دانيار جارىسقا پسيحولوگيالىق تۇرعىدان دايىن بولمادى - ۇلتتىق قۇرامانىڭ باس باپكەرى

پاريج. KAZINFORM - پاريجدە ءوتىپ جاتقان وليمپيادا ويىندارىنا دزيۋدودان ۇلتتىق قۇرامانى باستاپ كەلگەن باس باپكەرى نۇربول سۇلەيمەنوۆ شاكىرتتەرىنىڭ جەتىستىگى مەن كەمشىن تۇستارى تۋرالى ايتىپ بەردى.

- بۇگىن دانيار شامشايەۆ قارسىلاسىنان ۇتىلىپ قالدى. وعان نە سەبەپ بولدى؟
- دانيار شامشايەۆ جارىسقا پسيحولوگيالىق تۇرعىدان دايىن بولمادى. بۇل جاي جارىس ەمەس، وليمپيادا ويىندارى. سوندىقتان ءار سپورتشى فيزيكالىق تۇرعىدان دا، پسيحولوگيالىق تۇرعىدان دا دايىن بولۋ كەرەك.
- سىزدەرمەن بىرگە جۇمىس ىستەيتىن پسيحولوگتار بار شىعار؟

- بار، ءبىراق بىزبەن بىرگە ۇنەمى ەرىپ جۇرە المايدى. كەيدە ونلايىن جۇمىس ىستەيدى. ءوزىمىزدىڭ بازادا بولادى.

- الداعى جارىسقا شىعاتىن بالۋاندارىمىزدىڭ الەۋەتى قالاي؟ تاعى كىمدەردەن ءۇمىت كۇتەمىز؟

- بۇل ازيا ەمەس، الەم چەمپيوناتى ەمەس، گراندسلام ەمەس، وليمپيادا دەگەن ەرەكشە جارىس قوي. سوندىقتان سپورتشىلارىمىز ەڭ باستىسى پسيحولوگيالىق جاعىنان مىقتى بولۋ كەرەك دەپ ويلايمىن. سپورتشىلارىمىزدىڭ بارلىعى وليمپياداعا تىڭعىلىقتى دايىندالدى. كىمنىڭ باعى جاناتىنىن الداعى ۋاقىت كورسەتەدى.

- دزيۋدو قۇراماسىنان ەڭ ءبىرىنشى بولىپ ەلدوس التىن جۇلدە سىيلادى. بۇل باسقا قۇراماداعى جىگىتتەرگە قانشالىق سەرپىن بەرىپ جاتىر؟

- ەلدوستىڭ التىنى وزگە سپورتشىلارعا وتە ۇلكەن كۇش بەردى دەپ ايتۋعا بولادى. ەلدوستىڭ التىنىن قولدارىنا الىپ، مويىندارىنا تاعىپ، ءبارى دە مۇمكىن ەكەنىن سەزىندى. كەشە عۇسىمان قىرعىزبايەۆقا ەلدوس قانداي ۇلكەن قولداۋ كورسەتتى. ونى وزدەرىڭىز دە كوردىڭىزدەر. مىنە، جىگىت دەگەن ەلدوستاي بولۋ كەرەك. ونىڭ ۇستىنە ەلدوس پەن عۇسىمان ۇزاق ۋاقىت بىرگە كەلە جاتىر. ولار وتە جاقسى دوس.

- عۇسىمان قىرعىزبايەۆتىڭ فينالعا دەيىن جەتۋىنە مۇمكىندىگى بولدى ما؟

- ارينە، بولدى. ءسال ساتتىلىك جەتپەي قالدى وعان. ول بالا وسىعان دەيىنگى قۇرلىقتىق دودالاردىڭ وزىندە 4-5-ورىنداردا جۇرگەن ەدى عوي. مىنە، وليمپيادادا باعى جاندى. ەڭ باستىسى ەلگە جۇلدەمەن بارا جاتىر.

- سپورتشىلارىمىز ەلگە قاشان ورالادى؟

- بىزدە 3-تامىزدا كوماندالىق جارىس بولادى. سول جارىسقا قاتىسامىز. اللا قالاسا ەرتەسى جولعا شىعىپ، 5-تامىز كۇنى تاڭدا الماتى اۋەجايىنا قونامىز. وعان دەيىن ەلدوس تا، عۇسىمان دا وسىندا بولادى. كوماندامەن بىرگە قايتامىز.

- اڭگىمەڭىزگە راقمەت!

اۆتور
كۇنسۇلتان وتارباي