پەداگوگتەر قىزمەتىنىڭ تيىمدىلىك رەيتينگى ەنگىزىلەدى

استانا. KAZINFORM - «ۇستاز» ۇلتتىق پلاتفورماسىندا پەداگوگ قىزمەتكەرلەردىڭ ءبىرىڭعاي دەرەكتەر بازاسى جاساقتالادى. بۇل تۋرالى سەنات دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان.

- مينيسترلىك «ۇستاز» پەداگوگتەردى ۇزدىكسىز كاسىپتىك دامىتۋ ۇلتتىق پلاتفورماسىن ەنگىزدى. ونىڭ قىزمەتى پەداگوگتەردى اتتەستاتسيادان وتكىزۋ ەرەجەسىمەن جانە شارتتارىمەن رەتتەلەدى. بيىل پلاتفورمادا «پەداگوگ- مودەراتور» جانە «پەداگوگ- ساراپشى» بىلىكتىلىك ساناتتارىنا پەداگوگتەردى اتتەستاتتاۋ وتەدى. سونىمەن قاتار 2026 -جىلدىڭ سوڭىنا قاراي پلاتفورمادا تولىقتاي كاسىپتىك ترەكينگتى قامتاماسىز ەتەتىن پەداگوگ قىزمەتكەرلەردىڭ ءبىرىڭعاي دەرەكتەر بازاسى جاساقتالادى. مۇنان بولەك، پەداگوگتەر مەن ءبىلىم بەرۋ ۇيىمدارى باسشىلارى قىزمەتىنىڭ تيىمدىلىك رەيتينگىن ەنگىزۋ جۇمىسى جۇرگىزىلىپ جاتىر، - دەپ اتاپ وتەدى ۇكىمەت باسشىسى جاۋابىندا.

ونىڭ اتاپ وتۋىنشە، پلاتفورمانى دامىتۋ اياسىندا پەداگوگ كادرلارعا وڭىرلەردىڭ قاجەتتىلىگىن ساراپتاۋ جانە بولجاۋ الگوريتمىنە جاساندى ينتەللەكت ەنگىزۋ جوسپارلانعان.

- ايقىن ولشەمشارتتار نەگىزىندە پلاتفورمادا ۇزدىك پەداگوگتەر ءتىزىلىمى جاساقتالادى. بۇل ولاردىڭ تاجىريبەسىن تاراتۋدى قامتاماسىز ەتۋگە مۇمكىندىك بەرەدى. وسىلايشا، پلاتفورما پەداگوگتەردىڭ ساندىق ساپالىق قۇرامىنا سيفرلىق مونيتورينگ ەنگىزۋگە، پەداگوگتەرگە بىلىكتىلىك ساناتتارىن بەرۋگە باقىلاۋدى كۇشەيتۋگە، پەداگوگتەردىڭ انىق مانساپتىق ءوسۋىن قامتاماسىز ەتۋگە مۇمكىندىك بەرەدى، - دەدى ولجاس بەكتەنوۆ.

بۇعان دەيىن ەلىمىزدىڭ ورتا ءبىلىم بەرۋ ۇيىمدارىندا پەداگوگ- كاسىپتىك باعدار بەرۋشى لاۋازىمى رەسمي تۇردە بەكىتىلگەنىن جازعان ەدىك.

اۆتور

مارلان جيەمباي