دجەننيفەر لوپەس استاناعا كەلدى
استانا. KAZINFORM - الەمگە تانىمال جۇلدىز «استانا ارەنا» ستاديونىندا جەكە كونسەرتىن بەرەدى.
دجەي لو مىنگەن جەكە ۇشاق مىسىردان شىعىپ، تۇنگى ساعات ەكىدە استانا اۋەجايىنا قوندى.
ايتا كەتەيىك، الەمگە ايگىلى امەريكالىق ءانشى، اكتريسا دجەننيفەر لوپەس 10-تامىز كۇنى الماتىدا جەكە كونسەرتىن بەرمەكشى. بۇل - لوپەستىڭ قازاقستانداعى ەكىنشى كونسەرتى بولماق.
ال بۇگىن Jennifer Lopez-دىڭ كونسەرتىنە وراي كورەرمەندەردىڭ ىڭعايلىعى جەتۋى جانە كولىك كەپتەلىسىن ازايتۋ ماقساتىندا وسى كۇنى ارنايى شاتتل-مارشرۋتتار قاتىنايدى.
ايتا كەتەيىك، دجەي لونىڭ كومانداسى قازاقستانعا بۇدان بۇرىن كەشە كەلگەن بولاتىن.
بۇل تۋرالى ءانشىنىڭ ارىپتەسى Instagram-داعى پاراقشاسىندا ءبولىستى. امەريكالىق ونەرپازداردى قوناق ۇيدە قازاقتىڭ ۇلتتىق تاعامدارىمەن قارسى العان.
- مەن ومىرىمدە تالاي قوناقۇيدە بولدىم. ءبىراق بۇل قوناق ءۇي ەرەكشە ۇنادى. بولمەنىڭ كولەمى دە تاڭعالارلىق. بۇگىن قالاي راقاتتانىپ ۇيىقتايتىنىمدى ەلەستەتىپ تۇرمىن. ال، تەرەزەدەن قاراعانداعى كورىنىس ءتىپتى عاجاپ. كەيىنگى كۇندەرى ايالداعان قوناقۇيلەردىڭ ىشىندە ماعان ەڭ ۇناعانى وسى-اۋ، شاماسى. قازاقستان وسىنداي اسەر سىيلايدى دەپ كىم ويلاعان؟ راس ايتام. اۋا رايى دا ءمىنسىز. دالادا شامامەن 72°F (22°C) . كەرەمەت. قازاقستان ماعان قاتتى ۇنادى، - دەيدى شەرون يانگبلاد.
ايتا كەتەيىك، دجەننيفەر لوپەستىڭ قازاقستان استاناسىنداعى ونەر كورسەتۋى ونىڭ «Up All Night» الەمدىك تۋرنەسىنىڭ ءبىر بولىگى بولماق. كونسەرتكە 50 مىڭنان استام كورەرمەن كەلەدى دەپ كۇتىلىپ وتىر.
ەسكە سالساق، بۇعان دەيىن «استانا ارەنادا» دجەي لونىڭ كونسەرتىنە سوڭعى دايىندىق جۇمىستارى جۇرگىزىلىپ جاتقانىن حابارلاعان ەدىك.
