دارىگەرگە قول كوتەرگەندەر قانشا جىلعا قامالادى
استانا. KAZINFORM - بۇل ساۋالعا دەنساۋلىق ساقتاۋ ءمينيسترى اقمارال ءالنازاروۆا جاۋاپ بەردى.
- مەملەكەت باسشىسى جاڭا نورمانى ازىرلەۋ جۇكتەدى، ءبىز نورما جوباسىن ازىرلەدىك. بۇگىندە باس پروكۋراتۋرامەن، ىشكى ىستەر مينيسترلىگىمەن بىرلەسىپ جۇمىس ىستەپ جاتىرمىز، الدىن الا وڭ قورىتىندى الىندى. قىلمىستىق كودەكسكە مەديتسينا قىزمەتكەرلەرىنە كۇش كورسەتۋ، قول جۇمساۋعا قاتىستى جەكە باپ ەنگىزىلەدى. بۇل قىلمىستىق كودەكتىڭ جاڭا 158-باپتىڭ 1-تارماعى بولادى، ول بوستاندىقتى شەكتەۋ نەمەسە ايىرۋ جازاسىن قاراستىرادى، - دەدى اقمارال ءالنازاروۆا ۇكىمەت ۇيىندە وتكەن باسپا ءسوز ءماسليحاتىندا.
ءمينيستردىڭ مالىمدەۋىنشە، ەگەر مەديتسينالىق قىزمەتكەرگە كۇش قولدانۋ قاۋپى تونسە جانە فاكتى تىركەلگەن جاعدايدا 2 جىلعا دەيىن بوستاندىعىن شەكتەۋ جازاسى كوزدەلىپ وتىر.
- ال ەگەر ءبىر مەديتسينا قىزمەتكەرىنە قاتىستى كۇش قولدانعان جاعدايدا 2 جىلدان 7 جىلعا دەيىن باس بوستاندىعىنان ايىرۋ، توتەنشە جاعداي كەزىندە جاسالعان بولسا 10 جىلعا دەيىن، ال ەگەر بۇل ارەكەت بىرنەشە مەديتسينا قىزمەتكەرىنە، ياعني ءبىر توپ مامانعا قارسى ءبىر نەمەسە بىرنەشە ادام تاراپىنان جاسالسا 15 جىلعا دەيىن باس بوستاندىعىنان ايىرۋ جازاسى قاراستىرىلادى، - دەيدى ۆەدومستۆو باسشىسى.
