دارىگەرلەر قىتاي تاعامدارىن زەرتتەۋ ناتيجەلەرىن جاريالادى
استانا. KAZINFORM - سانيتارلىق دارىگەرلەر قىتاي تاعامدارىن زەرتتەۋ ناتيجەلەرىن جاريالادى، دەپ حابارلايدى 24kz.
اقتوبە وبلىسىندا وقۋشىلاردىڭ جاپپاي ۋلانۋىنا دا وسى قىتاي ونىمدەرى سەبەپ بولعان. 18-اقپاندا قوبدا ورتا مەكتەبىنىڭ بىرنەشە وقۋشىسى قوبدا اۋداندىق اۋرۋحاناسىنا ۋلانۋ بەلگىلەرىمەن تۇسكەن. بەلگىلى بولعانداي، وقۋشىلاردىڭ ءبىرى مەكتەپكە وقۋ ورنىنان تىس جەردەن ساتىپ الىنعان بەلگىسىز ءونىمدى اكەلگەن. ونى تۇتىنعان جەتى بالا سول ساتتە ءوزىن ناشار سەزىنگەن، قالعاندارىنا ءيىس تيگەن. سىرتىندا اس شايانىنىڭ سۋرەتى سالىنعان بۇل ءونىمدى سىنىپتاعى جەتى بالا جەگەن. مۇعالىمدەردىڭ ايتۋىنشا، وتكىر ءيىس بىردەن بولمەگە تاراپ، باسقا بالالار دا شاعىم ايتا باستاعان. كوبى وزدەرىن ءالسىز سەزىنگەن، دەنەلەرىندە بورتپەلەر پايدا بولعان. دارىگەرلەر سىنىپتاعى 23 بالانىڭ بارلىعىن اۋرۋحاناعا جاتقىزىپ، تەكسەرىپ شىقتى. ون وقۋشى ءبىر كۇننەن سوڭ جىبەرىلگەن. زياندى تاعامدى جەگەن جەتەۋىنەن بولەك ءيىس تيگەن تاعى ەكى بالاعا ۋلانۋ دياگنوزى قويىلدى.
ماماندار بۇل تاعامداردىڭ قۇرامىندا ادام اعزاسىنا زياندى زاتتاردىڭ بارىن انىقتادى. ولار باس اۋرۋىن، جۇرەك اينۋدى، السىزدىكتى تۋدىرادى.
بۇل ونەمدەر دۇكەن سورەلەرىنە قالاي ءتۇستى؟
قازاقستاندىق جاستاردا جاڭا ترەند پايدا بولدى. وقۋشىلار «لاتياو» دەگەن قىتايلىق ءونىمنىڭ ءدامىن كورۋدەن جارىسادى. سويا ەتىنەن جاسالعان اشى قىتايلىق تاياقشالاردى جەگەن ۆيدەولار جەلى قولدانۋشىلارى اراسىندا تاراپ كەتتى.
بليتس 1: - باسىندا جەگەندە ءدامى ۇناماعان. ءبىراق كەيىن ۇناپ كەتتى. تاۋەلدىلىك بولدى، ءبىراق قازىر قويىپ كەتتىم. ءبىراق جەيتىن نارسە ەمەس. جۇرەك اينۋ بولادى، قۇسقىڭ كەلەدى، سونداي بولدى.
بليتس 2: - مۇندايعا قارسىمىن. ونداي قولدانۋعا، جەۋگە قارسىمىن. اندا-ساندا بولماسا، بىلاي ۋاقىتتا كۇندەلىكتى پايدالانۋعا زيان دەپ ويلايمىن ادام دەنساۋلىعىنا. ونىڭ قۇرامىن بىلمەيمىز. قۇرامىن بىلمەگەن تەكسەرمەگەننەن كەيىن ۇسىنۋعا كەڭەس بەرمەيمىن.
بليتس 3: - ءبىر رەت جەپ كوردىم. ءتاتتى مە، اشى ما بىلمەيمىن. ءدامى تۇسىنىكسىز. مەكتەپتىڭ جانىنداعى دۇكەندە وسىنداي ونىمدەردى كوپ ساتىلادى. وقۋشىلار ۇنەمى الىپ، جەپ جۇرەدى.
قۇرامىندا گمو، قورعاسىن، كادمي جانە مىشياك بولماسا دا، بۇل سنەكتەردە باس اۋرۋى، ءىسىنۋ، جۇرەك اينۋ جانە السىزدىك تۋدىرۋى مۇمكىن ءدام كۇشەيتكىش زات بار. سونىمەن قاتار ول قان قىسىمىن بۇزىپ، اسقازان اۋرۋىنا اكەلۋى مۇمكىن.
قىتايلىق ءونىم قۇرامىنداعى تاعى ءبىر قوسىمشا - ناتري ينوزيناتى. ول اللەرگيا قاۋپىن ارتتىرادى جانە اس قورىتۋ جۇيەسىنە كەرى اسەر ەتەدى. سونىمەن قاتار ءونىمنىڭ قاۋىپسىزدىك تالاپتارىنا ساي ەكەندىگىن راستايتىن سايكەستىك تۋرالى دەكلاراتسيا جوق. سوندىقتان ماماندار مۇنداي سنەكتەردى الماۋعا كەڭەس بەرەدى. اسىرەسە، بالالار جەمەۋى كەرەك.
گۇلنار جاۋعاشيەۆا، گاستروەنتەرولوگ-دارىگەر:
- سنەكتەردە كوپتەگەن زياندى قوسپالار بار. وندا كونسەرۆانتتار، بوياعىش زاتتار، ءدامدى كۇشەيتەتىن زاتتار بار ەكەنىن ەسكەرسەك، ارينە، بۇل ونىمدەر اسقازان-ىشەك جولدارىنىڭ شىرىشتى قابىعىن تىتىركەندىرەدى. ناتيجەسىندە وتكىر گاستريت بولۋى مۇمكىن، ۋلانۋدا مۇمكىن.
قىتايدا مۇنداي سنەكتەردى ەت جەمەيتىن ادامدار تۇتىنادى. بۇل تۋرالى قىتايداعى مەنشىكتى ءتىلشىمىزدىڭ حابارلادى. ءبىراق جەرگىلىكتى حالىقتىڭ ءوزى وسى ءونىمنىڭ بالالار مەن جاسوسپىرىمدەردە تاۋەلدىلىك تۋدىراتىنىن ايتادى.
ايگەرىم سادۋبايەۆا، ق ر د س م سانيتارلىق-ەپيدەميولوگيالىق باقىلاۋ كوميتەتى باسقارماسىنىڭ باسشىسى:
- قىتاي تاعامدارى كوبىنەسە شاعىن دۇكەندەردە، ساۋدا ورىندارىندا، ميني-ماركەتتەردە سايكەستىك تۋرالى دەكلاراتسياسىز ساتىلادى. ياعني، كاسىپكەر مۇنداي تاۋاردى ساتۋ ءۇشىن جەتكىزۋشىدەن سايكەستىك تۋرالى دەكلاراتسيانى تالاپ ەتپەيدى. دەمەك، زاڭنامانى بۇزادى جانە بۇل ءونىم تۇتىنۋشىعا تاڭبالاۋسىز، قاجەتتى اقپاراتسىز ساتىلادى.
اقتوبە وبلىسىندا وقۋشىلاردىڭ جاپپاي ۋلانۋىنان كەيىن سانيتارلىق ەپيدەميولوگيالىق باقىلاۋ كوميتەتى مۇنداي ونىمدەردى اينالىمنان الىپ تاستاۋدى تاپسىردى. سنەكتەردى ساتاتىن دۇكەندەر مەن ساۋدا ورىندارى ءتيىستى حابارلامالاردى الدى. قازىر قىتايلىق ءونىمدى ەلگە كىرگىزۋگە جانە ساتۋعا تىيىم سالاتىن سانيتارلىق ءىس شارالار جۇرگىزىلىپ جاتىر.
