دارىندى جاستاردىڭ شەتەل اسۋىن ازايتۋ ءۇشىن نە ىستەلدى
استانا. KAZINFORM - عىلىم جانە جوعارى ءبىلىم مينيسترلىگى حالىقارالىق ۋنيۆەرسيتەتتەردىڭ فيليالدارىن قازاقستاندا اشۋ جۇمىسىنا قاتىسى تۇسىنىك بەردى.
- شەتەلدىك جوعارى وقۋ ورىندارىمەن ىنتىماقتاستىق، ەڭ الدىمەن، جوعارى ءبىلىم مەن عىلىمدى دامىتۋ تۇجىرىمداماسىنىڭ ستراتەگيالىق كورسەتكىشتەرىن جانە حالىقارالىق اكادەميالىق رەيتينگتەردى جۇزەگە اسىرۋعا باعىتتالادى. شەتەلدىك ستۋدەنتتەردىڭ ۇلەسىن ارتتىرۋ، دارىندى جاستاردىڭ شەتەل اسۋىن ازايتۋ، يننوۆاتسيالىق ءبىلىم بەرۋ مەن عىلىمي جوبالاردىڭ ۇلەسىن ارتتىرۋ ماقساتىندا مينيسترلىك ءبىرقاتار كەشەندى شارالاردى قابىلداپ جاتىر. ماسەلەن، ورتالىق ازيانىڭ جوعارى ءبىلىم بەرۋ كەڭىستىگىن قۇرۋ جانە الەمدىك دەڭگەيدەگى جەتەكشى ۋنيۆەرسيتەتتەردىڭ فيليالدارىن اشۋ ەسكەرىلگەن. سوندىقتان قر عىلىم جانە جوعارى ءبىلىم مينيسترلىگى الەمنىڭ بارلىق نەگىزگى ايماقتارىن جانە اكادەميالىق ارتىقشىلىق ورتالىقتارىن قامتيتىن ءبىلىم بەرۋ حابىن قۇرۋ بويىنشا ماڭىزدى جۇمىستى اتقارىپ وتىر، - دەلىنگەن عىلىم مينيسترلىگىنىڭ Kazinform اگەنتتىگىنە بەرگەن جاۋابىندا.
قازىرگى كەزدە جوعارى ءبىلىم جانە عىلىم سالاسىنداعى حالىقارالىق ىنتىماقتاستىق 45 ۇكىمەتارالىق جانە ۆەدومستۆوارالىق حالىقارالىق كەلىسىم اياسىندا جۇزەگە اسىرىلىپ جاتىر. قازاقستاننىڭ جوعارى وقۋ ورىندارى 82 ەلدىڭ ۋنيۆەرسيتەتتەرىمەن 6073 حالىقارالىق كەلىسىم جانە شارت نەگىزىندە ىنتىماقتاستىقتى جالعاستىرىپ وتىر.
- حابتىڭ نەگىزگى ماقساتى - حالىقارالىق ءبىلىم بەرۋ باعدارلامالارىنىڭ سانىن ارتتىرۋ، تەحنولوگيالار مەن ۇزدىك حالىقارالىق تاجىريبەلەردى ترانسفەرتتەۋ جولىمەن ستراتەگيالىق سەرىكتەستىكتەر قۇرۋ، سونداي- اق دارىندى جاستاردىڭ شەتەل اسۋىن ازايتۋ ارقىلى الەمدىك ءبىلىم بەرۋ كەڭىستىگىنە ينتەگراتسيالانۋ. وسى رەتتە قر پرەزيدەنتى قاسىم-جومارت توقايەۆتىڭ 2022-جىلى بەرگەن تاپسىرماسىنا سايكەس، شەتەلدىك ۇزدىك جوعارى وقۋ ورىندارىن ەلىمىزدە فيليالدارىن اشۋى بويىنشا بەلسەندى جۇمىس اتقارىلىپ جاتىر. قازىر 23 شەتەلدىك ۋنيۆەرسيتەتپەن ستراتەگيالىق سەرىكتەستىك ورناتىلىپ، تاعى 10 ستراتەگيالىق سەرىكتەستىكتى ورناتۋ بويىنشا جۇمىستار جالعاسادى، - دەپ اتالىپ وتكەن ۆەدومستۆو اقپاراتىندا.
بيىل شىلدە ايىندا ەلىمىزدە 19 شەتەلدىك جوعارى وقۋ ورىندارىمەن ءبىلىم بەرۋ باعدارلامالارى جۇزەگە اسىرىلىپ جاتقانىن جازعان ەدىك.
جاقىندا عىلىم جانە جوعارى ءبىلىم مينيسترلىگى جەكەمەنشىك جوعارى وقۋ ورىندارىنداعى ءبىلىم ساپاسىنا قاتىستى كەمشىلىكتەر انىقتالعانىن ءمالىم ەتتى.
