«دايديداۋ» ءانىنىڭ تاريحى تۋرالى كىتاپ 4 تىلدە جارىق كوردى
استانا. KAZINFORM - «دايديداۋ» ءانىنىڭ تاريحىنا ارنالعان كىتاپ ءتورت تىلدە جارىق كوردى. اۆتور ابىلاي ماۋدان «بۇگىن LIVE» باعدارلاماسىنا قاتىسىپ، شىعارمانىڭ جازىلۋ تاريحىمەن ءبولىستى.
- بۇل شىعارمانى 2005-جىلى جازدىم. 2004-جىلى قىدىربەك دەگەن دوسىممەن جينالدىق. ول جەردە ىقىلاس وجاي سىندى تاعى دا ءبىر توپ ازامات بولدى. مەن ول كەزدە ستۋدەنت ەدىم. ولار «دايديداۋ» ءانى جايلى قىزىقتى اڭگىمە ايتىپ وتىر ەكەن. بۇل وقيعا كوپكە دەيىن ەسىمنەن كەتپەي، كەيىن جازۋعا وتىردىم. سول جازبا سول كەزەڭدە گازەتتەردە جارىق كوردى. جىل سايىن ماعجان جۇمابايەۆتىڭ تۋعان كۇنىندە الەۋمەتتىك جەلىگە سالىپ ءجۇردىم. ءبىراق ونى ەشكىم وقىمايتىن. دوستارىم: «مىنا شىعارماڭىز ەرەكشە عوي، نەگە وقىلمايدى؟» دەپ ايتاتىن. وسىدان كەيىن ءوز-وزىمە دەگەن سەنىمسىزدىك پايدا بولدى. كەيىن بۇل شىعارما بىرنەشە بايقاۋعا قاتىسىپ، جەڭىمپاز اتاندى. ءبىر كۇنى كەزدەيسوق ديماشتىڭ ۇيىنە باردىم. سول جەردە «دايديداۋ» مەيرامحاناسىن جانە ونىڭ ىشىندە اتتاس برەندتىك بۇيىمدار ساتىلىپ جاتقانىن كوردىم. سودان كەيىن ديماشتىڭ اكەسىنە وسى شىعارمام تۋرالى ايتىپ، ول كىسى قولداپ، جوبانى ماعان سەنىپ تاپسىردى، - دەيدى جازۋشى، قازاقستان جازۋشىلار وداعىنىڭ مۇشەسى.
كىتاپ قازاق، ورىس، اعىلشىن جانە تۇرىك تىلدەرىندە جارىق كوردى. نەگىزگى ماقسات - «دايديداۋ» ءانىنىڭ تاريحىن الەمگە تانىتۋ.
- نەگىزى، ب ۇ ۇ- نىڭ 6 تىلىنە اۋدارىپ، جەتىنشى ءتىل رەتىندە قازاق ءتىلىن قوسايىق دەگەن نيەتىمىز بولدى. ءبىراق ازىرگە ءتورت تىلمەن شەكتەلدىك، ويتكەنى بۇل جۇمىستى جالعىز ءوزىم اتقاردىم. الەۋمەتتىك جەلىدەگى بايقاۋلارىم بويىنشا، الەمنىڭ كوپتەگەن ەلدەرىندە بەلسەندى جۇمىس ىستەيتىن ديماشتىڭ فاناتتارى بار. ولار وسى كىتاپتى اسىعا كۇتىپ وتىر، - دەيدى اۆتور.
ابىلاي ماۋدان بۇل تۋىندىنى العاش رەت ديماشتىڭ فان-كەزدەسۋىندە ساتىلىمعا شىعارماق.
- 26-مامىر كۇنى الماتىدا ديماشتىڭ فاناتتارىمەن كەزدەسۋى وتەدى. ءبىزدىڭ مالىمەتىمىز بويىنشا، شەتەلدەن 1500 گە جۋىق جانكۇيەر كەلەدى ەكەن. ءبىز سول جەردە كىتاپتى جاپپاي ساتىلىمعا شىعارۋدى جوسپارلاپ وتىرمىز. بۇل كىتاپ نەگىزىنەن قازاق وقىرماندارىنا ەمەس، شەتەلدىك جانكۇيەرلەرگە ارنالعان. ولار «دايديداۋ» ءانىن جاقسى بىلەدى. ءتىپتى رەسەيلىك جۋرناليستەر دە بۇل تۋرالى ايتىپ ءجۇر. سول سەبەپتى ءبىز دە وزىمىزدەگى دۇنيەلەردى كورسەتىپ، وزگە تىلدەگى وقىرماندارعا جەتكىزۋدى ماقسات ەتتىك. وسى كىتاپ ارقىلى ولار ءاننىڭ تاريحىمەن تانىسىپ، ۇلتتىق قۇندىلىقتارىمىزدى تانيدى، - دەدى ابىلاي ماۋدان.
ايتا كەتەيىك، جاقىندا ديماش قۇدايبەرگەن «تاۋ ىشىندە» انىنە بەينەبايان تۇسىرگەن ەدى.
ودان بولەك، برازيليادا ديماشتىڭ سۋرەتىمەن بەزەندىرىلگەن اۆتوبۋستار پايدا بولدى.
