د. ترامپ تاريفتەرى ا ق ش شارۋالارىن تىعىرىققا تىرەدى

استانا. قازاقپارات – ا ق ش پرەزيدەنتى دونالد ترامپتىڭ قىتايدان كەلەتىن ونىمدەرگە سالىق سالۋى امەريكالىق شارۋالاردىڭ وزىنە سوققى بولىپ ءتيدى. ويتكەنى ازيالىق ەل دە قاراپ قالماي، امەريكاعا قارسى تاريفتەر ەنگىزگەن.

بىلتىر قىتاي شتاتتاردان 24 ميلليارد 650 ميلليون دوللارعا مايبۇرشاق، جۇگەرى سياقتى داقىلدار ساتىپ العان. ا ق ش- تا وندىرىلەتىن مايبۇرشاقتىڭ جارتىسى شەتەلگە ەكسپورتتالادى. ونىڭ كوپ بولىگىن قىتاي الاتىن. ترامپ تاريفتەرىنەن كەيىن امەريكالىق ءداندى داقىلداردىڭ باعاسى كۇرت قۇلدىرادى. ا ق ش شارۋالارى بۇعان دەيىن 40 سوتىق ءونىم ءۇشىن كەمىندە 50 دوللار تابىس الاتىن. قازىر بۇل كىرىس 25 دوللارعا ارەڭ جەتەدى. امەريكالىق ديقاندار بۇل قارجى ءوندىرىس شىعىندارىن مۇلدە وتەي المايدى دەپ زار قاعىپ وتىر.

برايانت كاگاي، شارۋا قوجالىعىنىڭ يەسى:

- جۇگەرى، مايبۇرشاق، بيداي ءوسىرۋ - ءبىزدىڭ اتا كاسىبىمىز. مەن اۋلەتىمدە وسى شارۋاشىلىقتى جالعاستىرىپ كەلە جاتقان ءتورتىنشى بۋىنمىن. بۇل ىسپەن اتام، اكەم - ءبارىمىز بىرگە اينالىسامىز. باسقا ەلدەرگە تاريفتەر ەنگىزۋ جاقسى يدەيا ەمەس. ولار دا بىزگە قارىمتا قايتارادى. سونىڭ كەسىرىنەن ءبارى قىمباتتايدى، ال ءبىزدىڭ ءونىمىز ارزانداپ قالادى. بىزگە ۇنەمى حيميالىق زاتتار، تىڭايتقىشتار كەرەك.