داۋلەت مۇقايەۆ «ۇلتتىق كيىم» كۇنىن بەكىتۋدى ۇسىندى
استانا. KAZINFORM - ۇلتتىق كيىمدەرىمىزدى ۇلىقتاۋ ماقساتىندا رەسپۋبليكالىق دەڭگەيدە «ۇلتتىق كيىم» كۇنىن بەكىتۋ قاجەت. بۇل تۋرالى پرەمەر-ءمينيستردىڭ ورىنباسارى تامارا دۇيسەنوۆانىڭ اتىنا ساۋال جولداعان ءماجىلىس دەپۋتاتى داۋلەت مۇقايەۆ ايتتى.
«ۇلتتىق كيىم - ۇلتىمىزدىڭ ۇلىلىعىن ۇلىقتايتىن، ۇلتتىق كودىمىزدى بىلدىرەتىن ايشىقتى كورسەتكىش. ۇلتتىق كيىمدەرىمىزدىڭ مول مۇراسىمەن ماقتانا الاتىنداي ەلمىز. باسقا كيىمدەردى ايتپاعاندا، ءبىر عانا باس كيىمنىڭ قازاق حالقىندا 20 دان استام ءتۇرى بار. بۇگىندە ۇلتتىق كيىمىزدى ءوزىمىز ەمەس، وزگە ەلدەردە كەڭىنەن ۇلىقتالۋ ۇستىندە. الەۋمەتتىك جەلىدە قىتايدا قازاق جىگىتىنىڭ ۇلتتىق كيىممەن كوشەدە ءجۇرىپ ەلدىڭ نازارىنا تۇسكەن ۆيدەوسى 5 ميلليونعا جۋىق قارالىم جيناپ، حالىقتىڭ ىستىق ىقىلاسىنا بولەنگەن. ەلدە ۇلتتىق كيىمدى ناسيحاتتاۋ تەك ءبىر رەتتىك چەللەندجدەر مەن اكسيالارمەن عانا ۇلىقتالۋدا. سوڭعى ۋاقىتتا جالپى حالىق اراسىندا «ۇلتتىق سەزىم» جالپىۇلتتىق اكسياسى باستالىپ، ەل اراسىندا كەڭىنەن قولداۋ تاۋىپ كەلەدى. اكسيانى زيالى قاۋىم وكىلدەرى، جۋرناليستەر مەن بلوگەرلەر، وقۋ وردالارى قولداپ، اپتانىڭ ءار جۇماسىندا ۇلتتىق ناقىشتاعى كيىمدەردى كيىپ جۇرگەندەر قاتارى كوبەيدى. وسى اكسيانى باستاعان ازاماتتارعا ەرەكشە العىسىمدى بىلدىرەمىن. ۇلتتىق كيىم مادەني مايداننىڭ نەگىزگى قارۋى، حالىق ساناسىنا اسەر ەتۋشى كۇش ەكەنىن ەسكەرسەك بۇل ماسەلەگە ءۇستىرتىن قاراۋعا بولمايدى»، - دەدى دەپۋتات.
ونىڭ اتاپ وتۋىنشە، الداعى ۋاقىتتا ۇلتتىق ناقىشتاعى كيىم كيۋ ءداستۇرىن تەك ناۋرىزبەن، اكسيالارمەن عانا شەكتەمەي، ونى ترەندكە اينالدىرۋ قاجەت.
«ماسەلەن، باۋىرلاس قىرعىز حالقى باستارىنان ايىر قالپاعىن تاستامايدى. سوعان قاراپ-اق، ونى قىرعىز ەكەنىن جازباي تانيسىڭ. ءتىپتى جوعارعى كەنەشتىڭ وزىندە دەپۋتاتتارى ايىر قالپاقتارىن كيىپ وتىرادى. ول قالا بەردى ۇلتتىق كيىمدەرىن ساقتاۋ ماقساتىندا، 5-ناۋرىزدى - ايىر قالپاق كۇنى دەپ مەملەكەتتىك دەڭگەيدە بەكىتىپ، يۋنەسكونىڭ ماتەريالدىق ەمەس مادەني مۇرالارىنىڭ تىزىمىنە ەنگىزگەن. بۇنداي كۇن تەك قىرعىزستاندا عانا ەمەس الەمنىڭ برازيليا، يسپانيا، شوتلانديا، جاپونيا سىندى الپاۋىت ەلدەرىندە بار. كورشىلەس وزبەك حالقى دا الا تاقياسى مەن شاپانىن كۇندەلىكتى كيەدى. سول سەكىلدى شەشەن حالقى دا ەلتىرى بورىگىمەن ەرەكشەلەنەدى. ءبىز دە ءوز ۇلتتىق كيىمىمىزدى ءوزىمىز كيۋدى سانگە اينالدىرماساق، بىرتىندەپ ولاردى باسقالار يەمدەنىپ كەتۋى مۇمكىن. سوڭىندا شاپانىمىزدان ايرىلىپ، قامشىمىزدى عانا ۇستاپ قالمايىق»، - دەدى داۋلەت مۇقايەۆ.
وسى ورايدا ول ۇكىمەتكە ءبىرقاتار ءىس-شارانى قولعا الۋدى ۇسىندى.
«بىرىنشىدەن - ۇلتتىق كيىمدەرىمىزدى ۇلىقتاۋ ماقساتىندا رەسپۋبليكالىق دەڭگەيدە «ۇلتتىق كيىم» كۇنىن بەكىتۋ. بۇل كۇن مادەني قۇندىلىقتارىمىزدى كەڭىنەن ناسيحاتتاپ، وسكەلەڭ ۇرپاقتى وتانشىلدىققا تاربيەلەۋدىڭ نەگىزى بولار ەدى. ەكىنشىدەن - مەملەكەتتىك قىزمەتكەرلەر مەن حالىققا قىزمەت كورسەتەتىن ورتالىق قىزمەتكەرلەرىنىڭ كيىمدەرىنە قازاقي ايدەنتيكا ەلەمەنتتەرىن قوسۋ. ۇشىنشىدەن - ۇلتتىق كيىم وندىرەتىن وتاندىق كاسىپكەرلەرگە مەملەكەت تاراپىنان قولداۋ كورسەتىپ، بيزنەستى قولداۋعا باعىتتالعان گرانتتاردا ۇلتتىق كيىم كاسىبىنە باسىمدىق بەرۋ، حالىق اراسىندا ۇلتتىق كيىمدى قولجەتىمدى ەتۋگە ىقپال ەتىپ، سۇرانىستى ارتتىرۋ. تورتىنشىدەن - مەكتەپ وقۋشىلارى كيەتىن ۇلتتىق كيىمدەر ستاندارتىن ازىرلەپ ەنگىزۋ ءارى حالىقارالىق ءتۇرلى جارىستارعا باراتىن ازاماتتاردىڭ فورمالارىنا مىندەتتى تۇردە ۇلتتىق ناقىشتى بەينەلەۋ»، - دەدى ءماجىلىس دەپۋتاتى.
