكتىلەردى بۇرمالادى. ولار ماعان جالا جاپتى. تۋراسىن ايتايىن: اكەمنىڭ مەنىڭ بيزنەسىمە ەش قاتىسى بولمادى.
كونگرەسس رەسمي تەرگەۋىن باستاپ كەتتى، ءتىپتى بايدەننىڭ ۇلىنا شاقىرتۋ دا جىبەرىپ قويدى. ونى ەندى سۇراقتىڭ استىنا الماق. بۇعان دەيىن دەپۋتاتتاردىڭ سۇراۋلارىن ەلەمەي كەلگەن پرەزيدەنت اكىمشىلىگى دە ەندى كونگرەستىڭ تالابىن ورىنداۋعا مىندەتتى بولماق. دەگەنمەن، ساراپشىلار رەسپۋبليكاشىلدار بايدەندى بيلىگىنەن تايدىرا الامايدى دەپ وتىر. سەبەبى، دەموكراتتاردىڭ باقىلاۋىنداعى سەنات ونى اقتاپ الارى ءسوزسوز. ءبىراق، سىبايلاس جەمقورلىقپەن بايلانىستى بۇل داۋ كەلەر جىلى وتەتىن پرەزيدەنت سايلاۋىنىڭ ناتيجەسىنە كەرى اسەر ەتۋى مۇمكىن.
اۆتورى: ايجان سىدىقوۆا
www.24.kz