داۋلەت تۇرلىحانوۆتىڭ ۇلى باس بوستاندىعىنان ايىرىلدى

الماتى. KAZINFORM - الماتى قالاسى مەدەۋ اۋدانىنىڭ No2- اۋداندىق سوتى پروباتسيا قىزمەتىنىڭ نۇراسىل بولاتقا قاتىستى جازانى - باس بوستاندىعىن شەكتەۋدى ودان ايىرۋمەن اۋىستىرۋ تۋرالى ۇسىنىسىن قارادى. بۇل تۋرالى جوعارعى سوتتان مالىمدەدى.

بۇعان دەيىن جوعارعى سوت ن. بولاتقا ەكى نەمەسە ودان دا كوپ ادامنىڭ دەنساۋلىعىنا قاساقانا اۋىرلىعى ورتاشا زيان كەلتىرگەنى ءۇشىن (ق ر ق ك-نىڭ107-بابى 2-بولىگى 1-تارماقشاسى بويىنشا) 2 جىلعا باس بوستاندىعىن شەكتەۋ جازاسىن تاعايىنداعان بولاتىن.

بولات پروباتسيا قىزمەتىنىڭ ەسەبىنە الىنىپ، جازانى وتەۋدىڭ ءتارتىبى مەن شارتتارىمەن جانە ونى بۇزعانى ءۇشىن جاۋاپكەرشىلىكپەن تانىسقان.

«سوتتالعاننىڭ ورنالاسقان جەرىن باقىلاۋدى قامتاماسىز ەتۋ ءۇشىن ەلەكتروندى باقىلاۋ قۇرالى قولدانىلدى. وسىعان قاراماستان، بولات پروباتسيالىق باقىلاۋدىڭ 3 رەت زاڭ بۇزۋشىلىقتارىنا جول بەرگەن، ول سوتپەن زەرتتەلگەن دالەلدەمەلەرمەن راستالعان. وسىلايشا، سوتتالۋشى جازاسىن وتەۋ تارتىبىمەن شارتتارىن قاساقانا بۇزعان»، - دەلىنگەن سوت حابارلاماسىندا.

قىلمىستىق كودەكستىڭ 44-بابىنىڭ 3-بولىگىنە سايكەس، باس بوستاندىعىن شەكتەۋدى وتەۋدەن قاساقانا جالتارعان جاعدايدا ونىڭ وتەلمەگەن مەرزىمى باس بوستاندىعىن شەكتەۋدىڭ ءبىر كۇنىنە باس بوستاندىعىنان ايىرۋدىڭ ءبىر تاۋلىك مولشەرىندە باس بوستاندىعىنان ايىرۋمەن اۋىستىرىلادى.

سوت پروباتسيا قىزمەتىنىڭ ءوتىنىشحاتىن نەگىز دەپ تانىپ، ونى قاناعاتتاندىردى.

ن. بولاتقا باس بوستاندىعىن شەكتەۋ تۇرىندەگى جازاسى وتەلمەگەن مەرزىمگە 1 جىل 5 اي 10 كۇنگە باس بوستاندىعىنان ايىرۋمەن اۋىستىرىلدى.

قاۋلى زاڭدى كۇشىنە ەنگەن جوق.

وسىعان دەيىن الەۋمەتتىك جەلىدە ءماجىلىس دەپۋتاتى داۋلەت تۇرلىحانوۆتىڭ بوستاندىعى شەكتەلگەن ۇلى نۇراسىل بولاتتىڭ تۇنگى ۋاقىتتا ەمىن-ەركىن جۇرگەن ۆيدەوسى تاراعانى تۋرالى جازعان ەدىك.

ەسكە سالا كەتەيىك، 2023 -جىلى اقپاندا نۇراسىل بولات الماتىدا زاڭگەر اننا دميتريەۆيچ پەن ونىڭ كۇيەۋى ولەگ چەرنوۆتى سوققىعا جىققان ەدى.

كەيىن سپورت قايراتكەرى داۋلەت تۇرلىحانوۆ بالاسىنىڭ بۇزاقىلىق ارەكەتىنە بايلانىستى پىكىر ءبىلدىردى.

ودان بولەك، داۋلەت تۇرلىحانوۆ ۇلىنىڭ ىسىنە ارالاسپايتىنىن ايتتى.

ال، وتكەن جىلى 2-شىلدە كۇنى ول مەرزىمدى اسكەري بورىشىن وتەپ جاتقان جەرى - قونايەۆ گارنيزونى اسكەري بولىمدەرىنىڭ بىرىنەن قاشىپ كەتكەن بولاتىن.

كەيىن كوپ وتپەي تابىلىپ، قىزمەت اتقاراتىن ورنىنا جەتكىزىلدى.

الماتى گارنيزونى ءبولىم باستىعىنىڭ بۇيرىعىنا باعىنباعانى جانە ورىنداماعانى ءۇشىن اكىمشىلىك جاۋاپكەرشىلىككە تارتىلدى.

2023 -جىلى 9-قازاندا داۋلەت تۇرلىحانوۆتىڭ ۇلىنا سوت ۇكىمى شىقتى.

پروكۋرور سوتتالۋشى ب-عا 1 جىل 6 اي باس بوستاندىعىن شەكتەۋ تۇرىندە جازا تاعايىنداۋدى سۇرادى.

بيىل مامىردا جوعارعى سوت داۋلەت تۇرلىحانوۆتىڭ ۇلىنا كەسىلگەن ۇكىمدى وزگەرتتى. سودان سوڭ داۋلەت تۇرلىحانوۆ ۇلىنىڭ سوت ۇكىمىنە قاتىستى پىكىر ءبىلدىردى.

ق ر پارلامەنتى ءماجىلىسىنىڭ دەپۋتاتى داۋلەت تۇرلىحانوۆتىڭ ۇلى نۇراسىل بولات پروباتسيالىق باقىلاۋدى ەلەمەگەنى ءۇشىن باس بوستاندىعىنان ايىرىلۋى مۇمكىن ەكەنىن جازعان بولاتىنبىز.