داۋىس بەرۋ قازاقستاننىڭ ىشكى زاڭناماسىنا سايكەس ءوتىپ جاتىر - حالىقارالىق بايقاۋشى

استانا. KAZINFORM – ت م د ەلدەرى اتىنان كەلگەن حالىقارالىق بايقاۋشى لەونيد انفيموۆ اتوم ەلەكتر ستانسياسىن سالۋ بويىنشا رەسپۋبليكالىق رەفەرەندۋمنىڭ ءوتۋ بارىسىنا قاتىستى پىكىر ءبىلدىردى.

«ازەربايجان، بەلارۋس، قىرعىزستان، تاجىكستان، وزبەكستان جانە رەسەي فەدەراتسياسىنان 74 ادام اككرەديتتەلگەن، ودان بولەك ميسسيانىڭ قۇرامىنا ت م د اتقارۋ كوميتەتىنىڭ قىزمەتكەرلەرى كىرەدى»، - دەدى لەونيد انفيموۆ.

حالىقارالىق بايقاۋشى اتاپ وتكەندەي، حالىقارالىق ميسسيالاردىڭ قىزمەتكەرلەرى رەفەرەندۋم وتكىزۋ جونىندەگى ورتالىق كوميسسيانىڭ قىزمەتكەرلەرىمەن بىرنەشە رەت كەزدەسىپ، رەفەرەندۋم وتكىزۋ جونىندەگى ۋچاسكەلىك جانە وكرۋگتىك كوميسسيالارعا باردى. ولار رەفەرەندۋم وتكىزۋگە جوعارى دايىندىق بولعانىن اتاپ ءوتتى.

«رەفەرەندۋم وتكىزۋ جونىندەگى ورتالىق كوميسسيا اۋقىمدى جۇمىس اتقارعانىن اتاپ ءوتۋ كەرەك. رەفەرەندۋم جاريالانعان كۇننەن باستاپ ءبىر اي ىشىندە ۋچاسكەلىك كوميسسيالاردىڭ قىزمەتكەرلەرىن وقىتۋ، ترەنينگتەر، سەمينارلار وتكىزۋ، تەحنيكالىق جاراقتاندىرۋ، رەفەرەندۋمدا داۋىس بەرۋشىلەردىڭ ءتىزىمىن جاساۋ بويىنشا وراسان زور ۇيىمداستىرۋشىلىق-تەحنيكالىق جۇمىس جۇرگىزىلدى. رەفەرەندۋمعا جان-جاقتى دايىندالعان دەۋگە بولادى»، - دەيدى ول.

ت م د ەلدەرىنەن كەلگەن بايقاۋشىلار (74 ادام) ەلىمىزدىڭ 9 وڭىرىندەگى داۋىس بەرۋ ۋچاسكەلەرىندە ءجۇر. ولار اقمولا، شىعىس قازاقستان، باتىس قازاقستان، ماڭعىستاۋ، تۇركىستان وبلىسى جانە استانا، الماتى مەن شىمكەنت قالاسى.

ت م د بايقاۋشىلارى شاڭحاي ىنتىماقتاستىق ۇيىمىنىڭ، تۇركى مەملەكەتتەرى ۇيىمىنىڭ جانە ا و س ش ك وكىلدەرىمەن تىعىز بايلانىستا جۇمىس ىستەيدى.

«داۋىس بەرۋ رەفەرەندۋمدار مەن سايلاۋ ناۋقاندارىن وتكىزۋدى رەگلامەنتتەيتىن قازاقستان رەسپۋبليكاسىنىڭ ىشكى زاڭناماسىنا سايكەس ءوتىپ جاتىر. زاڭ بۇزۋشىلىقتار جوق. مەنىڭ ويىمشا، قازاقستان رەسپۋبليكاسىنداعى بۇعان دەيىن وتكەن سايلاۋ ناۋقاندارىنا باقىلاۋ جۇرگىزۋ تاجىريبەمىزگە سۇيەنسەك، زاڭ بۇزۋشىلىق بولمايدى دەپ ويلايمىن. رەفەرەندۋم ۇيىمداسقان، تىنىش جانە بەلسەندى وتۋدە»، - دەپ تولىقتىردى ل. انفيموۆ.

بۇعان دەيىن ق ر سىرتقى ىستەر مينيسترلىگى شەتەلدەگى ازاماتتارىمىزدىڭ داۋىس بەرۋى بەلسەندى ءوتىپ جاتقانىن مالىمدەگەن ەدى.

اۆتور

داۋلەت ىزتىلەۋ