دامىعان ەلدەردە قىزمەتكەرلەر كەڭسەدە ۇيىقتاي الادى

استانا. KAZINFORM - الەمنىڭ دامىعان ەلدەرىندە قىزمەتكەرلەر كەڭسەدە ۇيىقتاي الادى. ويتكەنى ءبىر ءسات مىزعىپ الۋ كاسىبي قىزمەتتە دە، جەكە ومىردە دە جەتىستىككە جەتۋگە مۇمكىندىك بەرەدى دەگەن ۇستانىم بار.

ءيا، قۇرلىقتىڭ ارعى جاعىنداعى امەريكاڭىز بەن ازياداعى قىتاي، جاپونياڭىزدا مەكەمەدە مامانداردىڭ جايلى جۇمىس ىستەۋىنە كەز كەلگەن جاعداي جاسالعان. تۇسكى استان بولەك، تىنىعۋعا جارتى ساعات ءۇزىلىس جاساۋ بۇل ايماقتاردا داستۇرگە اينالعان.

ادەتتە عالىمدار: «كوپ ۇيىقتاۋ زيان»، - دەپ جاتادى. ءومىرىمىزدىڭ ۇشتەن ءبىرى ۇيقىمەن وتەدى دەگەن دەرەك تە بار. ال الپاۋىت ەلدەردىڭ مۇنداي تاجىريبەنى ۇستانۋىنا نە سەبەپ؟ نەگىزى ۇيقى ەكى قۇرىلىمنان تۇرادى. باياۋ جانە قىسقا ۇيقى. باياۋ ادەتتەگى تۇنگى ۇيقى. ال قىسقا ۇيقى - الگى ايتىپ وتىرعان ەلدەر ۇستاناتىن مىزعىپ الۋ تاجىريبەسى. 10-20 مينۋتتىق قىسقا ۇيقىنىڭ ءوزى ادامنىڭ سەرگەك، بەلسەندى بولۋىنا مۇمكىندىك بەرەدى ەكەن. مۇنى عالىمدار دالەلدەپ وتىر.

قىتايدا قىزمەتكەرلەر كەڭسەدە تىنىعا الادى

قىتايدىڭ ەڭبەك مادەنيەتىندە قىزمەتكەردىڭ جاي-كۇيى مەن جۇمىس ونىمدىلىگىنە ەرەكشە ءمان بەرىلەدى. بۇل ەلدەگى ۇزاق جۇمىس كۇندەرى مەن ەڭبەك دەمالىسىنىڭ قىسقا بولۋى قىزمەتكەرلەردەن ۇزدىكسىز زەيىن مەن ەنەرگيانى تالاپ ەتەدى. سول سەبەپتى ەل ۇكىمەتى ماماندارعا جۇمىس اراسىندا كوز شىرىمىن الۋعا رۇقسات ەتەدى. بۇل ادەت «سيۋسي» ءداستۇرى دەپ اتالادى. قىتاي مۇنى جاپونيا مەن وڭتۇستىك كورەيادان ۇيرەنگەن. ءبىراق ءوز مەنتاليتەتى مەن تەحنولوگياسىنا بەيىمدەپ، ونى ءتيىمدى ينفراقۇرىلىممەن ۇشتاستىرا الادى.

مىسالى، ءبىراز مەكەمەدە nap rooms، ياعني قىسقا مەرزىمدى ۇيقى بولمەسى، ارنايى ۇيىقتايتىن كاپسۋلالار، جينالمالى توسەك-ورىندار مەن ۇيىقتاۋعا ارنالعان ەرگونوميكالىق كرەسلولار ۇسىنىلادى. بۇل ماماننىڭ ميىن تىنىقتىرىپ، جۇمىستى جاڭا كۇشپەن ىستەۋىنە جاعداي جاسايدى.

حۋان جيلي، قىتايدىڭ ۇيقى زەرتتەۋ قوعامىنىڭ ءتوراعاسى:

- ۇيقى بۇزىلىستارى مەن جەتكىلىكسىز ۇيقىنىڭ كەسىرىنەن دەنساۋلىعى سىر بەرگەن ادامداردىڭ قاتارى ارتىپ بارا جاتقانىن بايقادىق. بۇل جاعداي فيزيكالىق جانە پسيحيكالىق ساۋلىققا، سونداي-اق جۇمىس تيىمدىلىگىنە اسەر ەتۋى مۇمكىن. سوندىقتان ونى شۇعىل تۇردە شەشۋ قاجەت.

iiMedia Research كەلتىرگەن دەرەككە سۇيەنسەك، 2023 -جىلى ۇيقىنىڭ جەتكىلىكسىزدىگىنەن زارداپ شەككەن قىتاي تۇرعىندارىنىڭ سانى 510 ميلليونعا جەتكەن. بۇل جالپى حالىقتىڭ %38- ءى. «ۋاقىتىلى ءالى جەتكىلىكتى دەمالماعان ادامنىڭ جۇمىسى دا ءونىمسىز، تۇرمىس ساپاسى دا تومەن بولادى»، - دەيدى ماماندار.

وسىنى ەسكەرگەن ەل ۇكىمەتى كەڭسەلەردە ولاردىڭ ۇيقىسى دۇرىس ءارى جۇمىس ساپاسى جوعارى بولۋى ءۇشىن ىڭعايلى ءارى جايلى ۇيىقتاۋعا ارنالعان ارنايى تەحنولوگيالارمەن قامتاماسىز ەتىپ وتىر.

جۇمىستا ۇيىقتاۋ - ەڭبەكقورلىقتىڭ بەلگىسى

جاپون ەلىندە جۇمىس ۋاقىتىندا ءبىر ءسات كوز شىرىمىن الۋ جۇمىستان قۋىلۋعا سەبەپ ەمەس. ويتكەنى ولار كەڭسەدە مىندەتتى تۇردە ازعانتاي ۋاقىت تىنىعىپ الادى. بۇل قىزمەتكەردىڭ جۇمىسىنا ادالدىعىن اڭعارتادى. حالىق اراسىندا وسى تاجىريبە «ينەمۋري» دەپ اتالادى. تىكەلەي اۋدارماسى «ورنىندا ۇيىقتاۋ» دەگەنگە سايادى. مادەنيەتتىڭ بۇل ءتۇرى جاپونيادا بۇرىننان بار. جەرگىلىكتى جۇرت قوعامدىق ورىندا، كەڭسەدە وتىرىپ تا، تۇرىپ تا ۇيىقتاي بەرەدى. كوپ جاعدايدا بۇل ەڭبەكقورلىق پەن جاۋاپكەرشىلىكتىڭ بەلگىسى رەتىندە قاراستىرىلادى. سەبەبى ادام جۇمىستان شارشاپ، تىنىعۋعا ۋاقىت ايىرا بىلەدى دەگەن تۇسىنىك بار.

كۇندىزگى ەڭ ءتيىمدى ۇيقى ۇزاقتىعى شامامەن 25 مينۋت. بۇل جۇمىس ونىمدىلىگىن 34، ال سەرگەكتىكتى %54- كە ارتتىرادى. سونداي-اق اعزانىڭ سيركادتىق ريتمىن ساقتاپ، ەنەرگيانى ءتيىمدى پايدالانۋعا مۇمكىندىك بەرەدى.

يتاليادا تۇسكى تىنىعۋ مادەنيەتى بار

يتاليالىقتار دا كۇندىز ءسال مىزعىپ الۋدى ءجون سانايدى. «ريپوسو» دەپ اتالاتىن ءداستۇر بويىنشا يتاليالىقتار كۇننىڭ ىستىق ساعاتتارىندا، ادەتتە تۇستەن كەيىنگى ۋاقىتتا قىسقا ۋاقىت تىنىعىپ، ءۇزىلىس جاسايدى. كەي وڭىرلەردە تۇسكى ءۇزىلىس بىرنەشە ساعاتقا دەيىن سوزىلىپ، ساۋدا ورىندارى مەن كەڭسەلەر ۋاقىتشا جابىلادى. كەيىنگى جىلدارى ءبىراز جەرگىلىكتى كومپانيا كەڭسەدە جۇمىس ۋاقىتىندا كوز ءىلىپ الۋ تاجىريبەسىن ەنگىزۋدە. قىسقا ۇيقى قىزمەتكەردىڭ شارشاۋىن جەڭىلدەتىپ، ونىمدىلىكتى ارتتىرۋعا كومەكتەسەدى دەپ سانالادى.

امەريكادا مەكەمە ىشىنەن بالا كۇتۋ قىزمەتى اشىلدى

ال ا ق ش- تىڭ فلوريدا شتاتىندا مەكەمە ىشىنەن بالا كۇتۋ قىزمەتى اشىلعان. انالار بوبەگىن باقشاعا ەمەس، جۇمىسىنا تاسي الادى. قىزمەتتىڭ بۇل ءتۇرى كاپيتولي عيماراتىنىڭ ىشىندە قولدانىسقا بەرىلدى. ول كوپ انانىڭ جۇمىسى مەن تۇرمىسىن قاتار الىپ جۇرۋىنە مۇمكىندىك بەرەدى. راتگەرس ۋنيۆەرسيتەتى كەلتىرگەن دەرەككە سۇيەنسەك، فلوريدا شتاتىندا زاڭ شىعارۋشىلاردىڭ %33- ءى ايەلدەر. بيلىك باسىندا وتىرعان قىز-كەلىنشەكتەردىڭ كوبەيۋى انا مەن بالانىڭ قاجەتتىلىگىن ەسكەرەتىن ساياساتتى قولداۋعا باسىمدىق بەرىپ وتىر.

فيونا ماكفارلاند، فلوريدا شتاتى وكىلدەر پالاتاسىنىڭ مۇشەسى:

- ءارى انا، ءارى پالاتا سپيكەرى رەتىندە قوس مىندەتىمدى قاتار الىپ ءجۇرۋ مەن ءۇشىن وتە ماڭىزدى. بوبەگىمە ارنايى بولمە بەرىپ، وعان كۇتىم جاساۋ ءۇشىن الاڭداماي وتىرۋ - مەن سياقتى ءار انا ءۇشىن مانساپ جولىندا دا كوتەرىلۋگە جاقسى قولداۋ. مىسالعا، ءقازىر جۇمىستا وتىرىپ، بالاما قالاي قاراپ جاتىر دەپ ەش ۋايىمدامايمىن.

24.kz