دارىگەرلەر تايۆاندىق ايەلدىڭ قۇلاعىندا تۇلەگەن ورمەكشىنى شىعارىپ الدى

 وتولارينولوگ دارىگەرلەر قىزمەت جولىندا ناۋقاستاردىڭ قۇلاعىنان بوگدە دەنەلەردى، ونداعان، ءتىپتى ودان دا كوپ قۇرت-قۇمىرسقا مەن جاندىكتەردى كەزدەستىرەدى. Kazinform بۇل تۋرالى Sky News باسىلىمىنا سىلتەمە جاساپ حابارلايدى. 

64 جاستاعى تايۆاندىق ايەل بىرنەشە ءتۇن بويى سول جاق قۇلاعىندا الدەنە جىبىرلاپ جۇرگەنىن، تارسىلداپ جاتقانىن سەزگەن. ۇيقىسىز تۇندەردەن كەيىن ول ەمحاناعا بارۋدى شەشكەن.

دارىگەرلەر تەكسەرۋ كەزىندە ايەلدىڭ قۇلاق كانالىندا كىشكەنتاي ورمەكشى قوزعالىپ جۇرگەنىن بايقاعان. سونداي-اق ولار ورمەكشىنىڭ ەسكى تەرىسىن، ياعني ەسكى ەكزوسكەلەتتى كورگەن.

تايۆانداعى تاينان مۋنيتسيپالدىق اۋرۋحاناسىنىڭ وتولارينولوگيا ءبولىمىنىڭ مەڭگەرۋشىسى، دارىگەر تەنچين ۆان ورمەكشى مەن ونىڭ ەكزوسكەلەتىن شىعارۋ ءۇشىن دارىگەرلەر تۇتىكشەنى پايدالانعانىن ايتتى.

ول ورمەكشى وتە كىشى، ەكى-ءۇش ميلليمەتردەي عانا بولعاندىقتان ايەل اۋرۋدى سەزبەگەنىن اتاپ ءوتتى.

ادام قۇلاعىندا جاندىكتىڭ تۇلەۋى ءبىرىنشى رەت كەزدەسىپ تۇر. بيىل ساۋىردە بولعان بۇل وقيعا جاڭا انگليا مەديتسينالىق جۋرنالىندا جازىلعان (New England Journal of Medicine).

دوكتور ۆان وسىعان ۇقساس بەلگىلەر بايقالسا مەديتسينالىق كومەككە جۇگىنۋگە شاقىرادى.

وڭتۇستىك فلوريدا شتاتىنىڭ ENT Sinus and Allergy كلينيكاسىنىڭ دارىگەرى دەۆيد كاسل دارىگەر ۆان ەسەبىندەگى جاندىك سۋرەتى «ەرەكشە ءارى دابىل قاعاتىنداي» بولعانىن ايتتى.

ونىڭ ايتۋىنشا، ەستۋ جولىندا سىرتقى ەستۋ جولى دەپ اتالاتىن وتە جۇقا ءارى سەزىمتال تەرى بولىگى بار. ونىڭ سەزىمتالدىعى سونشا، ادام قۇلاقتا جىبىرلاپ، سۋسىپ جۇرگەننىڭ ءبارىن بىردەن سەزەدى جانە وعان ۇزاق شىداۋ مۇمكىن ەمەس.

دارىگەر ۆان قۇلاققا كىرىپ كەتكەن ءىرى جاندىكتەر قوزعالىپ، قۇلاقتى زاقىمداماس ءۇشىن ليدوكاين نەمەسە ەتانول پايدالانىپ ولاردى ءولتىرۋ قاجەت دەيدى. ءبىراق قۇلاق پەردەسى تەسىلگەن نەمەسە زاقىمدالعان بولسا بۇل ءتاسىلدى ورىنداۋعا بولمايدى.