دانيار ەلەۋسىنوۆ ZUFFA جوباسى بويىنشا سىنعا تۇسەدى
استانا. KAZINFORM - كاسىپقوي بوكسشى دانيار ەلەۋسىنوۆ Kazinform تىلشىسىنە الداعى جوسپارى جونىندە اڭگىمەلەپ بەردى.
جاقىندا دانيار ەلەۋسىنوۆ ا ق ش- تىڭ ۆاشينگتون قالاسىندا فيليپپيندىك دجەيمس بەكونمەن (26-5، 17 KO) شەبەرلىك بايقاستى. جارتىلاي ورتا سالماقتا وتكەن باسەكەدە وتانداسىمىز قارسىلاسىن ەكىنشى راۋندتا تەحنيكالىق نوكاۋتپەن تىزە بۇكتىردى. دانيار كاسىپقوي رينگتەگى ون ءۇشىنشى جەڭىسىنە قول جەتكىزدى.
- بۇل كەزدەسۋدە فيليپپيندىك بوكسشىمەن شەبەرلىك بايقاستىم. جەكپە-جەك سەگىز راۋندقا جوسپارلانعان ەدى. ەكىنشى راۋندتا وعان جويقىن سوققىم ءتيىپ، جەكپە-جەك نوكاۋتپەن اياقتالدى. وعان تەحنيكالىق جەڭىلىس جازىلدى. قىسقاسى، كەزدەسۋ ويداعىداي ءوتتى دەپ ويلايمىن.
كەزدەسۋگە تىڭعىلىقتى دايىندىق جۇرگىزدىم. ول ا ق ش- تىڭ پيتسبۋرگ قالاسىندا ءوتتى. بارلىق تالاپتى ساقتاپ، جەكپە-جەككە تولىقتاي دايىن بولدىم. باپكەردىڭ شەشىمىنە قۇلاق اسىپ، قارسىلاسىمدى جان- جاقتى زەرتتەۋگە كوڭىل ءبولدىم. بۇل جەكپە-جەك بارىسىندا تيىمدىلىگىن كورسەتتى، - دەدى كاسىپقوي بوكسشى.
قازىر دانيار امەريكالىق تاجىريبەلى بوكس مامانى توماس يانكەللومەن جۇمىس جاساپ جاتىر. ول كىشى روي دجونس سەكىلدى كوپتەگەن بىلعارى قولعاپ شەبەرىن دايىنداعان.
- قىركۇيەك ايىندا ا ق ش- تا تاعى ءبىر مارتە جەكپە- جەك وتكىزۋدى كوزدەپ وتىرمىن. ودان كەيىن كەلەسى جىلدىڭ باسىندا ZUFFA جوباسى العاشقى كەزدەسۋ بولادى. وندا UFC سەكىلدى تاجىريبەلى بىلعارى قولعاپ شەبەرلەرى جينالعان. بۇل كاسىپقوي مانسابىمداعى جاڭا بەلەستىڭ ءبىرى دەپ ويلايمىن. سوندىقتان قىركۇيەكتەگى جەكپە-جەگىم ZUFFA جوباسىنا دايىندىق رەتىندە باعالانادى، - دەدى دانيار.
