پەداگوگتەردى الەۋمەتتىك جاعىنان قولداۋدىڭ قانداي تەتىكتەرى بار

استانا. KAZINFORM - پەداگوگتەردى الەۋمەتتىك جاعىنان قولداۋدىڭ قانداي ءىس-شارالارى ەسكەرىلگەن؟ مۇعالىمدەرگە قانداي جەڭىلدىكتەر قاراستىرىلعان؟ بۇل سۇراقتارعا وقۋ-اعارتۋ مينيسترلىگى جاۋاپ بەردى.

- سالالىق زاڭنىڭ 12-بابىنا سايكەس، پەداگوگتەرگە بەرىلەتىن الەۋمەتتىك كومەكتەر بەلگىلەنگەن. اتاپ ايتقاندا، تۇرعىنجايعا، ونىڭ ىشىندە قىزمەتتىك تۇرعىنجايعا جانە جاتاقحاناعا، جەكە تۇرعىن ءۇي قۇرىلىسى ءۇشىن جەر ۋچاسكەلەرىنە كەپىلدىك بەرىلەدى. اۋىلدى ەلدى مەكەندەردە كاسىپتىك قىزمەتىن جۇزەگە اسىراتىن پەداگوگتەرگە جەكە تۇرعىن ءۇي قۇرىلىسى ءۇشىن جەر ۋچاسكەلەرىن بەرۋ زاڭنامادا كوزدەلگەن باسىمدىق تارتىپپەن جۇزەگە اسىرىلادى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

اۋىلداعى مۇعالىمگە: جەرگىلىكتى وكىلدى ورگانداردىڭ شەشىمى بويىنشا قالا جاعدايىندا كاسىپتىك قىزمەتىن جۇزەگە اسىراتىن پەداگوگتەردىڭ ستاۆكالارىمەن سالىستىرعاندا ايلىق اقىلار مەن تاريفتىك ستاۆكالار كەمىندە جيىرما بەس پايىزعا ارتتىرىلىپ بەلگىلەنەدى. جەرگىلىكتى وكىلدى ورگاندار بەكىتكەن تارتىپپەن جانە مولشەردە بيۋدجەت قاراجاتى ەسەبىنەن كوممۋنالدىق كورسەتىلەتىن قىزمەتتەرگە اقى تولەۋ جانە وتىن ساتىپ الۋ بويىنشا الەۋمەتتىك قولداۋ كورسەتىلەدى.

سونىمەن قاتار اۋىلدا تۇرۋ ءۇشىن كەلگەن پەداگوگكە جەرگىلىكتى وكىلدى ورگانداردىڭ شەشىمى بويىنشا كوتەرمە جاردەماقى جانە تۇرعىن ءۇي ساتىپ الۋ نەمەسە سالۋ ءۇشىن الەۋمەتتىك قولداۋ قاراستىرىلعان. جەرگىلىكتى اتقارۋشى ورگاندار پەداگوگكە تۇرعىنجايدى جالعا الۋ ءۇشىن جانە كوممۋنالدىق كورسەتىلەتىن قىزمەتتەرگە وتەماقى تولەمدەرىن، ساناتوري- كۋرورتتىق ەمدەلۋگە ءارى دەمالۋعا جولداما ساتىپ الۋ ءۇشىن تولىق نەمەسە ءىشىنارا تولەمدەر، سونداي-اق پەداگوگتى الەۋمەتتىك قولداۋعا باعىتتالعان وزگە دە جەڭىلدىكتەر بەلگىلەۋگە قۇقىلى.

- «پەداگوگتەردى اتتەستاتتاۋدان وتكىزۋ قاعيدالارى مەن شارتتارىن بەكىتۋ تۋرالى» ءبىلىم جانە عىلىم ءمينيسترىنىڭ 2016 -جىلعى 27 -قاڭتارداعى بۇيرىعىنا سايكەس، جاسى بويىنشا زەينەتكەرلىككە ءتورت جىلدان از قالعان پەداگوگتەر اتتەستاتتاۋ راسىمىنەن بوساتىلادى. پەداگوگتەردىڭ قولدانىستاعى بىلىكتىلىك ساناتى ءوتىنىشى نەگىزىندە زەينەتكەرلىك جاسقا تولعانعا دەيىن ساقتالادى. سونىمەن قاتار قاعيدانىڭ 57-تارماعىنا سايكەس، 30 جانە ودان دا كوپ جىل پەداگوگيكالىق ءوتىلى بار بارلىق لاۋازىمداردىڭ پەداگوگتەرى قولدانىستاعى جۇيە بويىنشا بۇرىن بەرىلگەن بىلىكتىلىك ساناتىن راستاعان جاعدايدا پبب تاپسىرۋدان بوساتىلادى، - دەپ اتالىپ وتكەن ۆەدومستۆو اقپاراتىندا.

قازاقستاندىق وقۋ-اعارتۋ، عىلىم جانە جوعارى ءبىلىم قىزمەتكەرلەرىنىڭ سالالىق كاسىپوداعىنىڭ مالىمەنتىنە سايكەس، 3 جىلدىڭ ىشىندە ءبىلىم بەرۋ قىزمەتكەرلەرىنىڭ وتباسىنان 14748 بالا (2023 -جىلى - 5846 بالا، 2024 -جىلى - 5031 بالا، 2025 -جىلى - 3871 بالا) كاسىپوداق جەڭىلدىگىمەن ەلىمىزدىڭ شيپاجايلارى مەن دەمالىس ورىندارىندا ساۋىقتىرۋدان ءوتتى.

مۇنىمەن قوسا، سالالىق كاسىپوداقتىڭ اقپاراتىنا قاراعاندا، 3 جىلدىڭ ىشىندە (2023، 2024، 2025 ج. ج. ) 81211 ءبىلىم بەرۋ قىزمەتكەرى كاسىپوداق جەڭىلدىگىمەن ەلىمىزدىڭ شيپاجايلارى مەن دەمالىس ورىندارىندا ساۋىقتىرۋعا باردى.

ايتا كەتەيىك، بۇعان دەيىن وقۋ-اعارتۋ مينيسترلىگى پەداگوگتەردى تۇرعىن ۇيمەن قامتاماسىز ەتۋگە قاتىستى تۇسىنىك بەردى.

جاقىندا ءماجىلىسىنىڭ قاراۋىنا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە پەداگوگ مارتەبەسى جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەنگىزىلدى.

وعان سايكەس پەداگوگتەردىڭ بالالاردىڭ ءومىرى مەن دەنساۋلىعى ءۇشىن جاۋاپكەرشىلىگىن تەك وقۋ پروتسەسى بارىسىندا ايقىنداۋ ەسكەرىلگەن، ياعني وقۋدان تىس ۋاقىتتا جانە كانيكۋل نەمەسە كەشكى ۋاقىتتا اتا-اناسىنىڭ جاۋاپكەرشىلىگى بولۋى ءتيىس.