داعىستاندا 300 دەن استام ادام سۋدان ۋلاندى
استانا. KAZINFORM - داعىستاننىڭ ماگارامكەنت اۋدانىندا سوڭعى ءۇش كۇندە 302 ادام، ونىڭ ىشىندە 294 بالا ىشەك ينفەكتسياسىنىڭ بەلگىلەرىمەن مەديتسينالىق كومەككە جۇگىنگەن. بۇل تۋرالى رەسپۋبليكا دەنساۋلىق ساقتاۋ مينيسترلىگىنىڭ Telegram-ارناسىندا حابارلاندى.
جەرگىلىكتى روسپوترەبنادزوردىڭ حابارلاۋىنشا، ۋلانۋ ماگارامكەنتتەن 14 شاقىرىم جەردە ورنالاسقان «دجەپەلسكي» بۇلاعىنداعى سۋعا بايلانىستى بولۋى مۇمكىن.
دارىگەرلەر اۋىلداردا ىندەتكە قارسى ءىس-شارالار جۇرگىزىپ جاتىر. جاعدايدى وسىعان دەيىن ماگارامكەنتكە بارعان داعىستان دەنساۋلىق ساقتاۋ مينيسترلىگىنىڭ باسشىسى ياروسلاۆ گلازوۆ باقىلاۋعا العان.
اۋداندىق ورتالىق اۋرۋحاناعا ۋلانۋ بەلگىلەرىمەن تۇسكەن ءۇش ناۋقاس شىعارىلدى، 93 ناۋقاس اۋرۋحانادا قالدى. اۋرۋ تىركەلگەن ەلدى مەكەندەردىڭ تۇرعىندارىنا ءىشۋ جانە تاماق دايىنداۋ ءۇشىن تەك بوتەلكەدەگى نەمەسە قايناتىلعان سۋدى پايدالانۋ ۇسىنىلادى.
داعىستانعا سۋدى زالالسىزداندىرۋ ءۇشىن ءۇش توننا ناتري گيپوحلوريتى جەتكىزىلمەك. 9-شىلدەدە رەسەيدىڭ تەرگەۋ كوميتەتىنىڭ جەرگىلىكتى دەپارتامەنتى اۋداندىق تۇرعىن ءۇي-كوممۋنالدىق شارۋاشىلىق باسقارماسىنىڭ ديرەكتورى رەنات حاليدوۆتىڭ ۇستالعانى تۋرالى حابارلادى. ونىڭ ۇستىنەن «قاۋىپسىزدىك تالاپتارىنا ساي كەلمەيتىن قىزمەت كورسەتۋ» بابى بويىنشا قىلمىستىق ءىس قوزعالدى.
ەسكە سالا كەتەيىك، داعىستاندا سۋدان ۋلانعان 100 دەن استام ادام اۋرۋحاناعا جەتكىزىلگەنى تۋرالى جازعان ەدىك.
اۆتور
بەگابات ۇزاقوۆ
